ޑިސެންބަރު މަހުގެ ޗުއްޓީއާ ގުޅުވައި ޕާސްޕޯޓުގެ ޚިދުމަތަށް ޑިމާންޑު ބޮޑުވެ، ފާއިތުވި ދެ ހަފުތާގައި ޕާސްޕޯޓް ދޫކުރެވުނު އަދަދު 2،623 އަށް އަރާފައިވާ ކަމަށް އިމިގްރޭޝަނުން ބުނެފިއެވެ.
އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބުނީ، ޕާސްޕޯޓުގެ ޚިދުމަތަށް ޑިމާންޑު ބޮޑުވުމުން ވަސީލަތްތައް އެންމެ މަތީ ދަރަޖައަށް ބޭނުންކޮށް ރައްޔިތުންނަށް ޚިދުމަތްދެމުން އަންނަ ކަމަށެވެ.
ގިނަ އަދަދެއްގެ ޕާސްޕޯޓު ދޫކޮށްފައިވާއިރު އިމިގްރޭޝަނުން މި ފަހުން ގިނަ ލުއިތަކެއް ވެސް ވަނީ ޕާސްޕޯޓު ހެއްދުމުގައި ފަހިކޮށްދީފައެވެ.
އެގޮތުން، މި މަހުގެ ތިންވަނަ ދުވަހު އިމިގްރޭޝަނުންވަނީ ރީޖަނަލް އޮފީސްތައް ގާއިމުވެފައި ހުރި ސިޓީތަކަށް ޕާސްޕޯޓު ފޮނުވުން ވެސް ދެ ގުނައަށް އަވަސްކޮށްފައެވެ.
އަދި އިލެކްޓްރޯނިކް ޕާސްޕޯޓާ ހަވާލުވުމަށް ވެރި ފަރާތުން ހާޒިރުވާއިރު މިހާރު އައިޑީ ކާޑު ގެންދަން ނުޖެހޭގޮތަށް އިމިގްރޭޝަނުން ވަނީ ނިންމާފައެވެ.
އެއާއެކު 18 އަހަރުނުވާ ކުދިންގެ ބެލެނިވެރިން އެ ކުދިންނާއެކު ޕާސްޕޯޓާއި ހަވާލުވުމަށް އަންނައިރު، އެ ކުއްޖެއްގެ އައިޑީ ކާޑުގެ ފޮޓޯއެއް ދެއްކުމުން އައިޑީކާޑު ވެރިފައިކުރެވޭ ގޮތަށް ވެސް ވަނީ ހަދައިދީފައެވެ.
މީގެ އިތުރުން، ނޮން އިލެކްޓްރޯނިކް އަދި އެމަޖެންސީ ޕާސްޕޯޓު ދޫކުރުމުގައި ވެސް ވެރިފަރާތުން ޕާސްޕޯޓާ ހަވާލުވާނަމަ ކޮންމެހެން އައިޑީ ކާޑު ގެނައުން ލާޒިމުނުވާނެ ކަމަށް ވެސް އިމިގްރޭޝަނުން ވަނީ ބުނެފައެވެ.