ވިސާ ނެތި ރާއްޖޭގައި ވަޒަންވެރިވެ އުޅެމުންދާ ފްރާންސަށް ނިސްބަތްވާ އާއިލާ ފުރުވާލަން ބޭނުންވާ ޓްރެވަލް ޑޮކިއުމަންޓް އަދިވެސް ނުލިބޭ ކަމަށް އިމިގްރޭޝަނުން ބުނެފިއެވެ.
މިއީ ތ. ވޭމަންޑޫގައި އުޅޭ ހަ މެންބަރުންގެ އާއިލާއެކެވެ.
އިމިގްރޭޝަންގެ ގާނޫނާޚިލާފަށް އެ އާއިލާ ރާއްޖޭގައި ދިރިއުޅެމުންދާކަމުގެ މައުލޫމާތު 'އިމިގްރޭޝަން ވޮޗް'އަށް ލިބުނީ ޖުލައި 18ވަނަ ދުވަހެވެ. އިމިގްރޭޝަނުން ވަނީ އެ މައްސަލަ ބެލުމަށް ފަހު އޮކްޓޯބަރު 23 ވަނަ ދުވަހު އެ މައްސަލައިގައި ހިމެނޭ އިސްފަރާތް އެ އިދާރާއަށް ހާޒިރުކޮށްފައެވެ.
އިމިގްރޭޝަންގެ ކޮންޓްރޯލާ ޖެނެރަލް މުހައްމަދު ޝައްމާން ވަހީދު މީގެ ކުރިން ވިދާޅުވީ، އެ އާއިލާގެ ޕާސްޕޯޓުގެ މުއްދަތު ހަމަވެފައިވާތީ، އެ އާއިލާ ރާއްޖެއިން ފުރުވާލަން ބޭނުންވާ ޓްރެވަލް ޑޮކިއުމަންޓު ހޯދުމުގެ މަސައްކަތް ފޮރިން މިނިސްޓްރީއާ ގުޅިގެން ކުރަމުންދާ ކަމަށެވެ. އެ އާއިލާގެ ޓްރެވަލް ޑޮކިއުމަންޓް ލިބުނުހާ އަވަހަކަށް ފުރުވާލުމަށް ހަމަޖެހިފައިވާ ކަމަށާއި އިމިގްރޭޝަން ގާނޫނީ ޚިލާފަށް ދިވެހިރާއްޖޭގައި އުޅުމަށް އެއްވެސް ބަޔަކަށް ފުރުސަތެއް ނުދެވޭނެ ކަމަށް ޝައްމާން ވިދާޅުވިއެވެ.
އެ ކަމާ ގުޅިގެން "ސަން" އިން ސުވާލުކުރުމުން އިމިގްރޭޝަނުން ބުނީ، އެ އާއިލާގެ ޕާސްޕޯޓު ހެއްދުމަށް ފޮރިން މިނިސްޓްރީ މެދުވެރިކޮށް މިހާރު ރިކުއެސްޓްކޮށްފައިވާ ކަމަށެވެ. ޓްރެވެލް ޑޮކިއުމަންޓް އިމިގްރޭޝަނަށް ނުލިބޭ ކަމަށް ވެސް އިމިގްރޭޝަނުން ބުންޏެވެ.
އިމިގްރޭޝަނުން މީގެ ކުރިން ބުނީ، އެ އާއިލާއިން އެދުނީ ރަށްވެހިކަން ދިނުމަށް ކަމަށެވެ.
ނަމަވެސް، ރާއްޖެއިން ބޭރުގެ ބަޔަކަށް ރާއްޖޭގެ ރަށްވެހިކަން ނުދޭނެ ކަމަށާއި ވަކިން ޚާއްސަކޮށް ދިވެއްސަކާ ކައިވެނިކޮށްގެން އުޅޭ ބޭރު މީހަކަށް ވެސް ރަށްވެހިކަން ރާއްޖޭގައި ނުދޭނެކަން އިމިގްރޭޝަނުން ބުންޏެވެ.
"ސަން"އަށް މައުލޫމާތުދެއްވަމުން ވޭމަންޑޫ ކައުންސިލްގެ ރައީސް ރަޝްވާން އާދަމް މީގެ ކުރިން ވިދާޅުވީ، ތިން ކުޑަކުދިން ހިމެނޭ އެ އާއިލާ ރާއްޖޭގައި އުޅޭތާ މިހާރު 12 ވަރަކަށް އަހަރު ވެދާނެ ކަމަށެވެ. ވޭމަންޑޫގައި އެ އާއިލާ ވަޒަންވެރިވެ އުޅޭތާ ގާތްގަނޑަކަށް ހަ އަހަރު ވާނެ ކަމަށް އޭނާ ވިދާޅުވިއެވެ.
އެ އާއިލާއިން ރާއްޖޭގައި އުޅެމުން އާމްދަނީ ހޯދަނީ މަސްވެރިކަން ކޮށްގެންނެވެ.
ރަޝްވާން ވިދާޅުވީ، ވިސާ ނެތި އެ އާއިލާ އުޅޭކަން އެނގުނު ހިސާބުން ފެށިގެން ކަމާ ގުޅުންހުރި އިދާރާތަކަށް އަންގާ، އެ އާއިލާ ގަވާއިދުގެ ތެރެއަށް ވައްދަން މަސައްކަތްކޮށްފައިވާނެ ކަމަށެވެ.