މިދިޔަ ސަރުކާރުން، މާލެ ރައްޔިތުންނަށް ދިން ބިންތަކުގެ ތެރެއިން އާބަންކޯގެ އިހްތިސާސްގައި ހިމެނޭ ބިންތަކުގެ ބަދަލުގައި އާބަންކޯއަށް މާލެ އަތޮޅުން ދެފަޅާއި ފައިސާ ދިނުމަށް ސަރުކާރުން ނިންމައިފައިވާ ކަމަށް އާބަންކޯގެ މެނޭޖިން ޑިރެކްޓަރު ފަޒުލް ރަޝީދު މިއަދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ، ބަންޑާރަ ގޯތީގެ ބަދަލުގެ އެއްބައިގެ ގޮތުގައި އެ ކުންފުންޏަށް މިހާރު ދެ ފަޅު ދީފައިވާ ކަމަށެވެ.
"އެ ލެގޫންތަކަކީ އޭގެ އެއްބައި. އަދި އެބަހުރި ކޭޝް ޕޭމަންޓްތަކެއް ކުރިއަށް އޮތްތާގައި ސަރުކާރުން ދައްކަން ޖެހޭ،" ފަޒުލް ވިދާޅުވިއެވެ.
ފަޒުލް ވިދާޅުވީ އެ ކުންފުނިން މަސައްކަތް ކުރަނީ ފައިސާގެ ބަދަލެއްގެ ގޮތުގައި 7.7 މިލިއަނާއި 7.9 މިލިއަން ރުފިޔާއާ ދެމެދުގެ މިންވަރެއް ހޯދަން ކަމަށާއި އެކަމާ ގުޅުން ހުރި މަޝްވަރާތައް ކުރަމުން އަންނަ ކަމަށެވެ.
ކުރީ ސަރުކާރުގެ 'ބިންވެރިޔާ ސްކީމް' އާއި 'ގެދޮރުވެރިޔާ ސްކީމް'ގެ ދަށުން ހުޅުމާލެއާއި މަދުވެގެން 1000 ގޯއްޗާއި ގުޅީފަޅުން މަދުވެގެން 2000 ގޯއްޗާއި ގިރާވަރު ފަޅު ހިއްކައިގެން ވެސް މަދުވެގެން 2000 ގޯތި މާލޭ ރަށްވެހިންނަށް ދޭން އޭރުގެ ރައީސް އިބްރާހީމް މުޙައްމަދު ޞާލިޙް ނިންމަވާފައިވެއެވެ.
މީގެ އިތުރުން ރިޔާސީ އިންތިޚާބު ތެރޭގައި ޞާލިޙް ވަނީ، ބިންވެރިޔާ ސްކީމާއި ގެދޮރުވެރިޔާ ސްކީމްގެ ދެވަނަ ބުރެއް އިއުލާން ކުރައްވައި، 4000އަށް ވުރެ ގިނަ ގޯއްޗާއި 8،000 ފްލެޓް ދޭން ނިންމަވައިފައެވެ. އެ ގޯއްޗާއި ފްލެޓް ދޫކުރުމަށް ނިންމާފައި އޮތީ އުތުރު ތިލަފަޅުންނެވެ.
ބިންވެރިޔާ ސްކީމްގެ ދާއިމީ ލިސްޓު ކުރީގެ ހައުސިން މިނިސްޓްރީން ނެރުނުއިރު 19،865 މީހުންގެ ޝަރުތު ހަމަވާ ކަމަށް ކަނޑައަޅާފައި އޮތެވެ.