ޕޯޗުގަލް ތަރި ކްރިސްޓިއާނޯ ރޮނާލްޑޯ، އެވޯޑުތައް ހޯދާފައިވަނީ އަމިއްލަ މަސައްކަތުން ކަމަށް އޭނާގެ ދައްތަ، ކަޓިއާ އަވޭރޯ ބުނެފިއެވެ.
ކަޓިއާ އެހެން ބުނެފައި މިވަނީ، ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާއަށް ދޭ ބެލޮންޑިއޯ އެވޯޑު އަށްވަނަ ފަހަރަށް އާޖެންޓީނާ ތަރި ލިއޮނެލް މެސީ ހޯދާފައިވަނިކޮށެވެ. މެސީ އާއި ރޮނާލްޑޯ ފާހަގަވެގެން ގޮސްފައިވަނީ ދުނިޔޭގައި އުފެދުނު އެންމެ ވާދަވެރި ދެ ކުޅުންތެރިންގެ ގޮތުގައެވެ.
ފަސް ބެލޮންޑިއޯ އެވޯޑާއި އިތުރު އެވޯޑުތަކަކާއެކު ރޮނާލްޑޯ ނަގާފައިވާ ފޮޓޯއަކަށް އިންސްޓަގްރާމުގައި ކަޓިއާ ކުރި ކޮމެންޓެއްގައި ބުނީ "ހޯދި އެވޯޑުތަކެއް، ދީގެން ލިބުނު އެވޯޑުތަކެއް ނޫން،" ކަމަށެވެ.
އާޖެންޓީނާ ތަރި ލިއޮނެލް މެސީ، ބެލޮންޑިއޯ އެވޯޑާއެކު -- ފޮޓޯ/ ގެޓީ
ދާދި ފަހުން މެސީއަށް އަށްވަނަ ފަހަރަށް ބެލޮންޑިއޯ އެވޯޑު ލިބުނު ނަމަވެސް، އެކަމަށް ބައެއް މީހުންގެ ފާޑުކިޔުންތައް ވަނީ އަމާޒުވެފައެވެ. ބައެއް މީހުން ދެކޭގޮތުގައި އެ އެވޯޑުގެ ހައްގުވެރިޔަކީ މެންޗެސްޓާ ސިޓީއާއެކު އިނގިރޭސި ޕްރިމިއާ ލީގާއި އެފްއޭ ކަޕް އަދި ޔޫއެފާ ޗެމްޕިއަންސް ލީގު ކާމިޔާބުކުރި ނޯވޭ ފޯވަޑް އާލިން ހާލަންޑެވެ. އޭނާ ވަނީ މިދިޔަ ސީޒަނުގައި 52 ގޯލު ކާމިޔާބުކޮށްފައެވެ.
ކްލަބު ފުޓުބޯޅައިގައި މިދިޔަ ސީޒަނުގައި ޕެރިސް ސެއިންޓް ޖާމައިން (ޕީއެސްޖީ) އާއެކު މެސީއަށް ރަނގަޅު ކާމިޔާބެއް ހޯދިފައި ނުވި ނަމަވެސް، އޭނާ ވަނީ އާޖެންޓީނާއަށް މިދިޔަ އަހަރުގެ ވޯލްޑް ކަޕް ކާމިޔާބުކޮށްދިނުމުގައި އިސް ދައުރެއް އަދާކޮށްފައެވެ.