ރެއާލް މެޑްރިޑުން ކްރޮއޭޝިއާ މިޑްފީލްޑަރު ލޫކާ މޮޑްރިޗަށް އިތުރު ކޮންޓްރެކްޓެއް ހުށަނާޅާނެކަން އަންގާފައިވާ ކަމަށް ރިޕޯޓުކޮށްފިއެވެ.
ރިޕޯޓުތައް ބުނާގޮތުގައި ރެއާލުން މިހާރު ވަނީ 12 އަހަރަށްފަހު، މޮޑްރިޗްއާ އަލްވަދާއު ކިޔުމަށް ތައްޔާރުވެފައެވެ. މޮޑްރިޗާއި ރެއާލްއާ ދެމެދު މަޝްވަރާކުރުމަށްފަހު، މިސީޒަން ނިމުމާއެކު އޭނާ ހިލޭ ޓްރާންސްފާއެއްގެ ދަށުން ދޫކޮށްލުމަށް ނިންމާފައިވާ ކަމަށް ރިޕޯޓުތައް ބުނެއެވެ.
ފުޓުބޯޅަ ތާރީޚުގައި އުފެދުނު އެންމެ މޮޅު މިޑްފީލްޑަރުންގެ ތެރޭގައި ހިމެނޭ މޮޑްރިޗަށް މިސީޒަނުގައި ވަނީ ރެއާލުން ގިނަ ފުރުސަތުތައް ލިބޭ ގޮތް ނުވެފައެވެ. އޭނާގެ ބަދަލުގައި މިޑްފީލްޑަރުންގެ ތެރެއިން ކޯޗު ކާލޯ އެންޗެލޮޓީ އެންމެ އިސްކަމެއް ދެނީ މިސީޒަނުގައި އެ ކްލަބާ ގުޅުނު އިނގިރޭސި މިޑްފީލްޑަރު ޖޫޑް ބެލިންހަމްއަށެވެ. އެކަމާ ގުޅިގެން މޮޑްރިޗް ކްލަބު ދޫކޮށްލަން ބޭނުންވެފައި ހުރި ކަމަށް ވެސް މީގެ ކުރިން ރިޕޯޓުކޮށްފައިވެއެވެ.
އުމުރުން 38 އަހަރުގެ މޮޑްރިޗް އެންމެ ފާހަގަކޮށްލެވެނީ އާޖެންޓީނާ ތަރި ލިއޮނެލް މެސީ އާއި ޕޯޗުގަލް ތަރި ކްރިސްޓިއާނޯ ރޮނާލްޑޯ ހޯދަމުންދިޔަ ބެލޮންޑިއޯ އެވޯޑަށް މެދުކެނޑުމެއް ގެނައި ފުރަތަމަ ކުޅުންތެރިޔާއަށެވެ. ބެލޮންޑިއޯ އެވޯޑު 2008 އިން ފެށިގެން މެދުކެނޑުމެއްނެތި މެސީ ނުވަތަ ރޮނާލްޑޯ ހޯދަމުންދިޔަ ނަމަވެސް، 2018 ވަނަ އަހަރު އެ އެވޯޑު ހޯދީ މޮޑްރިޗެވެ.
ޓޮޓެންހަމް ހޮޓްސްޕާއަށް ކުޅުމަށް ފަހު، ރެއާލްއާ މޮޑްރިޗް ގުޅުނީ 2012 ވަނަ އަހަރުއެވެ. އެއަށް ފަހު އޭނާ ރެއާލާ އެކު 20 ތަށި ހޯދާފައިވާ އިރު، އޭގެ ތެރޭގައި ފަސް ޗެމްޕިއަންސް ލީގު ހިމެނެއެވެ.