ޗެލްސީގެ ނަތީޖާތައް ގޯސްވި ނަމަވެސް، ވަޒީފާ ގެއްލިދާނެތީ އެކަމާ ބިރުވެރިކަމެއް ނެތް ކަމަށް އެ ކްލަބުގެ ކޯޗު މައުރީސިއޯ ޕޮޗެޓީނޯ ބުނެފިއެވެ.
ޗެލްސީގެ އެޓޭކިން ކުޅުމަށް ކުރިއެރުންތަކެއް ލިބިފައިވީ ނަމަވެސް، ނަތީޖާ ނެރުމަށް އެ ޓީމަށް ވަނީ އުނދަގޫތަކަކާ ކުރިމަތިލާން ޖެހިފައެވެ. މި ސީޒަނުގެ މިހާތަނަށް އިނގިރޭސި ޕްރިމިއާ ލީގުގައި ކުޅުނު 16 މެޗުގެ ތެރެއިން ޗެލްސީ މޮޅުވެފައިވަނީ އެންމެ ފަސް މެޗުންނެވެ. މިވަގުތު ޗެލްސީ އޮތީ 19 ޕޮއިންޓާ އެކު ލީގު ތާވަލުގެ 12 ވަނައިގައެވެ.
ނޫސްވެރިންނާ ވާހަކަދައްކަމުން ޕޮޗެޓީނޯ ބުނީ މީހަކު އޭނާއާ ދެކޮޅަށް އެއްޗެކޭ ބުނަންދެން އިތުބާރު އޮންނާނެ ކަމަށް ޔަގީންކުރާނެ ކަމަށާއި ޓޮޓެންހަމް ހޮޓްސްޕާގައި މަސައްކަތްކުރި އިރުވެސް ކްލަބުގެ ވެރިންނަށް އިތުބާރުކޮށްފައިވާނެ ކަމަށެވެ.
"އަހަރެންނަށް އެނގޭ ފުޓުބޯޅަ. އަހަރެން ޗެލްސީއާ ގުޅުނީ އިތުބާރު އޮތީމަ. ކްލަބުން އެ އިތުބާރު ކުރާ ނަމަ، އަހަރެންގެ އިތުބާރު ވެސް ލިބޭނެ. ވަޒީފާ ގެއްލިދާނެތީ ބިރެއް ނުގަންނަން،" ޕޮޗެޓީނޯ ބުންޏެވެ.
ޗެލްސީގެ އާ މެނޭޖްމަންޓުން ކްލަބާ ހަވާލުވުމަށްފަހު، ކުޅުންތެރިން ހޯދުމަށް ވަނީ 435 މިލިއަން ޕައުންޑް (552 މިލިއަން ޑޮލަރު) ހަރަދުކޮށްފައެވެ. ބޮޑު ހަރަދަކާ އެކު ވެސް ނަތީޖާތައް ގޯސްވުމުން، އެކަމުގެ ގިނަ ފާޑުކިޔުންތަކެއް ޗެލްސީގެ ވެރިންނަށާއި ކޯޗު ޕޮޗެޓީނޯއަށް ދަނީ އަމާޒުވަމުންނެވެ.