އެމްޑީޕީއަށް ފަސޭހައިން ރައީސް އަޒުލުކުރެވޭ ގޮތަށް އިސްލާހެއް

ސަރުކާރާ އިދިކޮޅު އެމްޑީޕީގެ މެންބަރުންނަށް އެކަނި ވެސް ރައީސާއި ނައިބު ރައީސް އަޒުލް ކުރެވޭގޮތައް ގަވާއިދަށް އިސްލާހު ގެނައުމަށް ރައްޔިތުންގެ މަޖިލީހުގެ އާންމު ކޮމިޓީން އިއްޔެ ނިންމައިފިއެވެ.

ކޮމިޓީން ނިންމާފައި ވަނީ، މަޖިލީހުގެ ގަވާއިދުގެ 49، 202 އަދި 203 ވަނަ މާއްދާއަށް އިސްލާހު ގެނައުމަށެވެ.

ގަވާއިދުގެ 49 ވަނަ މައްދައަށް ބަދަލު ގެންނަން ހުށަހެޅީ މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއުއެވެ. އެ މާއްދާއަށް ޝިފާއު އިސްލާހެއް ހުށަހެޅުއްވީ މަޖިލީހުގެ މެންބަރަކު އިސްތިއުފާ ދެއްވުމުން، އިތުރު މެންބަރަކު އިންތޚާބު ކުރެވެންދެން މަޖިލީހުގެ ޖުމުލަ މެންބަރުންގެ އަދަދު ގުނާއިރުގައި އެ މެންބަރުން އުނިކުރާށެވެ.

އާ ސަރުކާރުގެ މަގާމުތަކާ ހަވާލުވާން މަޖިލީހުގެ ހަތް މެންބަރަކު ވަނީ މެންބަރުކަމުން އިސްތިއުފާ ދެއްވައިފައެވެ.

އިލެކްޝަންސް ކޮމިޝަނުން ނިންމާފައިވަނީ އެ ދާއިރާތަކަށް މި ދައުރުގައި މެންބަރުން އިންތިޚާބު ނުކުރާށެވެ. އެއީ، އަންނަ ދައުރުގެ މަޖިލީސް އިންތިޚާބު އޭޕްރީލްގައި އޮންނާނެތީއެވެ. ޝިފާއު ހުށަހެޅުއްވި އިސްލާހު މަޖިލީހުން ފާސްކޮށްފި ނަމަ، މި ދައުރުގެ ބާކީ ބައިގައި މަޖިލީހުގައި ތިއްބަވާނީ 80 މެންބަރުންނެވެ.

އަދި، 202 އަދި 203 ވަނަ މާއްދާއަށް ބަދަލު ގެންނަށް ހުށަހެޅުއްވީ މެދުހެންވޭރު ދާއިރާގެ މެންބަރު އަދި ޑިމޮކްރެޓްސްގެ ޕީޖީ ލީޑަރު އަލީ އާޒިމެވެ.

ގަވާއިދުގެ 202 އަދި 203ކަށް އިސްލާހު ގެނައުމަށް ފާސްކޮށްފައިވާ ގޮތް:

• ރައީސް ނުވަތަ ނައިބު ރައީސް މަގާމުން ވަކިކުރެވޭނީ މަޖިލީހުގެ ތިން ބައިކުޅަ އެއް ބައި މެންބަރުންގެ ސަބަބު ބަޔާންކޮށް، ސޮއިކޮށްފައިވާ ލިޔުމަކުން މަޖިލީހަށް ގަރާރެއް ހުށަހެޅުމުން (މިހާރު ވެސް އޮންނަ ގޮތް)

• ގަރާރުގެ ނޯޓިސް ދެ ދުވަހުގެ ތެރޭގައި ރައީސާއި ނައިބު ރައީސަށް ދިނުން އަދި 14 ދުވަހުގެ މުއްދަތަކަށް ފަހު އެންމެ ފުރަތަމަ ރަސްމީ ބަންދު ނޫން ދުވަހަކު ބާއްވާ ޖަލްސާއަށް ގަރާރު ހުށަހެޅުން

• ރައީސާއި ނައިބު ރައީސް މަގާމުން ވަކިކުރަން ހުށަހަޅާ ގަރާރުގެ ބަހުސަށް ގިނަވެގެން ދެވޭނީ ތިން ގަޑިއިރު

އަދި، އެ މައްސަލަ ތަޅުމުން ފާސްވުމުން ފޮނުވަން ޖެހޭ ކޮމިޓީގައި ކުރިން ތިބެން ޖެހޭ ކަމަށް ބަޔާންކުރާ 11 މެންބަރުންގެ އަދަދު ހަތަކަށް މަދުކޮށްފައެވެ. ކުރިން އޮންނަ ގޮތުން އެ ކޮމިޓީގައި ހުރިހާ ސިޔާސީ ޕާޓީތަކެއް ތަމުސީލުވާން ވެސް ޖެހެއެވެ. އެކަމަކު، އަލަށް ހުށަހެޅި އިސްލާހުން ވަނީ އެބައި އުނިކޮށްފައެވެ.

މި ގަވާއިދު އަދި މަޖިލީހުގެ ތަޅުމަށް ހުށަހަޅާފައެއް ނުވެއެވެ.

ނަމަވެސް މަޖިލީހަށް އިސްލާހު ހުށަހަޅާ ފާސްވެއްޖެ ނަމަ، މެޖޯރިޓީ ޕާޓީ އެމްޑީޕީން އެކަނި ވެސް ރައީސާއި ނައިބު ރައީސް މަގާމުން ވަކިކުރެވޭނެއެވެ.

މި ވަގުތު މަޖިލީސް ބެހިގެންވާ ގޮތް:

• އެމްޑީޕީގެ 56 މެންބަރުން
• ޑިމޮކްރެޓްސްގެ 13 މެންބަރުން
• ޕީޕީއެމްގެ ދެ މެންބަރުން
• ޕީއެންސީގެ ދެ މެންބަރުން
• ޖުމްހޫރީ ޕާޓީގެ ދެ މެންބަރުން
• އެމްޑީއޭގެ ދެ މެންބަރުން
• އަމިއްލަ ތިން މެންބަރުން

އެހެންވެ، މި އިސްލާހު މަޖިލީހުގެ ތަޅުމުން ފާސްކޮށްފި ނަމަ، ރައީސާއި ނައިބު ރައީސް އަޒުލުކުރަން ފަސޭހަވެގެންދާނެއެވެ.

ރައީސާއި ނައިބު ރައީސް މަގަމުން ވަކިކުރެވޭނެ ހާލަތްތައް:

• އިސްލާމް ދީނާ ޚިލާފުވުން
• ގާނޫނު އަސާސީއާ ޚިލާފުވުން
• ރައީސް ނުވަތަ ނައިބު ރައީސްގެ މަގާމުގައި ހުރެ ކުރަން އެކަށީގެން ނުވާ އަމަލެއް ކުރުން
• ރައީސް ނުވަތަ ނައިބު ރައީސްގެ މަސްއޫލިއްޔަތު އަދާކުރުމުގައި ނަގާބިލުވުން

މިހާތަނަށް އެއްވެސް ރައީސަކު މަޖިލީހުން އަޒުލުކޮށްފައެއް ނުވެއެވެ. އެކަމަކު، ކުރިން ޕީޕީއެމްގެ ފުރަތަމަ ވެރިކަމުގައި މަޖިލީހުން ދެ ނައިބު ރައީސަކު މަގާމުން ދުރުކުރިއެވެ.