ޕީޕީއެމްގެ ސެކްރެޓަރީ ޖެނެރަލްކަން ކުރައްވަމުން އައި، މުޙައްމަދު ތޮލާލް އެ ޕާޓީން ވަކިވެވަޑައިގެންފިއެވެ.
ޕާޓީން ވަކިވެވަޑައިގެންފައިވާކަން ތޮލާލް ހާމަކުރެއްވީ، ޕީޕީއެމް ރައީސް އަބްދުﷲ ޔާމީން އެކުލަވައިލެއްްވި 13 މެމްބަރުންގެ ކޮމިޓީއަކުން ރޭ ބޭއްވި ނޫސްވެރިންގެ ބައްދަލުވުމެއްގައި ޕާޓީގެ ހިންގުމާ އެ ކޮމިޓީން ހަވާލުވެފައިވާކަމަށް ބުނެ ވާހަކަ ފަތުރައިފައިވަނިކޮށެވެ.
އެ ކޮމީޓީ އިސްކޮށް ލީޑުކުރައްވަން ތިއްބެވީ ކަސްޓަމްސްގެ ކުރީގެ ކޮމިޝަނާ ޖެނެރަލް އައްބާސް އާދިލް ރިޒާއާއި ޕީޕީއެމްގެ ސެނެޓަރެއްގެ ގޮތުގައި ހުންނެވި ކުރީގެ މިނިސްޓަރު މަލީހު ޖަމާލެވެ.
ކުއްލި ގޮތަކަށް ބޭއްވި އެ ނޫސްވެރިންގެ ބައްދަލުވުމުގައި އައްބާސް ވިދާޅުވީ ޕާޓީ ހިންގުމުގައި ދުވަހުން ދުވަހަށް ކުރަން ޖެހޭ މަސައްކަތް ކުރުމަށް ތޮލާލް އުޒުރުވެރިވެވަޑައިގަންނަވާ ވާހަކަ ރައީސް ޔާމީނާ ހިއްސާކުރައްވައިފައިވާކަމަށެވެ.
"ތި ބޭފުޅުންނަށް އެނގިވަޑައިގަންނަވާނެ ހީނާވަނީ ސްޕޯކްސްޕާސަން ކަމުން އިސްތިއުފާ ދެއްވައިފައި. އަދި ސެކްރެޓަރީ ޖެނެރަލް މިހާރުވަނީ ޑޭޓުޑޭ ޕާޓީ ހިންގުމުން އުޒުރުވެރިވެވަޑައިގެންފައި،" އައްބާސް ވިދާޅުވިއެވެ.
ހީނާވަނީ އޭނާ ތަރުޖަމާނެއްގެ ގޮތުގައި ހުންނަވާ މަގާމުން އިސްތިއުފާ ނުދެއްވާކަމަށް ވިދާޅުވެފައެވެ.
ނޫސްވެރިން އަމާޒުކުރަމުން އަންނަ ސުވާލުތަކާ ގުޅުގެން ޕީޕީއެމްގެ މީޑިއާ ގްރޫޕުގައި ތޮލާލް ވިދާޅުވީ ޕާޓީން ވަކިވުމާ ހަމައަށް ޕާޓީގައި ދުވަހުން ދުވަހަށް ކުރަންޖެހޭ މަސައްކަތްތައް އޭނާ ކުރައްވަމުން އައި ކަމަށެވެ.
"ޕްރެސްގައި ވިދާޅުވީ ދުވަހުން ދުވަހަށް ޕާޓީ ހިންގުމަށް އަޅުގަނޑު އުޒުރުވެރިވީ ކަމަށް. އެއީ ދޮގެއް. ޕާޓީން ވަކިވުމާ ހަމައަށް އަޅުގަނޑު އައީ ދުވަހުން ދުވަހަށް ޕާޓީ ހިންގުމުގެ މަސްއޫލިއްޔަތު އަދައިކުރަމުން،" ތޮލާލް ވިދާޅުވިއެވެ.
ތޮލާލް އިއްޔެވަނީ ސްޕޯޓްސް ކޮމިޝަނަރުކަމުގެ މަގާމާ ހަވާލުވެވަޑައިގެންފައެވެ. ގާނޫނުގައި ބުނާ ގޮތުން އެ މަގާމާ ހަވާލުވާ މީހަކީ ސިޔާސީ ޕާޓީއެއްގެ ހިންގުމުގައި އުޅޭ މީހަކަށް ވެގެން ނުވާނެއެވެ.
އެހެންވެ ތޮލާލް ސެކްރެޓަރީ ޖެނެރަލްގެ މަގާމުން އިސްތިއުފާ ދެއްވީކަމަށް ޕީޕީއެމްގެ ރެޖިސްޓްރާ ހަމްދާން ނާސިރު ވިދާޅުވިއެވެ.
"ޕާޓީގައި ނުހުރެވޭނެ މަގާމަކަށް ވަޑައިގަންނަވާތީ އިއްޔެ އީސީ [އިލެކްޝަންސް ކޮމިޝަން]ގައި އަމިއްލައަށް އެދިވަޑައިގެން ޕާޓީން ވަނީ ވަކިވެފައި،" ހަމްދާން ވިދާޅުވިއެވެ.
ޕީޕީއެމްގެ ތެރޭ އުފެދިފައި އޮތް ބޮޑު މައްސަލައިގައި އަދިވެސް ޕާޓީގެ ލީޑާޝިޕުން ރަސްމީކޮށް މީޑިއާތަކާ ބައްދަލުކޮށްފައެއް ނުވެއެވެ.
ރޭ ހިނގައިދިޔަ ކަންކަމާ ގުޅިގެން މަލީހު މިހާރު ހުންނެވީ ސަސްޕެންޝަނުގައެވެ.