ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ދެވަނަ ފަހަރަށް މަޖިލީހަށް ވެއްދުމަށް ޓަކައި އެމްޑީޕީގެ މަޖިލިސް މެންބަރުންގެ ސޮއި ހަަމަކުރީ، އޮޅުވައިލައި، ބިރުދައްކައިގެން ކަމަށް މަޖިލީހުގެ މައިނޯރިޓީއަށް ނިސްބަތްވާ ހުޅުދޫ ދާއިރާގެ މެންބަރު އިލްޔާސް ލަބީބު މިރޭ ތުހުމަތު ކުރައްވައިފިއެވެ.
މިރޭ ސަންގު ޓީވީގެ ޕްރޮގްރާމެއްގައި ވާހަކަދައްކަވަމުން މެންބަރު އިލްޔާސް ވިދާޅުވީ ސޮއި ހޯދުމަށް ޓަކައި މެންބަރުންނަށް އެކިއެކި މަންފާތައް ލިބޭނެ ކަމަށް ބުނެ ކަންކަން ހުށަހަޅަމުން ދިޔަކަމަށެވެ.
އެގޮތުން ގާތް މީހުންނަށް ފްލެޓް ދިނުމާއި، އެ މެންބަރުންނާ ގުޅޭގޮތުން ބަލަމުން އަންނަ މައްސަލަތައް ދައުރު ނިމުމުގެ ކުރިން އަވަސްކޮށް ނިންމައިދިނުން ހިމެނޭ ކަމަށް ބުންޏެވެ.
"ޚާއްސަކޮށް އެމްޑީޕީ މެންބަރުންނަށް ނުފޫޒު ފޯރުވައިގެން އެކި ގޮތްގޮތަށް މަސައްކަތް ކުރާކަން އަޅުގަނޑުމެންނަށް ހަމަ ސާފުކޮށް މެންބަރުން ވިދާޅުވެފައި އެބަހުރި. އަދި ރައީސް ނަޝީދު އަރިހުގައި ވެސް ބައެއްް ބޭފުޅުން ވިދާޅުވެފައި އެބަހުރި މި ކަހަލަ ވަހަކަތަކެއް. އަޅުގަނޑުމެންނަށް އެބަ އެނގޭ މެންބަރުން ބްލެކްމެއިލްކޮށްގެން މަސައްކަތްކުރާކަން އަދި ބިރުދައްކައިގެން މަސައްކަތް ކުރާކަން،" އިލްޔާސް ވިދާޅުވިއެވެ.
އޭނާ ވިދާޅުވީ އަލުން މައްސަލަ ވައްދައިފައި އޮތީ 'ނާޖާއިޒް' މަގަކުން ނުބައި ނިޔަތެއްގައި ކަމަށެވެ. އެ ކަމަށް އެއްބާރުލުން ދިނުމަކީ ކޮށްގެންވާނެ ކަމެއް ނޫން ކަމަށް ވެސް އިލްޔާސް ވިދާޅުވިއެވެ.
އެމްޑީޕީގެ ޕީޖީން އަލުން ރައީސް ނަޝީދުގެ އިތުބާރުގެ މައްސަލަ މަޖިލީހަށް ވައްދަން ނިންމީ ރިޔާސީ އިންތިޚާބުގެ ދެވަނަ ބުރުން ލިބުނު ބޮޑު ނާކާމިޔާބީއާ އެކުގައެވެ.
ފުރަތަމަ ބުރުގެ ކުރިން އެ މައްސަލަ ހުށަހަޅައިފައި އޮތް އިރު، އެ މައްސަލަ އަނބުރާ ގެންދިޔައީ ދެވަަނަ ބުރަކަށް އިންތިޚާބު ދިޔުމުންނެވެ.
ނަމަވެސް އެއިރު ވެސް މައްސަލަ އަނބުރާ ގެންދިޔައީ، ރައީސް ނަޝީދާމެދު އިތުބާރެއް އޮވެގެން ނޫން ކަމަށް އެމްޑީޕީގެ އިސް ލީޑަރު ރައީސް އިބްރާހިމް މުޙައްމަދު ޞާލިހު "ސަން"އަށް ވިދާޅުވެފައިވެއެވެ. އަދި، އެއިރު ވެސް އޮތީ އިންތިޚާބު ނިމުމުން އަލުން މައްސަލަ ވައްދާ ގޮތަށް ކަމަށް އެ މަނިކުފާނު ވިދާޅުވިއެވެ.
ރައީސް ނަޝީދުގެ އިތުބާރުގެ މައްސަލައިގައި އެމްޑީޕީގެ ޕީީޖީގައި ހިމެނޭ މެންބަރުންގެ ސޮއި ގިނަ ނަމަވެސް، އެ މައްސަލައިގައި ސީދާ، ފާޅުކަން ބޮޑުކޮށް އަޑު އުފުލައްވަނީ މަދު މެންބަރެކެވެ.