ތިލަމާލެ ބްރިޖުގެ މަސައްކަތް މިހާރު ކުރިއަށް ދާ ގޮތް، އެ މަސައްކަތް ކުރަމުން އަންނަ ސައިޓުތަކަށް ވަޑައިގެން ރައީސް ޑރ. މުޙައްމަދު މުއިއްޒު މިއަދު ބައްލަވައިލައްވައިފިއެވެ.
އެ މަސައްކަތް ބައްލަވައިލުމަށް ޓަަކައި ރައީސްގެ އަރިހުގައި ނައިބު ރައީސް ހުސައިން މުޙައްމަދު ލަތީފާއި، ރައީސް އޮފީހުންގެ މިނިސްޓަރުންނާއި، ކެބިނެޓް މިނިސްޓަރުން ވަޑައިގެންފައިވެއެވެ. އަދި އެފްކޮންސްގެ އިސްވެރިން ވެސް ތިއްބެވެ.
22 ނޮވްމެބަރު 2023: ތިލަމާލެ ބްރިޖުގެ މަސައްކަތް ރައީސް ބައްލަވައިލެއްވުން -- ފޮޓޯ: އިންފިނިޓް މޫމަންޓްސް/ އާއިޝް އަޝްރަފް
އެންމެ ފުރަތަމަ ރައީސް ވަޑައިގަތީ މާލޭގައި ތިލަމާލެ ބްރިޖު މަސައްކަތް ކުރަމުން އަންނަ ސައިޓަށެވެ. އެގޮތުން އިންޑަސްޓްރިއަލް ވިލެޖުގައި އެ މަސައްކަތް ކުރާ ސަރަަހައްދަށް ވަޑައިގެން ރައީސް ވަނީ މި ވަގުތު އެ ސައިޓުގައި ކުރަމުން އަންނަ މަސައްކަތުގެ މަންޒަރުތައް ބައްލަވައިލައްވައިފައެވެ.
ފެންނަ ގޮތުގައި އެ ތަނުގައި މި ވަގުތު ކުރިއަށް ދަނީ އެއްގަމުން ކުރަން ޖެހޭ ބްރިޖުގެ މައިގަނޑުގެ ބައެއް މަސައްކަތްތަކެވެ. ހަމައެއާއެކު ކަނޑުގެ ފުނަށް ޖަހަންޖެހޭ ތަނބުތައް ޖެހުމުގެ މަސައްކަތެވެ.
އޭގެ ފަހުން ރައީސް ވަޑައިގަތީ ވިލިމާލޭގައި މަސައްކަތް ކުރިއަށް ދާ ގޮތް ބައްލަވައިިލެއްވުމަށެވެ. ވިލިމާލެއާ ދިމާއިން ކުރާ މަސައްކަތް އެ މަނިކުފާނު ބައްލަވައިލެއްވީ އެ މަނިކުފާނުގެ ލޯންޗުކޮޅުގައި ހުންނަވާއެވެ.
22 ނޮވްމެބަރު 2023: ތިލަމާލެ ބްރިޖުގެ މަސައްކަތް ރައީސް ބައްލަވައިލެއްވުން -- ފޮޓޯ: އިންފިނިޓް މޫމަންޓްސް/ އާއިޝް އަޝްރަފް
އެ ވިލިމާލޭގައި ވެސް ކުރެވެމުން އަންނަ މައިގަނޑު މަސައްކަތަކީ ތަނބުތަކުގެ މަސައްކަތެވެ. ބްރިޖުގެ ސްޓްރަކްޗާއާ ގުޅުން ހުރި މަސައްކަތްތަކެވެ. ބައެއް ތަނބުތައް މިހާރު ފެނުމަތިން ފެންނަން އެބަހުއްޓެވެ.
ނަމަވެސް ގިނަ ތަނބުތައް އަދިވެސް ޖެހުމުގެ މަސައްކަތް ކުރާއިރު، ކޮންކްރީޓް މަސައްކަތް ވެސް އަދި ފެނުން މައްޗަށް ނުފެނެއެވެ.
އެއަށްފަހު ރައީސް ވަޑައިގަތީ ބްރިޖުގެ އެންމެ މުހިންމު، އެންމެ ގިނަ މަސައްކަތްތައް ކުރަމުން އަންނަ ގުޅީފަޅަށެވެ.
22 ނޮވްމެބަރު 2023: ތިލަމާލެ ބްރިޖުގެ މަސައްކަތް ރައީސް ބައްލަވައިލެއްވުން -- ފޮޓޯ: އިންފިނިޓް މޫމަންޓްސް/ އާއިޝް އަޝްރަފް
ގުޅީފަޅަކީ ބްރިޖުގެ ޕްރީކާސްޓިން މަސައްކަތްތައް ކުރަމުން އަންނަ ތަނެވެ. އެއީ ބްރިޖުގެ މައިގަނޑު ސްޓްރަކްޗާގައި ހިމެނޭ މުހިންމު ބައިތަކެވެ.
މިހާރު ވެސް ގިނަ ޕްރީކާސްޓް ސްޓްރަކްޗާތަކެއް އެ ތަނުގައި ތައްޔާރުކޮށްފައި އެބަހުއްޓެވެ. އަދި ބްރިޖުގެ ތަނބުތަކުގެ ސްޓްރަކްޗާ ހެދުމުގެ މަސައްކަތް ވެސް އަންނަނީ ކުރަމުންނެވެ. އެ ކަންކަމާ ގުޅޭ މައުލޫމާތު ވެސް ރައީސްވަނީ އޮޅުންފިލުއްވައިފައެވެ.
މަސައްކަތް ބައްލަވައިލެއްވުމަށްފަހު މިއަދު ރައީސް މި މަޝްރޫއާ ގުޅޭގޮތުން މީޑިއާއާ ވާހަކަފުޅެއް ނުދައްކަވައެވެ. ހައުސިން މިނިސްޓަރު އަލީ ހައިދަރު ވެސް ވަކި އެއްޗެއް ވިދާޅުވެފައެއް ނުވެއެވެ.
22 ނޮވްމެބަރު 2023: ތިލަމާލެ ބްރިޖުގެ މަސައްކަތް ރައީސް ބައްލަވައިލެއްވުން -- ފޮޓޯ: އިންފިނިޓް މޫމަންޓްސް/ އާއިޝް އަޝްރަފް
އެންމެ ފަހުން މި މަޝްރޫއުގެ މައުލޫމާތު ދެއްވަމުން މިނިސްޓަރު ހައިދަރު ވިދާޅުވީ މިހާތަނަށް ނިންމަންޖެހޭ 77 ޕަސެންޓު މަސައްކަތުގެ ތެރެއިން އަދި ނިންމިފައި އޮތީ 27 ޕަސެންޓު މަސައްކަތް ކަމަށެވެ.
ވެރިކަމާ ހަވާލުވެވަޑައިގެން އެންމެ ފުރަތަމަ ރައީސް ބައްލަވައިލެއްވި އެންމެ ފުރަތަމަ، އަދި ބޮޑު މަޝްރޫއަކީ މިއީއެވެ. މީގެ ކުރިން އިންތިޚާބީ ރައީސްގެ ހައިސިއްޔަތުން ރައީސްވަނީ ވެލާނާ އިންޓަނޭޝަނަލް އެއާޕޯޓުގެ މަސައްކަތް ބައްލަވައިލައްވައިފައެވެ.