މީގެ 12 އަހަރުކުރިން ރިލީޒްކޮށް ބޮޑު ކާމިޔާބީއެއް ހޯދި ފިލްމު "ކޮކްޓެއިލް"ގެ ސީކުއަލްއެއް އުފައްދަން ތައްޔާރު ވަމުން އަންނަ ކަމަށް ރިޕޯޓުތައް ބުނެފިއެވެ.
މި ފިލްމަކީ ސައިފް އަލީ ޚާން، ދީޕިކާ ޕަދުކޯން އަދި ޑަޔާނާ ޕެންޓީ މުހިއްމު ރޯލްއިން ފެނުނު ރޮމޭންޓިކް ކޮމެޑީ ފިލްމެކެވެ. ފިލްމު "ކޮކްޓެއިލް"އަކީ ޝާހިދު ދާދިފަހުން ކުޅުނު ފިލްމު "ތޭރީ ބާތޯ މެ އޭސާ އުލްޖާ ޖިއާ" ގެނެސްދިން ހޯމީ އަދުޖާނިއާ ޑައިރެކްޓްކުރި ފިލްމެކެވެ.
ރިޕޯޓުތައް ބުނާގޮތުން "ކޮކްޓެއިލް 2"ގެ ނަމުގައި އުފައްދާ ސީކުއަލްގެ ލިޑް ރޯލްއަށް ޝާހިދު ގެންނަން ހޯމީ އަދުޖާނިއާ ވަނީ ނިންމާފައެވެ.
ރިޕޯޓުތައް ބުނާ ގޮތުން ކާމިޔާބު ޕްރޮޑިއުސަރު ދިނޭޝް ވީޖަން އާއި ހޯމީ އަދުޖާނިއާ މި ފިލްމުގެ ވާހަކަ ގެނެސްދޭނެ ގޮތަކާ ދޭތެރޭ ވިސްނަމުން އަންނަތާ މިހާރު އަހަރުތަކެއް ވަނީ ވެފައެވެ.
ޝާހިދު ކަޕޫރު ބަތަލާ ކްރިތީ ސެނޮންއާ އެކު--ފޮޓޯ/ފިލްމުފެއަ
ޑައިރެކްޓަރު އިމްތިޔާޒު އަލީ ލިޔެ ތައްޔާރުކުރި ވާހަކައެއްގެ މައްޗަށް ބިނާކޮށް އުފެއްދި މި ފިލްމުގެ ޕްރޮޑިއުސަރުންގެ ތެރޭ ދިނޭޝް ވީޖަން ހިމެނޭއިރު ފިލްމު ގެނެސްދިނީ ވެސް އޭނާގެ ކުންފުނި މެޑްޑޮކް ފިލްމްސްއާ ގުޅިގެންނެވެ.
ފިލްމު "ކޮކްޓެއިލް"ގެ ސީކުއަލްއެއް އުފައްދަން ތައްޔާރުވެ ޝާހިދު ފިލްމަށް ގެންނަން އުޅޭކަމަށް ރިޕޯޓުތަކުން ބުނެފައިވާއިރު ފިލްމުގައި ފެންނާނީ ކޮން ބަތަލާއިންނެއްކަން މިހާތަނަށް ކަށަވަރުވެފައެއް ނުވެއެވެ.
ނަމަވެސް ޝާހިދާއެކު ފިލްމުގައި ފެންނާނެ ބަތަލާއިން ހޯދުމުގެ މަސައްކަތް މެޑްޑޮކް ފިލްމސްއިން ފަށާފައިވާ ކަމަށް ފިލްމީ ޚަބަރުތައް ގެނެސްދޭ ޕީޕީން މޫންގައި ވަނީ ބުނެފައެވެ.
އެންމެ 35 ކްރޯޑު ރުޕީސްގެ ބަޖެޓަކުން އުފެއްދި މި ފިލްމަށް ބޮކްސް އޮފީހުގައި 125 ކްރޯޑު ރުޕީސްގެ އާމްދަނީއެއް ލިބިފައިވާއިރު "ކޮކްޓެއިލް"ގެ މިއުޒިކަށް ވެސް ވަރަށް ބޮޑު މަގުބޫލުކަމެއް ލިބުނެވެ.
ހަމައެއާއެކު މި ފިލްމަކީ ޒުވާނުންގެ މެދުގައި ވަރަށް ބޮޑަށް މަގުބޫލުވި ފިލްމެކެވެ.