މާލޭގެ ދެ ސަރަހައްދެއް ބަލައި ގަވާއިދާ ޚިލާފަށް އުޅޭ 25 ބިދޭސީއަކު މިއަދު ބެލުމުގެ ދަށަށް ގެންގޮސްފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.
އިމިގްރޭޝަނުން މިއަދު އެކްސްގައި ކޮށްފައިވާ ޕޯސްޓެއްގައި ވަނީ އިމިގްރޭޝަން ވޮޗަށް ލިބިފައިވާ މައުލޫމާތަކާ ގުޅިގެން މާލޭގެ ދެ ސަރަހައްދެއް ބަލައި ފާސްކޮށްފައިވާ ކަމަށެވެ.
އެގޮތުން ގަވާއިދާ ހިލާފަށް އުޅޭ ބިދޭސީން ގިނަކަމަށް "އިމިގްރޭޝަން ވޮޗް" އަށް މައުލޫމާތު ލިބިފައިވާ ދެ ސަރަހައްދު ކަމަށްވާ މާލޭގެ ލޯކަލް މާރުކޭޓު އަދި ހީނާމާގޭ ޕާކިން ސަރަހައްދަށް ހާއްސަ ޓާސްކުފޯހުން މިއަދު ހާއްސަ ރެއިޑު އޮޕަރޭޝަނެއް ހިންގާފައި ވާކަމަށް އިމިގްރޭޝަނުން ވަނީ ބުނެފައެވެ.
އެގޮތުން އެ ދެ ސަރަހައްދުން 137 ބިދޭސީން ބަލައި ފާސްކޮށް، ގަވާއިދާ ޚިލާފަށް އުޅެމުންދާ 25 ބިދޭސީއަކު އިމިގްރޭޝަންގެ ބެލުމުގެ ދަށަަށް ގެނެސްފައިވާ ކަމަށް އިމިގްރޭޝަނުން ވަނީ ބުނެފައެވެ.
މިއަދުގެ ރެއިޑު އޮޕަރޭޝަންގައި ކޮންޓްރޯލާ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދާއި ޑެޕިއުޓީ ކޮންޓްރޯލާ، އަހުމަދު އަޝްފާން ވެސް ބައިވެރިވެވަޑައިގެންފައިވާކަަމަށް އިމިގްރޭޝަނުން ވަނީ ފާހަގަކޮށްފައެވެ.
އިމިގްރޭޝަނުން ވަނީ އިއްޔެ ވެސް މާރުކޭޓް ސަރަހައްދުގައި ނުގަވައިދުން އުޅޭ ބިދޭސީން ގިނަކަމަށް މައުލޫމާތު ލިބުމުން އެ ސަރަހައްދުގައި ހަރަކާތްތެރިވި 148 ބިދޭސީއަކު ބަލައި ފާސްކޮށް، ގަވާއިދާ ޚިލާފަށް އުޅުނު ބިދޭސީ 22 ފިރިހެނަކާއި، ބިދޭސީ އަންހެނަކު އިމިގްރޭޝަންގެ ބެލުމުގެ ދަށަށް ގެންގޮސްފައެވެ.
މީގެ ކުރިން ވެސް އިމިގްރޭޝަނުން މަސް މާރުކޭޓު ސަރަހައްދު ބަލައި، ގަވައިދާ ޚިލާފަށް އުޅެމުން ދިޔަ ބިދޭސީންތަކެއް އަތުލައިގަނެފައިވެއެވެ.
މާލޭ ސަރަހައްދުގެ މާރުކޭޓު ގޮޅިތަކުގައި ވިޔަފާރިކުރަން ބިދޭސީން ތިބުމުގެ މައްސަލައަކީ މީގެ ކުރިން ވެސް އިމިގްރޭޝަންގެ ސަމާލުކަމަށް އައިސް، ފިޔަވަޅު އަޅައިފައިވާ މައްސަލައެކެވެ. އެ ކަމުގެ ޝަކުވާ ދިވެހީން ވެސް ކުރެއެވެ.