މުދަލަށް ގެއްލުން ދިން މައްސަލައެއްގައި އައްޑޫ ސިޓީން މީހަކު ހޯދަން ފުލުހުން މިއަދު އިއުލާނުކޮށްފިއެވެ.
މިކަމާ ގުޅިގެން ފުލުހުން އާންމުކުރި ސީސީޓީވީ ފުޓޭޖުން ފެންނަ ގޮތުގައި މީހަކު ގާބުރިތަކެއް ހިފައިގެން ގެއަކަށް ވަދެއެވެ. އަދި އެ ގާބުރިތައް ބިންމަތީ ބެހެއްޓުމަށްފަހު ފަހަރަކު ގާބުރިއެއް ނަގައި ގައިގައި ހުރި ބާރެއްލާ އެއްލައެވެ. ބެލެވޭ ގޮތުގައި އޭނާ ގެއްލުންދިނީ އެ ގެއަށެވެ. ގާބުރިތައް އުކުމަށްފަހު އެމީހާ ފިލަން ދުއްވައިގަނެއެވެ.
އޭނާ ހުރީ ހެލްމެޓެއް އަޅާ މޫނު ފޮރުވައިގެންނެވެ.
ވީޑިއޯ ހިއްސާކުރުމަށްފަހު ފުލުހުން ބުނީ އެ މީހާއާ ގުޅޭ އެއްވެސް މައުލޫމާތެއް އިނގޭނަމަ އެ މައުލޫމާތެއް އައްޑޫ ސިޓީ ގަން ޕޮލިސް ސްޓޭޝަންގެ ނަންބަރު 9792058 އަށް ގުޅުއްވައި ހިއްސާކުރެއްވުން އެދޭކަމަށެވެ.
އިއްޔެ ވަނީ އައްޑޫގައި މޫނު ފޮރުވައިގެން ހުރި މީހަކު ފިހާރައަކަށް ވަދެ ސޭޓަށް ހަމަލާދޭން މަސައްކަތްކުރާ ވީޑިއޯއެއް އާންމުވެފައެވެ. އެކަމާ ގުޅިގެން ފުލުހުން ބުނީ އެ މައްސަލައިގައި 37 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ބުންޏެވެ. އަދި، އޭނާ ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި 18 ރަބަރު ޕެކެޓު އޭނާގެ އަތުން ފެނިފައިވާ ކަމަށްވެސް ފުލުހުން ވަނީ ބުނެފައެވެ.
އައްޑޫގައި މިފަހުން ވަނީ މާރާމާރީތައް އިތުރުވެފައެވެ. އެހެންކަމުން ފުލުހުން އައްޑޫގައި ހާއްސަ އޮޕަރޭޝަނެއް ވެސް ވަނީ ފަށާފައެވެ.