"އަޅުގަނޑުމެން ގާއިމުކުރާ ސަރުކާރެއް، ރައްޔިތުންގެ ތާއިދާއެކީގައި ގާއިމްކުރާ ސަރުކާރެއް، އެ ސަރުކާރެއްގެ މޮޓޯއަކަށް ވާނީ ގެދޮރުވެރިކަމަކީ ކޮންމެ ރައްޔިތެއްގެ އަސާސީ ހައްގެއް ކަމަށް ބުނާ ސަރުކާރަކަށް. އެ ސަރުކާރުގެ ފަސް އަހަރު ނިމޭއިރުގައި އިރާދަކުރެއްވިއްޔާ މި ގައުމުގައި ގެދޮރުވެރިކަން ނުލިބޭ ރައްޔިތަކު ނުހުންނާނެ،"
އެއީ ރައީސް ޑރ. މުޙައްމަދު މުއިއްޒު ރިޔާސީ ރޭހަށް ނުކުމެވަޑައިގަތުމަށް ފަހު އެންމެ ފުރަތަމަ ރައްޔިތުންނާ ބައްދަލުކުރައްވައި ދެއްކެވި ވާހަފުޅުތަކުގެ ތެރެއިން ވިދާޅުވި ބަސްފުޅެކެވެ. މި ސަރުކާރުގެ ހައުސިން މިނިސްޓްރީ ޑރ. ޢަލީ ހައިދަރު އަޙުމަދު އިސްކޮށް ހުންނަވާ ގޮތަށް އެކުލަވައިލެއްވީ އެފަދަ ބޮޑު ވައުދުފުޅެއް ކޮނޑުގައި އަޅުއްވައިފައެވެ.
މި ސަރުކާރަށް މިއަދު އެއް އަހަރުވީއިރު، ޑރ. ހައިދަރު ދެއްވާ ޔަގީން ކަމަކީ ހައުސިން މިނިސްޓްރީން އޮތީ ރައީސްގެ ވައުދުފުޅު ހަގީގަތަކަށް ހެދުމަށް މަސައްކަތް ފަށައިފައި ކަމެވެ. ނަމަވެސް މިހާރު އިދިކޮޅުގައި އޮތް އެމްޑީޕީގެ ސަރުކާރު ނިމުނުއިރު އަމަލުކޮށްފައިވާ ގޮތުން ވާރުތަވި ގޮންޖެހުންތައް ގިނަ ކަމަށް އޭނާ ވިދާޅުވިއެވެ.
އޭގެ ތެރޭގައި، މި އަހަރު ފަށަން ޖެހޭ މަޝްރޫއުތަކަށް ބަޖެޓުގައި މާ މަދުން ފައިސާ ކަނޑައަޅައިފައި ހުރުމާއި، ކުރިން ފަށާފައި ހުރި މަޝްރޫއުތަކުގެ ކޮންޓްރެކްޓަރުންނަށް ފައިސާ ނުދީ ހުރުން އޭނާ ފާހަގަކުރެއްވިއެވެ.
މި ވެރިކަމަށް އެންމެ ބޮޑަށް ފާޑުކިޔުން އަމާޒުވެފައިވާ އެއް މައްސަލަ ކަމަށްވާ، ކުރީ ސަރުކާރުގެ ގެދޮރުވެރިޔާ ސްކީމްގެ ދަށުން ދޫކުރަން ނިންމައިފައިވާ ގޯއްޗާއި ފުލެޓުތައް ހަވާލުނުކުރެވެނީ ވެސް އެއިރު އަމަލުކޮށްފައި އޮތް ގޮތުން ކަމަށް ހައިދަރު ވިދާޅުވިއެވެ. އެގޮތުން ގިރާވަރުފަޅާއި ގުޅީފަޅުން ވެސް އެކަށީގެންނުވާ މިންވަރަކަށް ގޯތި ދޫކޮށްފައި ހުރުމާއި ހުޅުމާލެއިން ގޯތި ދޫކުރިއިރު ފެނާއި ކަރަންޓު ފަދަ ޚިދުމަތްތައް ދޭ ހޮޅިތަކާއި ކޭބަލްތައް މަތިން ދީފައި ހުރުން އޭނާ ފާހަގަކުރެއްވިއެވެ.
ބިންވެރިޔާސް ސްކީމްގެ ގޯތި ދޫކުރާ ސަރަހައްދެއް: މަގުތަކާއި ކަރަންޓު ވިއުގަ ވެސް ގޯތި ތެރެއިން ދާ ގޮތަށް ދީފައިވާ ކަމަށް އެޗްޑީސީން ބުނޭ -- ފޮޓޯ/ އެޗްޑީސީ
އެހެންނަމަވެސް، ހުޅުމާލެއިން ގޯތިތައް ދީ، ގުޅީފަޅުން ގިރާވަރުފަޅުން ރަޖިސްޓްރީތައް ހަވާލުކޮށް، ގެދޮރުވެރިޔާ ސްކީމްގެ ދަށުން މިހާރު މި ސަރުކާރަށް ކުރެވެން ހުރި މަސައްކަތްތައް ކޮށްފައިވާ ކަމަށް ހައިދަރު ވިދާޅުވިއެވެ.
ފުލެޓުގެ މައްސަލައަށް ބަލާއިރު، އެންޓި ކޮރަޕްޝަން ކޮމިޝަން (އޭސީސީ)ން މައްސަލަ ބަލައި، މި އަހަރުގެ ފެބްރުއަރީ މަހާ ހަމައަށް ވެސް މިނިސްޓްރީއަށް އެއާ ގުޅުން ހުރި މަސައްކަތްތައް ނުކުރެވޭ ގޮތަށް އޮތް ކަމަށް އޭނާ ވިދާޅުވިއެވެ.
އޭސީސީއަށް ފާހަގަކުރެވުނު މައްސަލަތަކުގެ ތެރޭގައި، ފުލެޓް ލިބުނު މީހުން 15 އަހަރު ވަންދެން މާލޭގައި އުޅެފައިވާކަން ކަށަވަރު ކުރުމުގެ ލިޔުންތަކާއި ސުންގަނޑި ހަމަވުމުން ހުށަހެޅުމުން ވެސް ބަލައިގަތް ލިޔުންތަކުގެ މައްސަލަތައް ހިމެނެއެވެ.
އެ މައްސަލަތަކާ ގުޅޭ ގޮތުން ގޮތް ނިންމަން ހައުސިން މިނިސްޓްރީއާ ހަވާލުކުރުމުން، ފުލެޓު ލިސްޓު މުރާޖާ ކުރަން ކޮމިޓީއެއް އެކުލަވައިލީއެވެ. އެ ކޮމިޓީން ބަލައި، ލިސްޓު އާންމުކުރަން އެންމެ ފަހުން ދިން ތާރީޚަކީ އިއްޔެ ކަމަށްވާއިރު، އެ ތާރީޚަށް ވެސް މަސައްކަތްތައް ނުނިމި މިހާރު ފުލެޓު ލިބޭ ފަރާތްތައް ކަށަވަރު ވާނެ ދުވަހެއް އޮތީ ނޭނގިފައެވެ.
ހައިދަރު ވިދާޅުވީ އެ ގޮންޖެހުންތައް ކުރިމަތިވި ނަމަވެސް، މިނިސްޓްރީއަށް ކުރެވެން ހުރި ކަންތައްތައް ކުރި ކަމަށެވެ.
"އެހެންނަމަވެސް އަޅުގަނޑުމެން ހިތްވަރު އެލުވައެއް ނުލަން. އަޅުގަނޑުމެން މަސައްކަތް ކުރީ ބަޖެޓު ނެތަސް އަޅުގަނޑުމެންނަށް ކުރެވިދާނެ ކަންތައްތަކަކީ ކޮބައިތޯ ބަލައިގެން އެކަންތަކަށް ފޯކަސް ކޮށްގެން އަޅުގަނޑުމެން މަސައްކަތް ކުރީ،" ހައިދަރު ވިދާޅުވިއެވެ.
ރައީސް ޑރ. މުޙައްމަދު މުއިއްޒާއި މިނިސްޓަރު ޑރ. ޢަލީ ހައިދަރު އަޙުމަދު -- ފޮޓޯ/ ރައީސް އޮފީސް
އޭގެ ތެރެއިން އެންމެ ބޮޑު ކަމަކަށް އޭނާ ފާހަގަކުރެއްވީ ބޯހިޔާވަހިކަމާ ގުޅުންހުރި ބައެއް ގާނޫނުތަކާއި ގަވައިދުތަކަށް ބަދަލު ގެންނަން މަސައްކަތްތައް ކުރުމެވެ. އެ މަސައްކަތްތަކުގައި ފުރަތަމަ ހުރަހަކަށްވީ އިދިކޮޅު ޕާޓީގެ އަޣުލަބިއްޔަތު އޮތް 19 ވަނަ މަޖިލީހެވެ. ނަމަވެސް މި އަހަރު ފެށި، މި ސަރުކާރުގެ ސުޕަ މެޖޯރިޓީ އޮތް މަޖިލީހާއެކު އެ ބިލްތަކުގެ މަސައްކަތްތައް ކުރިއަށްދާކަން ހައިދަރު ފާހަގަކުރެއްވިއެވެ.
އޭގެ އިތުރުން މިނިސްޓްރީގެ ކާމިޔާބީތަކުގެ ތެރޭގައި ފާހަގަކުރެއްވީ ކަންތައްތަކަކީ:
- ރަށްރަށުގައި އަސާސީ ބޯހިޔާވަހިކަމަށް ދޫކޮށްފައިވާ ފުލެޓާއި ރޯހައުސްތަކުގެ ކުލި 3،333 ރުފިޔާއަށް ކުޑަކުރުން
- ހިޔާ ފުލެޓާއި ވިނަރެސްގެ ކުލި ހަތް އަހަރަށް ކުޑަކުރުން
- ފަސް ޕަސެންޓުގެ އިންޓަރެސްޓަށް ވުރެ ބޮޑު ނޫން އިންޓަރެސްޓު ރޭޓުގައި ބޯހިޔާވަހިކަމަށް ގެދޮރު އިމާރާތްކުރުމަށް ލޯން ދޭ ސްކީމެއް ތައާރަފުކުރުން
"އެކަހަލަ ބައިވަރު ކަންތައްތައް އަޅުގަނޑުމެންނަށް ކުރެވުނު، ބޯހިޔާވަހިކަމުގެ ލުއިފަސޭހަކަން ރައްޔިތުންނަށް ފޯރުކޮށްދިނުމަށް ޓަކައި. އެހެންނަމަވެސް ބަޖެޓުގެ ތާށިކަން ހުރީމައި އަޅުގަނޑުމެންނަކަށް ނެތް އައު މަޝްރޫއެއް ފެށިފައެއް. އަޅުގަނޑު ހިތުން މިއަންނަ އަހަރު ރައީސުލްޖުމްހޫރިއްޔާ ކަނޑައަޅުއްވާފައި އެއޮތް ބަޖެޓުން ވަރަށް ގިނަ އާ މަޝްރޫއުތައް ފެށިގެން ދާނެ،" ހައިދަރު ވިދާޅުވިއެވެ.
މި އަހަރުގެ މަސައްކަތްތައް ދިޔަ ސްޕީޑާ ދޭތެރޭގައި މުޅިއަކުން ހިތްހަމަނުޖެހުނު ނަމަވެސް، ކުރިއަށް އޮތް އަހަރުތަކުގައި ބޯހިޔާވަހިކަން ފޯރުކޮށްދިނުމަށް މި އަހަރު ބިންގާ އެޅިފައިވާ ކަމަށް އޭނާ ގަބޫލުކުރައްވައެވެ.
މި ދައުރުގައި 85،000 ހައުސިން ޔުނިޓް އެޅުމަށް ކަނޑައަޅައިފައިވާ އަމާޒާއި އާބާދީއާއި ތަރައްގީ އެއްފަސް ކުރުމުގެ މަސައްކަތްތަކުން ދިގު މުއްދަތެއްގައި ވަރަށް ގިނަ ފަސޭހަތައް ލިބޭނެ މަސައްކަތްތަކުގެ ހައިދަރު ސިފަކުރެއްވިއެވެ.
"އަޅުގަނޑު ދެކޭ ގޮތުގައި ދިވެހިރާއްޖޭގެ ބޯހިޔާވަހިކަމާއި ދިރިއުޅުމުގެ ފެންވަރު މަތިކުރުމަށް ކުރިއަށް އޮތް ދުވަސްތަކަކީ އުޖާލާ ދުވަސްތަކަކަށްވާނެ،" އޭނާ ވިދާޅުވިއެވެ.