ބޮލީވުޑްގެ ބަތަލާ ސުޝްމިތާ ސެންއާއި ކުރީގެ ލޯބިވެރިޔާ ރޯހްމަން ޝޯލް އަނެއްކާ ވެސް ގުޅިއްޖެ ކަމަށް ރިޕޯޓުތަކުން ބުނެފިއެވެ.
އިންޑިއާގެ ފެޝަން ޑިޒައިނަރު މަނިޝް މަލްހޯތުރާ މިދިޔަ އަންގާރަ ދުވަހުގެ ރޭ މުމްބާއީގައި ބޭއްވި ދިވާލީ ޕާޓީއަށް ސުޝްމިތާ ދިޔައީ ކުރީގެ ބައިވެރިޔާ ރޯހްމަން ޝޯލްއާ އެކުގައެވެ. ދެ މީހުން އެކަކު އަނެކަކަށް އަތް ގުޅާލައިގެން މި ހަފުލާއަށް ވަން މަންޒަރާ އެކު ކުރީގެ މިސް ޔުނިވާސްގެ ޙަޔާތަށް ރޯހްމަން އެނބުރި އައީކަމަށް ބުނެ ހަލުވިކަމާ އެކު ޚަބަރުތައް ފެތުރެން ފެށިއެވެ.
މޮޑެލް ކުރުމުގެ ދާއިރާގައި މަގުބޫލު ރޯހްމަން އާއި ސުޝްމިތާ އެންމެ ފުރަތަމަ ލޯބީގެ ގޮތުން ގުޅުނުކަން އިއުލާނުކުރީ 2018ވަނަ އަހަރު ތެރޭގައެވެ. ދެ މީހުންގެ ލޯބީގެ ގުޅުން ނިންމައިލިކަން އިއުލާނުކުރީ 2021ވަނަ އަހަރުއެވެ.
އޭގެ ފަހުން ވެސް ރޯހްމަނާއި ސުޝްމިތާ އަކީ ވަރަށް ގާތް ދެ ރަޙުމަތްތެރިން ކަމަށާއި ދެ މީހުންގެ ދެމެދުގައި އޮތް ރަޙްމަތްތެރިކަމުގެ ގުޅުމަށް ބަދަލު ނާންނަ ކަމަށް ބަތަލާ ވަނީ ބުނެފައެވެ. ހާއްސަކޮށް ސުޝްމިތާގެ ދެ ކުދިން އަދި ބަތަލާގެ މައިންބަފައިންގެ މެދުގައި ރޯހްމަންއަކީ ވަރަށް މަގުބޫލު ފަރާތެއް ކަމަށް ސުޝްމިތާ ވަނީ އެކި ފަހަރު މަތިން ބުނެފައެވެ.
ރޯހްމަން ސުޝްމިތާ އަދި ބަތަލާގެ ދެ ކުދިންނާ އެކު --
މި މަހުގެ ތިންވަނަ ދުވަހު ޑިޒްނީ ހޮޓް ސްޓާގައި ސުޝްމިތާގެ ކާމިޔާބު ވެބް ސީރީސް "އާރްޔާ"ގެ ތިންވަނަ ސީޒަން ސްޓްރީމްކުރަން ފަށާފައިވާއިރު ރޯހްމަނާ އެކު ސުޝްމިތާ ފެނުމުން އެންމެ ބޮޑު އުފަލެއް ލިބުނީ ބަތަލާގެ ސަޕޯޓަރުންނަށެވެ. ބައެއް ސަޕޯޓަރުން މި ކަމާ އުފާފާޅުކުރަމުން ބުނެފައިވަނީ އެ މީހުންގެ އުއްމީދަކީ ރޯހްމަންއާއި ސުޝްމިތާގެ ކައިވެނި އަވަހަށް ކުރެވުން ކަމަށެވެ.
ފަހަކަށް އައިސް ބޮޑަށް ވެބް ސީރީސްތަކުން ފެނިފައިވާ ބަތަލާ ދާދި ފަހުން ބުނެފައިވަނީ، ފެންވަރު ރަނގަޅު ސްކްރިޕްޓެއް ލިބިއްޖެނަމަ ފިލްމެއްގެ މަސައްކަތް ކުރަން ތައްޔާރަށް ހުރި ކަމަށެވެ.