އިރުވައި މޫސުމަކީ ވަރަށް ގިނަ ބާވަތުގެ ދޫނި ރާއްޖެއަށް ހިޖުރަ ކުރާ މޫސުމެއްކަމުން މިފަދައިން ހިޖުރަކުރާ ދޫނިތަކަށް އަނިޔާ ނުކުރުމަށް، އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)އިން ގޮވާލައިފިއެވެ.
ކޮންމެ އަހަރަކު ވެސް މި ދުވަސްވަރު ރާއްޖެއަށް ތަފާތު ދޫނިތައް ހިޖުރަ ކުރެއެވެ. އީޕީއޭއިން ނެރުނު ސާކިއުލާއެއްގައި ބުނެފައިވަނީ، ކޮންމެ އަހަރަކު ވެސް މި ދުވަސްވަރާ ދިމާކޮށް މިފަދަ ދޫނި، ވިޔަފާރި ކުރުމަށާއި މުނިފޫހި ފިލުވުމަށް ހިފާ ގެންގުޅޭ ކަމަށެވެ.
ވީމާ، މިފަދަ އަމަލުތަކުން ދުރުވެ ހެދިފައިވާ ގާނޫނާއި ގަވައިދާ އެއްގޮތައް އަމަލު ކުރުމަށް ބާރު އަޅާކަމަށް ސާކިއުލާގައި ވެއެވެ. ގަވާއިދާ ޚިލާފަށް މިފަދަ ދޫނިތައް ހިފާ ގެންގުޅޭ ފަރާތެއް އެނގޭނަމަ ލަސްނުކޮށް އީޕީއޭއާ އެ މައުލޫމާތު ހިއްސާކުރުމަށް ވެސް އީޕީއޭއިން ވަނީ ގޮވާލާފައެވެ.
ބަލިވެފައިވާ ދޫންޏެއް ނުވަތަ އައިންމަތީ ދޫންޏެއް ފެނިއްޖެ ނަމަ އަމަލު ކުރާނެ ގޮތް ވެސް އީޕީއޭއިން ވަނީ ހިއްސާ ކޮށްފައެވެ. އެގޮތުން ކުރުމަށް އެދިފައިވަ ކަންކަމަކީ:
- ދޫނީގެ ހާލަތު ބެލުމަށް ކައިރިއަށް ގޮސް އުދުހިގެންދޭތޯ ޔަގީން ކުރުން
- ދޫނި ބަލިކަމަށް ފާހަގަ ވާނަމަ ދޫނީގެ ފޮޓޯއާއެކު ފެނުނު ތަނުގެ މައުލޫމާތު އީޕީއޭގެ ހޮޓްލައިން 7980379 އަށް ގުޅައި ނުވަތަ މެސެޖު ކޮށް އެންގުން
- އީޕީއޭގެ އިރުޝާދުގެ ދަށުން ދޫނި ސަލާމަތުގެ އައްސޭރިއަކަށް ގެންދިއުމަށް ޖާގަހުރި ލޯވަޅު އަޅާފައިވާ ކަރުދާސް ފޮއްޓެއްގައި ގެންދެވިދާނެ
- އަނިޔާވެފައިވާ ދޫންޏެއް ނަމަ ކުޑަ ތުވާއްޔެއްގައި މަޑުމަޑުން އޮޅާލައިގެން ވެސް ދޫނި ގެންދެވިދާނެ
- ދޫންޏަށް ފެނާއި ކާނާދޭއިރު ކަމާބެހޭ ފަރާތްތަކުގެ އިރުޝާދުގެ ދަށުން އަމަލުކުރުން އެދެވިގެންވޭ
މި ދުވަސްވަރު ތަފާތު ދޫނިތައް ރާއްޖެ އާދެއެވެ. ދެހާސްއެކާވީސް ވަނަ އަހަރު ރާއްޖެއަށް ގުޑުގުޑާ ދޫނިތަކެއް އައުމުން ގިނަ ބައެއްގެ ސަމާލުކަން އެކަމަށް ލިބުނެވެ.