އިޖުތިމާއީ އަދި އިގުތިސާދީ ދާއިރާ ފަދަ މުހިންމު ދާއިރާތައް ރާއްޖޭގައި ތަރައްގީކުރުމަށް ކިއުބާއިން އަބަދުވެސް އެއްބާރުލުން ދޭނެ ކަމަށް ކިއުބާގެ ބޮޑުވަޒީރުގެ ނައިބު އިނޭސް މަރީއާ ޗަޕްމަން ވުއޯއު ވިދާޅުވެއްޖެއެވެ.
ކިއުބާގެ ބޮޑުވަޒީރުގެ ނައިބު މިހެން ވިދާޅުވީ، ސްވިޒަލެންޑުގެ ޖެނީވާގައި ނައިބު ރައީސް ޙުސައިން މުޙައްމަދު ލަޠީފާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް އޮފީހުން ބުނީ، އެ ބައްދަލުކުރެއްވުމުގައި މައިގަނޑު ގޮތެއްގައި އަލިއަޅުވާލައްވާފައިވަނީ، އދ.ގެ ނިޒާމުގެ ތެރެއިން ދިވެހިރާއްޖެއާއި ކިއުބާއާ ދެ ގައުމުގެ ދެމެދުގައި އޮތް ގުޅުން ހަރުދަނާކުރުމުގެ މައްޗަށް ކަމަށެވެ.
އދ.ގައި ހިމެނޭ ތަރައްގީވަމުން އަންނަ ގައުމުތަކުގެ ޖަމިއްޔާ "ގްރޫޕް އޮފް 77 އެންޑް ޗައިނާ"ގެ ރިޔާސަތު މިހާރު ބަލަހައްޓަމުން އަންނަނީ ކިއުބާއިންނެވެ.
މިއަދުގެ ބައްދަލުވުމުގައި ދެ ބޭފުޅުން ވަނީ، ދެ ގައުމުގެ ދެމެދުގައި މިހާރު އޮތް ގުޅުމުގެ މައްޗަށް އަލިއަޅުވާލައްވައި، މި ގުޅުން އިތުރަށް ބަދަހިކުރެވޭނެ ދާއިރާތަކާ ގުޅޭގޮތުން ވާހަކަފުޅު ދައްކަވާފައެވެ. މިގޮތުން ފަންނީ އަދި އިގުތިސާދީ ތަރައްގީގެ ދާއިރާއިން އެއްބާރުލުން ދިނުމާއި، ތިމާވެއްޓާއި މޫސުމަށް އަންނަ ބަދަލުތަކާއި، އިންސާނީ ހައްގުތައް ރައްކާތެރިކޮށް ކުރިއަރުވާ އދ.ގެ ޖަމިއްޔާ "ހިއުމަން ރައިޓްސް ކައުންސިލް"ގައި އެއްބާރުލުން ދިނުމާ ގުޅޭގޮތުންވެސް ދެ ބޭފުޅުން މަޝްވަރާ ކުރެއްވިއެވެ.
ހަމަ އެއާއެކު މި ބައްދަލުކުރެއްވުމުގައި ނައިބު ރައީސް ވަނީ، ރާއްޖޭގެ ސިއްހީ ދާއިރާ ކުރިއެރުވުމަށް ޑޮކްޓަރުން ފޮނުވުމާއި، ސިއްހީ ދާއިރާއިން މީހުން ތަމްރީނުކުރުމުގެ ފުރުސަތުތައް ކިއުބާއިން ފަހިކޮށްދޭތީ އެކަމަށްޓަކައި ކިއުބާގެ ސަރުކާރަށް ޝުކުރު އަދާކުރައްވާފައެވެ.
މި ބައްދަލުކުރެއްވުން ނިންމަވާލެއްވީ ކުރިއަށް އޮތް ދުވަސްތަކުގައި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެކަމަށް ދެ ބޭފުޅުންވެސް އުންމީދުކުރައްވާކަމުގައި ވިދާޅުވަމުންނެވެ.
ނައިބު ރައީސް ޖެނީވާއަށް ވަޑައިގެންފައިވަނީ އިންސާނީ ހައްގުތައް ރައްކާތެރިކުރުމާބެހޭ ބައިނަލްއަގުވާމީ މުއާހަދާ "ޔުނިވާސަލް ޑިކްލަރޭޝަން އޮފް ހިއުމަން ރައިޓްސް"އަށް 75 އަހަރު ފުރުމުގެ މުނާސަބަތު ފާހަގަކުރުމަށްޓަކައި ބާއްވާ މަތީ ފަންތީގެ ހަރަކާތްތަކުގައި ބައިވެރިވެވަޑައިގަތުމަށެވެ.
ދިވެހިރާއްޖެއާއި ކިއުބާއާ ދެމެދު ސިޔާސީ ގުޅުން ގާއިމްކޮށްފައިވަނީ ޖެނުއަރީ 29، 1977 ގައެވެ.
ދެހާސް އެކާވީސް ވަނަ އަހަރުގެ ޑިސެމްބަރު މަހު، ކިއުބާއިން ސިއްހީ ހިދުމަތްތެރިން ގެނައުމަށް ރާއްޖެއާއި ކިއުބާ ސަރުކާރާ މެދު އެއްބަސްވުމެއްގައި ސޮއިކޮށްފައިވެއެވެ. އެ އެއްބަސްވުމުގެ ދަށުން ކިއުބާގެ ޑޮކްޓަރުންތަކެއް ރާއްޖެ އައިސް، އަތޮޅު ހޮސްޕިޓަލްތަކުގައި ޚިދުމަތް ދެމުން އަންނަ ކަމަށް މިދިޔަ އަހަރުގެ އޮކްޓޯބަރު މަހު ހެލްތު މިނިސްޓްރީން ބުނެފައިވެއެވެ.