ރިޓަޔާކުރަން ބޭނުންވަނީ ލާޒިއޯއިން ކަމަށް އެ ކްލަބުގެ ކޯޗު މައުރީޒިއޯ ސާރީ ބުނެފިއެވެ.
އުމުރުން 64 އަހަރުގެ ސާރީއަށް ލާޒިއޯއާއެކު މިސީޒަނުގެ ފެށުން ގޯސްވެފައިވީ ނަމަވެސް، އޭނާ ބުނެފައިވާ ގޮތުގައި އެ ކްލަބުގައި އޭނާ ހުރީ އުފަލުގައެވެ.
"އަހަރެން މިހުރީ ހިތްހަމަޖެހިގެން، އަދި އަހަރެންގެ ކެރިއަރު ނިންމާލަން ބޭނުންވަނީ ވެސް ލާޒިއޯ އިން. ފެށުން ގޯސްވިޔަސް، އަހަރެންގެ ވިސްނުމަށް ބަދަލެއް ނާދޭ،" ޔޫއެފާ ޗެމްޕިއަންސް ލީގުގައި ފެޔެނޫޑްއާ ދެކޮޅަށް ލާޒިއޯ ކުޅޭ މެޗުގެ ކުރިން ނޫސްވެރިންނާ ވާހަކަދައްކަމުން ސާރީ ބުންޏެވެ.
ސާރީ ބުނީ ފެޔެނޫޑްއާ ދެކޮޅަށް ކުޅޭ މެޗަކީ ލާޒިއޯއަށް ވަރަށް މުހިންމު މެޗެއް ކަމަށާއި ހިތްވަރު އާކުރުމަށް އެ މެޗުން މޮޅުވުން މުހިންމު ކަމަށެވެ. އަދި އެކަމަށްޓަކައި މަސައްކަތްކުރާނެ ކަމަށް ވެސް އޭނާ ބުންޏެވެ.
އަމިއްލަ ދަނޑުގައި ރާއްޖޭގަޑިން މިރޭ 1:00 ގައި ފެޔެނޫޑްއާ ދެކޮޅަށް ލާޒިއޯ އިން ނުކުންނަ އިރު، އެޓީމު އޮތީ ކުޅުނު ތިން މެޗުން ލިބުނު ހަތަރު ޕޮއިންޓާއެކު "ގްރޫޕު އީ"ގެ ތިންވަނައިގައެވެ. އެއްވަނައިގައި އޮތް ފެޔެނޫޑްއަށް ހަ ޕޮއިންޓް ލިބިފައިވާ އިރު، ދެވަނައިގައި އޮތް އެތުލެޓިކޯ މެޑްރިޑަށް ލިބިފައިވަނީ ފަސް ޕޮއިންޓެވެ. އަދި ގްރޫޕުގެ ފުލުގައި އޮތް ސެލްޓިކްއަށް ލިބިފައިވަނީ އެންމެ ޕޮއިންޓެކެވެ.
މީގެ ކުރިން ޗެލްސީ އާއި ޔުވެންޓަސްއަށް އިރުޝާދުދިން ސާރީ، ލާޒިއޯއާ ހަވާލުވީ 2021 ވަނަ އަހަރުއެވެ. އޭނާ ވަނީ ޗެލްސީއަށް ޔޫރޮޕާ ލީގު ކާމިޔާބުކޮށްދީ، ޔުވެންޓަސްއަށް އިޓަލީ ލީގު ކާމިޔާބުކޮށްދީފައެވެ.