މެންޗެސްޓާ ސިޓީގެ ތަރި ކެވިން ޑި ބްރޭނާ، ބެލްޖިއަމްގައި ދިރިއުޅޭ ގެ ފަޅާލައި، ގަހަނާތަކެއް ވަގަށް ނަގައިފިއެވެ.
ބެލްޖިއަމްގެ ހުންނަ ޑި ބްރޭނާގެ ގެ ފަޅާލައި، ވައްކަންކޮށްފައިވާ ވަގުތު އެ ގޭގައި އެއްވެސް މީހަކު ނޫޅެއެވެ. ޑި ބްރޭނާ ވެސް މި ވަގުތު ހުރީ ކްލަބު ވޯލްޑް ކަޕްގެ ސެމީ ފައިނަލުގައި އުރާވާ ރެޑްސްއާ ދެކޮޅަށް ނުކުތުމަށް ސައުދީ އަރަބިއާގައެވެ.
ތަހުގީގަކަށްފަހު ލިމްބާގް ޕަބްލިކް ޕްރޮސިކިއުޓާ އޮފީހުން ބުނީ، އެ ގެއަށް ވައްކަން ކުރަން ވަން މީހުންވަނީ ގިނަ އެއްޗެހި އެކި ތަންތަނަށް އުކައިލާފައި ކަމަށެވެ. އެ މައްސަލައިގެ ރިޕޯޓުކޮށްފައިވަނީ ޑި ބްރޭނާގެ އަންހެނުން މިޝެލް ލެކްރޮއިކްސް ކަމަށް ވެސް އޮފީހުން ބުންޏެވެ.
އަދި އެ ގެއިން ގަހަނާތަކެއް ވަގަށް ނަގާފައިވާކަން މިހާތަނަށް ބެލި ބެލުމުން އެނގިފައިވާ ކަމަށް ބުންޏެވެ.
"ތަހުގީގުގެ ކަންކަން އަދިވެސް ދަނީ ކުރިއަށް. މިހާރު ފޮރެންސިކުން ވަނީ އެކަމުގެ ތަހުގީގަށް ހެކި ނަގާފައި. ތަހުގީގުގެ ތެރެއިން އެ ގެއާ ކައިރީގައި ދިރިއުޅޭ މީހުންގެ ބަޔާންތައް ވެސް ނެގިގެންދާނެ. މިހާތަނަށް އަދި އެއްވެސް މީހަކަށް ތުހުމަތުކުރެވިފައެއް ނުވޭ،" ޕްރޮސިކިއުޓާ އޮފީހުން ބުންޏެވެ.
ސީޒަންގެ ފުރަތަަމަ މެޗުގައި ޑި ބްރޭނާގެ ފަޔަށް ލިބުނު އަނިޔާއަކާ ގުޅިގެން, އޭގެ ފަހުން ކުޅުނު އެއްވެސް މެޗަކުން އޭނާ ފެނިފައެއް ނުވެފައެވެ.
ނަމަވެސް ކްލަބު ވޯލްޑް ކަޕަށް ނެގި ސިޓީގެ ސްކޮޑުގައި ޑި ބްރޭނާ ހިމަނާފައިވާއިރު، މިހާރު އޭނާ ދަނީ ޓީމާއެކު ފަރިތަކުރުންތަކުގައި ވެސް ބައިވެރިވަމުންނެވެ. އެހެންކަމުން އަނިޔާއަށްފަހު، ކްލަބު ވޯލްޑް ކަޕުން އޭނާ ފެނިދާނެ ކަމަށް ބެލެވެއެވެ.
ކްލަބު ވޯލްޑް ކަޕްގެ ސެމީގައި އުރާވާ ރެޑްސްއާ ދެކޮޅަށް ޔޫރަޕުގެ ޗެމްޕިއަން ސިޓީން ނުކުންނާނީ ރާއްޖޭގަޑިން މިރޭ 11:00 ގައެވެ.