މިދިޔަ ރިޔާސީ އިންތިޚާބުގެ ފަސް ކެންޑިޑޭޓެއްގެ މާލީ ބަޔާން ގާނޫނުގައި ބުނާ މިންގަނޑުތަކަށް ނުފެތޭތީ އެ ކެންޑިޑޭޓުންނަށް ފިޔަވަޅު އަޅަން އިލެކްޝަންސް ކޮމިޝަން (އީސީ)އިން ނިންމައިފިއެވެ.
އީސީން މިއަދު ބޭއްވި ޖަލްސާއެއްގައި އެގޮތަށް ނިންމިކަން ހާމަކުރެއްވީ އީސީގެ ނައިބު ރައީސް އިސްމާއީލް ހަބީބެވެ.
އެކްސްގައި ކުރެއްވި ޕޯސްޓެއްގައި ހަބީބް ވިދާޅުވީ، ގާނޫނުގައި ބުނާ މިންގަނޑުތަކަށް ފެތެނީ ތިން ކެންޑިޑޭޓެއްގެ މާލީ ބަޔާން ކަމަށެވެ. އަދި އެކަމާ ބެހޭ އިތުރު ތަފްސީލް ހާމަ ކުރާނީ ފަހުން ކަމަށް އޭނާ ވިދާޅުވިއެވެ.
އެ ފަސް ކެންޑިޑޭޓުންގެ އިތުރުން އެ ކެންޑިޑޭޓުންގެ އިންތިޚާބީ އޭޖެންޓުންނަށް ވެސް ގާނޫނުގައިވާ ގޮތުގެ މަތީން ފިޔަވަޅު އަޅަން ނިންމާފައިވާއިރު، އެއީ ކޮން ކެންޑިޑޭޓުންނެއް ކަމެއް ހަބީބް ވިދާޅެއްނުވެއެވެ.
މިދިޔަ ސެޕްޓެމްބަރު މަހުގެ ނުވައެއްގައި ބޭއްވި ރިޔާސީ އިންތިޚާބުގައި ވާދަކުރެއްވީ:
- އެމްޑީޕީ ކެންޑިޑޭޓް ކުރީގެ ރައީސް އިބްރާހީމް މުޙައްމަދު ޞާލިޙް
- ޕީއެންސީގެ ކެންޑިޑޭޓް ރައީސް ޑރ. މުޙައްމަދު މުއިއްޒު
- ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމް
- ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބް
- އެމްއެންޕީގެ ކެންޑިޑޭޓް މުޙައްމަދު ނާޒިމް
- އަމިއްލަ ގޮތުން ފާރިސް މައުމޫން
- އަމިއްލަ ގޮތުން ޙަސަން ޒަމީލް
- އަމިއްލަ ގޮތުން އުމަރު ނަސީރު
އެ އިންތިޚާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 ޕަސެންޓް ވޯޓު ލިބިފައިނުވާތީ ބޭއްވި ދެވަނަ ބުރުގައި ވާދަކުރެއްވީ ރައީސް ޞާލިޙާއި ރައީސް މުއިއްޒެވެ.
ރައީސް މުއިއްޒަށް 54 ޕަސެންޓް ވޯޓު ލިބިވަޑައިގަތްއިރު، ރައީސް ޞާލިޙަށް ލިބިވަޑައިގަތީ 46 ޕަސެންޓް ވޯޓެވެ.
އީސީން މާލީ ބަޔާން ހުށަހަޅަން ދިނީ މިދިޔަ މަހުގެ 30ގެ ނިޔަލަށެވެ.
މާލީ ބަޔާނުގައި ހިމަނަން ޖެހޭ ކަންކަމުގެ ތެރޭގައި އިންތިޚާބާ ގުޅިގެން ކެންޑިޑޭޓު ކޮށްފައިވާ ޚަރަދުތަކުގެ ތަފުސީލާއި، އިންތިޚާބަށް ޚަރަދު ކުރުމަށް ފައިސާ ހޯދި ގޮތުގެ ތަފުސީލުގެ އިތުރުން ބޭންކު އެކައުންޓުން ކޮށްފައިވާ ހުރިހާ މުއާމަލާތެއް އެނގޭނެ ބޭންކު އެކައުންޓް ސްޓޭޓްމަންޓް ވެސް ހުށަހަޅަން ޖެހޭނެއެވެ. އަދި ފައިސާއާއި ތަކެތި ދިން ފަރާތްތަކާއި ދިން މިންވަރުގެ ތަފުސީލާއި، ސައްހަ މައުލޫމާތުކަން އަންގައިދޭން ފައިސާގެ ސްލިޕްވެސް ހުށަހަޅަން ޖެހޭނެއެވެ.
ދެހާސް އަށާރަ ވަނަ އަހަރުގެ ރިޔާސީ އިންތިޚާބަށް ބަލާއިރު އޭރުގެ ދެ ކެންޑިޑޭޓުން ކަމަށްވާ ރައީސް ޞާލިޙާއި ރައީސް އަބްދުﷲ ޔާމީން އަބްދުލްޤައްޔޫމްގެ މާލީ ބަޔާން އީސީއަށް ހުށަހެޅިއިރު އެ ކޮމިޝަނުން ބުނީ ގާތްގަނޑަކަށް ދެ ކެންޑިޑޭޓުން ވެސް ޚަރަދުކޮށްފައި ވަނީ އެއްވަރަކަށް ކަމަށެވެ.
އިލެކްޝަންސްގެ ގާނޫނުގައި ބަޔާންކޮށްފައިވާ ގޮތަށް ފުރިހަމައަށް، މާލީ ބަޔާން ހުށަނާޅާނަމަ ފުރަތަމަ ފިޔަވަޅެއްގެ ގޮތުގައި ޖޫރިމަނާ ކުރެވޭނެއެވެ.