ޖަރުމަނު ލީގް ކަޕް ނުވަތަ ޑީއެފްބީ ޕޮކާލްގެ ދެވަނަ ބުރުގައި ވުލްފްސްބާގާއި އެންމެ ފަހުގެ ޗެމްޕިއަން އާރްބީ ލެއިޕްޒިގް ބައްދަލުކުރި މެޗު ވުލްފްސްބާގުން ކާމިޔާބު ކޮށްފިއެވެ.
ވުލްފްސްބާގްގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކުރީ 1-0 ގެ ނަތީޖާއަކުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ލެއިޕްޒިގްއިން ބޯޅަ ގެންގުޅުނު ނަމަވެސް ގިނަ ހަމަލާ އުފައްދާފައިވަނީ ވުލްފްސްބާގުންނެވެ. މެޗުގައި ވުލްފްސްބާގްގެ ހަމައެކަނި ލަނޑު މެޗުގެ 14 ވަނަ މިނެޓްގައި އެ ޓީމަށް ކާމިޔާބު ކޮށްދިނީ ވަކްލާވް ސަނީއެވެ. މި ލަނޑާ އެކު ލެއިޕްޒިގް ޕްރެޝަރަށް ވެއްޓިގެންދިޔައިރު ވުލްފްސްބާގުން ވަނީ ހަމަޖެހިލައިފައެވެ.
މެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ އިރު ދެވަނަ ހާފުގައި ވެސް ލަނޑެއް ފެނުމުގެ ބަދަލުގައި ފެނިގެންދިޔައީ ލެއިޕްޒިގްގެ ޔޫސުފް ޕޯލްސެންއަށް ސީދާ ރަތްކާޑެއް ދެއްކި ތަނެވެ.
މި ކާމިޔާބީއާ އެކު އެންމެ ފަހުގެ ޗެމްޕިއަން ބަލިކޮށް ވުލްފްސްބާގުން ވަނީ މުބާރާތުގެ ތިންވަނަ ބުރުން ޖާގަ ހޯދައިފައެވެ. އަދި، އެންމެ ފަހުގެ ޗެމްޕިއަން ވަނީ ދެވަނަ ބުރުން މި ފަހަރު މުބާރާތަށް އަލްވަދާއު ކިޔަން ޖެހިފައެވެ. މިއީ، 2017 އަދި 2018 ވަނަ އަހަރުގެ ސީޒަނަށް ފަހު މުބާރާތުގެ ދެވަނަ ބުރުން ލެއިޕްޒިގް ބަލިވި ފުރަތަމަ ފަހަރެވެ. އަދި، މިއީ 2021 ވަނަ އަހަރުގެ ފައިނަލްގައި ބޮރޫޝިއާ ޑޯޓްމުންޑް ބަލިކުރި ފަހުން ޑީއެފްބީ ޕޮކާލްގައިގެ މެޗަކުން ލެއިޕްޒިގް ބަލިވި ފުރަތަމަ ފަހަރެވެ.
މި މުބާރާތުގައި ރޭ ކުޅުނު އެހެން މެޗުތަކަށް ބަލާލާއިރު ވީއެފްބީ ޝްޓުޓްގާޓް ވަނީ އެއްލަނޑު ސުންލަނޑުން ޔޫނިއަން ބާލިން ބަލިކޮށްފައެވެ. އަދި، ބޮރޫޝިއާ މޮންޗެންގްލާޑްބެކް ވަނީ ތިން ލަނޑު އެއްލަނޑުން ހެއިޑެންހެއިމްގެ މައްޗަށް ކުރި ހޯދައިފައެވެ.