އަބަދު ވެސް ވަޒީރުންނަށް ރުހުންދިނުމާއި އިދާރާތަކުގެ އޮނިގަނޑުގެ މަސައްކަތް ކުރަނީ ވަކިވަކިން ކަމަށް ސަރުކާރުގެ އިސް ތަރުޖަމާނު މުހައްމަދު ޝަހީބު މިއަދު ވިދާޅުވެއްޖެއެވެ.
ވަޒީރުންނަށް ރުހުން ހޯދަން ހުށަހެޅިއިރުގައި ވުޒާރާތަކުގެ މަސްއޫލިއްޔަތާއި ޒިންމާތައް ބަޔާންކޮށްފައިނުވާ ކަމަށާއި އަދި، މަޖިލީހުން ނިންމަންވީ ގޮތެއް ވެސް ކޮމިޓީން ނިންމާފައިނުވާ ކަމަށް ބުނެ، ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވަނީ އެ މައްސަލަ އަނބުރާ ކޮމިޓީއަށް ފޮނުވައިލަން ނިންމައިފައެވެ. އެހެންވެ، ވަޒީރުންނަށް ރުހުންދިނުމުގެ މަސައްކަތް އަނެއްކާ ވެސް ފަސްވާނެއެވެ.
އެ ކަމާ ގުޅިގެން "ސަން"އިން ކުރި ސުވާލަކަށް ޖަވާބުދެއްވަމުން ޝަހީބު ވިދާޅުވީ، މަޖިލީހުގައި ކުރިއަށްދާ ކަންކަމަށް އެއްޗެއް ވިދާޅުވާން ބޭނުންފުޅުނުވާ ކަމަށެވެ.
އެކަމަކު، ވަޒީރުންނަށް ރުހުންދިނުމާއި އޮނިގަނޑުގެ މަސައްކަތް 2008 ވަނަ އަހަރުން ފެށިގެން ވެސް ކުރަމުން އަންނަނީ ވަކިވަކިން ކަމަށް އޭނާ ވިދާޅުވިއެވެ. އޮނިގަނޑުގެ މަސައްކަތް ވެސް ކުރިއަށްދާ ކަމަށް އޭނާ ވިދާޅުވިއެވެ.
"އިދާރާތަކުގެ އޮނިގަނޑުގެ މަސައްކަތް ދަނީ ހިނގަމުން. 2008 އިން ފެށިގެން މިހާތަނަށް ވެސް، ވަޒީރުންނަށް ރުހުން ދިނުމަށް ހުށަހެޅުމާއި އިދާރާތަކުގެ އޮނިގަނޑު ފާސްކުރަން ހުށަހަޅަމުން އައީ ވަކިވަކިން،" ޝަހީބު ވިދާޅުވިއެވެ.
މިއަދު އޮތް މަޖިލީހުގެ ތިންވަނަ ދައުރުގެ ފަހު ޖަލްސާއަށް ވަނީ ވަޒީރުންނަށް ރުހުންދިނުން އެޖެންޑާކޮށްފައެވެ.
އެކަމަކު، މިއަދުގެ ޖަލްސާގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް އެޖެންޑާ އިއުލާނުކުރެއްވުމާ އެކު ތުޅާދޫ ދާއިރާގެ މެންބަރު ހިސާން ހުސައިން ވަނީ ނިޒާމީ ނުކުތާއެއް ނަންގަވައި، ވަޒީރުންނަށް ރުހުންދިނުމާ މެދު ކޮމިޓީން ނިންމިގޮތުގެ ރިޕޯޓު ފުރިހަމަނުވާކަން ފާހަގަކުރައްވައިފައެވެ. އޭނާ ވިދާޅުވި، އެހެންވެ މިއަދު ވަޒީރުންނަށް ރުހުންދިނުމާ މެދު ވޯޓަށް އެހިދާނެ ކަމަށް ގަބޫލުނުކުރައްވާ ކަމަށެވެ.
އެހެންވެ، އަސްލަމް ވަނީ އެ ނިޒާމީ ނުކުތާ ބަލައިގެންފައެވެ. އަދި، އެ ނުކުތާއާ ގުޅިގެން މަޖިލީހުގެ މައިނޯރިޓީ ލީޑަރާއި މެޖޯރިޓީ ލީޑަރާ އެކު މަޝްވަރާ ކުރައްވައިފައެވެ.
މަޝްވަރާއަަށް ފަހު އަސްލަމް ވިދާޅުވީ، މަޖިލީހުގެ ކޮމިޓީން ރިޕޯޓު އެކުލަވައިލެވިފައިވަނީ މަޖިލީހުގެ ގަވާއިދުގެ 200 ވަނަ މާއްދާގެ ރ ގައި ބަޔާންކުރާ ކަންކަން ފުރިހަމަނުކޮށް ކަމަށެވެ. އެހެންވެ، އެ މަނިކުފާނު ނިންމެވީ އެ މައްސަލަ އަނބުރާ ކޮމިޓީއަށް ފޮނުވައިލާށެވެ.
އެ ނިންމުމާ ގުޅިގެން ސަރުކާރު މެންބަރުން ވަނީ ނުރުހުން ފާޅުކުރައްވައިފައެވެ.