ރާއްޖޭގެ އިގްތިސާދު ކުރިއެރުވުމަށް ކުރެވޭނެ ކަންތައްތަކާއި އެކަންތައްތަކުގައި އދ.ގެ ތަރައްގީއާ ބެހޭ ޖަމިއްޔާ ޔޫއެންޑީޕީއަށް ވެދެވޭނެ އެހީއާ ގުޅޭ ގޮތުން މަޝްވަރާކޮށްފިއެވެ.
އިކޮނޮމިކް މިނިސްޓްރީން އެކްސްގައި މިއަދު ކުރި ޕޯސްޓެއްގައިވާ ގޮތުން، މިނިސްޓަރު މުޙައްމަދު ސައީދުގެ އަރިހަށް، ޔޫއެންޑީޕީން ރާއްޖެއަށް ކަނޑައަޅާފައި ހުންނަ ރެޕްރެޒެންޓޭޓިވް އެންރިކޯ ގަވެގްލިއާ ވަނީ ވަޑައިގެންފައެވެ.
މިނިސްޓްރީން ބުނީ، ސަރުކާރާއި ޔޫއެންޑީޕީން މިހާރު ގުޅިގެން ކުރަމުންދާ މަސައްކަތްތަކާއި މުސްތަގުބަލުގައި ކުރެވޭނެ މަސައްކަތްތަކާ ގުޅޭ ގޮތުން އެ ބައްދަލުވުމުގައި މަޝްވަރާކުރި ކަމަށެވެ.
އެ ބައްދަލުވުމާ ގުޅޭގޮތުން ގަވެގްލިއާ އެކްސްގައި ކުރެއްވި ޕޯސްޓެއްގައި ވިދާޅުވީ، މިނިސްޓަރު ސައީދުގެ ފަރާތުން ލިބިފައިވާ މުހިންމު އިރުޝާދުތަކާ އެއްގޮތަށް ޔޫއެންޑީޕީން އެކޮނޮމިކް މިނިސްޓްރީގެ މަސައްކަތްތަކަށް އެއްބާރުލުން ދޭނެކަމަށެވެ.
އިކޮނޮމިކް މިނިސްޓަރު މުޙައްމަދު ސައީދާއި، ޔޫއެންޑީޕީން ރާއްޖެއަށް ކަނޑައަޅާފައި ހުންނަ ރެޕްރެޒެންޓޭޓިވް އެންރިކޯ ގަވެގްލިއާ -- ފޮޓޯ/ ޔޫއެންޑީޕީޔޫއެންޑީޕީން ރާއްޖެއަށް ފޯރުކޮށްދޭ އެހީތެރިކަން އެންމެ ބޮޑަށް ބިނާވެފައި ވަނީ އިކޮނޮމިކް މިނިސްޓްރީއާއެކު ކުރާ މަސައްކަތަށް ކަމަށް އޭނާ ވިދާޅުވިއެވެ. އެއީ އިންވެސްޓްމެންޓްތައް އިތުރުކޮށް، ދައުލަތުގެ ބަޖެޓަށް ބުރަ ބޮޑުވާ މިންވަރު ކުޑަ ކުރުމަށް ކުރެވިދާނެ ސްޓްރެޓީޖިކް ކަންތައްތަކުގެ ލަފާ ފޯރުކޮށްދީގެން ކުރާ މަސައްކަތްތަކެއް ކަމަށް ވެސް އޭނާ ވިދާޅުވިއެވެ.
މީގެ އިތުރުން ޔޫއެންޑީޕީން ބުނީ، އެ ޖަމިއްޔާއިން އަބަދުވެސް ތާއިދުކުރަނީ ދެމެހެއްޓެނިވި ގޮތެއްގައި ރާއްޖޭގެ އިގުތިސާދު ކުރިއަރުވަން ކަމަށެވެ. އަދި އޭކަމުގައި އެންމެ ކުރިއަށް ނެރެނީ، ދިވެހިންނާއި ގުދުރަތީ ވަސީލަތްތައް ރައްކާތެރިކުރުން ކަމަށް ވެސް އެ ޖަމިއްޔާއިން ބުނެފައިވެއެވެ.
މިދިޔަ މަހު ވެރިކަމަށް އައި ސަރުކާރުން އަންނަނީ ބޭރުގެ އެކި ފަރާތްތަކާއެކު، ރާއްޖޭގެ އިގުތިސާދާއި އެހެން ދާއިރާތަކާ ގުޅޭ ގޮތުން ވެސް މަޝްވަރާ ކުރަމުންނެވެ. އެގޮތުން ރާއްޖޭގެ އިގުތިސާދު ތަރައްގީ ކުރުމަށް ކިއުބާއިން ފޯރުކޮށްދޭ އެހީތެރިކަމާ ގުޅޭ ގޮތުން ނައިބު ރައީސް ޙުސައިން މުޙައްމަދު ލަޠީފާއި ކިއުބާގެ ބޮޑުވަޒީރުގެ ނައިބު އިނޭސް މަރީއާ ޗަޕްމަން ވުއޯއު މިއަދު ވާހަކަދައްކަވާފައިވެއެވެ.
އެއީ ސްވިޒަލެންޑުގެ ޖެނީވާގައި، މިވަގުތު ހުންނެވި ނައިބު ރައީސާއި ކިއުބާގެ ބޮޑުވަޒީރުގެ ނައިބާ ދެމެދު ކުރިއަށްގެންދިޔަ މަޝްވަރާތަކެއްގެ ތެރެއިންނެވެ.
ނައިބު ރައީސް ޖެނީވާއަށް ވަޑައިގެންފައިވަނީ އިންސާނީ ހައްގުތައް ރައްކާތެރިކުރުމާބެހޭ ބައިނަލްއަގުވާމީ މުއާހަދާ "ޔުނިވާސަލް ޑިކްލަރޭޝަން އޮފް ހިއުމަން ރައިޓްސް"އަށް 75 އަހަރު ފުރުމުގެ މުނާސަބަތު ފާހަގަކުރުމަށްޓަކައި ބާއްވާ މަތީ ފަންތީގެ ހަރަކާތްތަކުގައި ބައިވެރިވެވަޑައިގަތުމަށެވެ.