ޔުއޭފާ ޔޫރޮޕާ ލީގު ގްރޫޕް ޖީގައި އިޓާލިއަން ސެރީއާގެ އޭއެސް ރޯމާއާއި ޗެކް ރިޕަބްލިކްގެ ސްލާވިއާ ޕްރާގް ބައްދަލުކުރި މެޗު ރޯމާއިން ކާމިޔާބުކޮށްފިއެވެ.
ރޯމާގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކުރީ 2-0 އިންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްލާވިއާ ޕްރާގްއިންނެވެ. ނަމަވެސް އެ ޓީމަށް ރޯމާގެ ޑިފެންސް ފޫއަޅުވާ ލެވޭގޮތެއް ނުވިއެވެ. މެޗުގައި ރޯމާއިމް ކާމިޔަބުކުރި ފުރަތަމަ ލަނޑު މެޗުގެ ފުރަތަމަ މިނެޓްގައި އެ ޓީމަށް ކަމިޔާބު ކޮށްދިނީ އެޑުއާޑޯ ބޯވްއެވެ. އަދި، މެޗުގެ 17 ވަނަ މިނެޓްގައި ރޮމެލޫ ލުކާކޫ ވަނީ ރޯމާގެ ލީޑު ފުޅާކޮށްދީފައެވެ. މެޗުގައި ރޯމާއިން ކާމިޔާބުކުރި ދެ ލަނޑު ޖެހުމުގެ ފުރުސަތު ތަނަވަސް ކޮށްދީފައިވަނީ ސްޓެފެން އަލް ޝާރަވީއެވެ.
މިއީ ލުކާކޫ ޔޫރޮޕާ ލީގުގައި ޖެހިޖެހިގެން ލަނޑު ޖެހި 14 ވަނަ މެޗެވެ. މިއާ އެކު ލުކާކޫ ވެފައިވަނީ ޔޫރަޕްގެ ހުރިހާ މުބާރާތެއްގައި އެންމެ ގިނަ މެޗުތަކުގައި ޖެހިޖެހިގެން ލަނޑު ޖެހި ކުޅުންތެރިޔާއަށެވެ. ލުކާކޫ 14 މެޗު ހަމަކޮށްފައިވަނީ ތިން ކްލަބާ އެކު ނުވަ އަހަރުގެ ތެރޭގައެވެ. އޭނާ ވަނީ ޔޫރޮޕާ ލީގުގައި އެވަޓަން، އިންޓަ މިލާން އަދި ރޯމާ ތަމްސީލްކޮށްފައެވެ. މީގެ ކުރިން މިރިކޯޑް އޮންނަނީ ޔުއޭފާ ޗެމްޕިއަންސް ލީގުގައި ޖެހިޖެހިގެން 11 މެޗުގައި ލަނޑު ޖަހައިގެން ކްރިސްޓިއާނޯ ރޮނާލްޑޯ އަތުގައެވެ. އެއީ، 2017 ވަނަ އަހަރުގެ ޖޫން ތިނަކުން ފެށިގެން 2018 ވަނަ އަހަރުގެ އޭޕްރީލް 11 އާ ދެމެދުއެވެ.
މި ކާމިޔާބީއާ އެކު ރޯމާ މިހާރު ވަނީ ގްރޫޕް ޖީގައި މިހާތަނަށް ކުޅުނު ތިން މެޗު ވެސް ކާމިޔާބުކޮށް ލިބިފައިވާ ނުވަ ޕޮއިންޓާ އެކު ގްރޫޕްގެ އެއްވަނައިގައެވެ. މެޗުން ބަލިވި ސްލާވިއާ ޕްރާގް އުޅެނީ ހަ ޕޮއިންޓާ އެކު ގްރޫޕްގެ ދެވަނައިގައެެވެ.