ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާއަށް ދޭ، ބެލޮންޑިއޯ އެވޯޑު އަށްވަނަ ފަހަރަށް ހޯދި އާޖެންޓީނާ ތަރި ލިއޮނެލް މެސީ، އާޖެންޓީނާ ފުޓުބޯޅަ ލެޖެންޑް ޑިއޭގޯ މެރަޑޯނާއަށް އެ އެވޯޑު ހާއްސަކޮށްފިއެވެ.
ދުނިޔޭގެ ތާރީހު ދުށް އެންމެ މޮޅު ފުޓުބޯޅަ ކުޅުންތެރިޔާ މެސީ، އަށްވަނަ ފަހަރަށް ބެލޮންޑިއޯ އެވޯޑު ހޯދީ ރޭ ބޭއްވި ހާއްސަ ހަފުލާގައެވެ. އެ ހަފުލާގައި ވާހަކަދައްކަމުން މެސީ ވަނީ އެ އެވޯޑު، 2020 ވަނަ އަހަރުގެ ނޮވެމްބަރު މަހު މަރުވި މެރަޑޯނާއަށް ހާއްސަކޮށްފައެވެ.
"މިއަދު އަހަރެން ބޭނުން މަރަޑޯނާގެ ނަން ފާހަގަކުރަން. މެރަޑޯނާގެ އުފަންދުވަސް ފާހަގަކުރަން މިއަށްވުރެ ރަނގަޅު ތަނެއް ނޯންނާނެ. މެރަޑޯނާއަށް އުފާވެރި އުފަން ދުވަހަކަށް އެދެން. މި އެވޯޑު ހާއްސަކުރަން ބޭނުންވަނީ ވެސް މެރަޑޯނާއަށް،" އުމުރުން 36 އަހަރުގެ މެސީ ބުންޏެވެ.
އާޖެންޓީނާ ފުޓުބޯޅަ ލެޖެންޑް، ޑިއޭގޯ މެރަޑޯނާ -- ފޮޓޯ/ ގެޓީ
މެސީ އެ އެވޯޑު ހޯދާފައިވަނީ ކެޕްޓަނެއްގެ ގޮތުގައި އާޖެންޓީނާއަށް މިދިޔަ އަހަރުގެ ވޯލްޑް ކަޕް ކާމިޔާބުކޮށްދިނުމަށްފަހުއެވެ. އެއީ، 1986 ވަނަ އަހަރަށް ފަހު، އާޖެންޓީނާއަށް ކާމިޔާބުކުރެވުނު ފުރަތަމަ ވޯލްޑް ކަޕް ތައްޓެވެ. އާޖެންޓީނާ އިން 1986ގެ ވޯލްޑް ކަޕް ކާމިޔާބުކުރީ މެރަޑޯނާގެ ކެޕްޓަންކަމުގެ ދަށުންނެވެ.
މިފަހަރުގެ އެވޯޑަށް މެސީއާ އެންމެ ވާދަކޮށްފައިވަނީ ޕެރިސް ސެއިންޓް ޖާމައިން (ޕީއެސްޖީ)ގެ ފަރާންސް ތަރި ކިލިއަން އެމްބާޕޭ އާއި މެންޗެސްޓާ ސިޓީގެ ނޯވޭ ފޯވަޑް އާލިން ހާލަންޑެވެ.
މިދިޔަ ސީޒަނުގައި އެމްބާޕޭގެ ފަރާތުން ވެސް ރަނގަޅު ކުޅުމެއް ފެނިގެންދިޔައެވެ. އެގޮތުން މިދިޔަ އަހަރުގެ ވޯލްޑް ކަޕް ފައިނަލުގައި އާޖެންޓީނާ އަތުން ފްރާންސް ބަލިވި ނަމަވެސް، އެމްބާޕޭ ވަނީ އެ މެޗުގައި ހެޓްރިކެއް ހަދައިފައެވެ. ދެން އެވޯޑަށް ވާދަކުރާ ހާލަންޑް، މެންޗެސްޓާ ސިޓީގައި ހޭދަކުރި ފުރަތަމަ ސީޒަނުގައި އޭނާ ވަނީ ގިނަ ރެކޯޑުތަކެއް މުގުރާލައިފައެވެ. އޭނާ ވަނީ ސިޓީއާ އެކު މިދިޔަ ސީޒަނުގެ ޔޫއެފާ ޗެމްޕިއަންސް ލީގާއި އިނގިރޭސި ޕްރިމިއާ ލީގު އަދި އެފްއޭ ކަޕް ވެސް ކާމިޔާބުކޮށްފައެވެ.