ޔުއެފާ ނޭޝަންސް ލީގުގައި އިޓަލީއާ ދެކޮޅަށް ކުޅުނު މެޗުގެ ނަތީޖާއާ މެދު ހިތްހަމަނުޖެހޭ ކަމަށާއި ނަމަވެސް ކުޅުންތެރިންގެ ކުޅުމާމެދު އުފާކޮށް ފަހުރުވެރިވާ ކަމަށް ފްރާންސްގެ ކޯޗު ޒައިނުއްދީން ޒިދާން ބުނެފިއެވެ.
އިޓަލީއާ ދެކޮޅަށް ކުޅެ 1-1 އިން އެއްވަރުވި މެޗަށްފަހު ވާހަކަދައްކަމުން ޒިދާޏް ބުނީ މެޗުން ފްރާންސަށް މިއަށްވުރެ ރަނގަޅު ނަތީޖާއެއް ހައްގުވާ ކަމަށެވެ.
"މެޗުން މޮޅުވާން ލިބުނު ފުރުސަތުތަކުގެ ބޭނުން ނުހިފުމުން މިފަދަ ނަތީޖާއެއް ނުކުމެދާނެ. އިޓަލީން ވަރަށް ރަނގަޅަށް ކުޅުނު. މެޗުގެ ނަތީޖާއާމެދު ހިތްހަމަނުޖެހުނު ނަމަވެސް، ކުޅުންތެރިން ދެއްކި ކުޅުމާމެދު އުފާކޮށް ފަޚުރުވެރިވަން," ޒިދާން ބުންޏެވެ.
މިއީ އަމިއްލަ ދަނޑުގައި ފްރާންސްގެ ކޯޗެއްގެ ގޮތުގައި ޒިދާން އިރުޝާދުދިން ފުރަތަމަ މެޗެވެ. ސްޓޭޑް ޑި ފްރާންސްގައި ކުޅުނު މި މެޗުގެ ފުރަތަމަ ހާފުގައި ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ.
ޔުއެފާ ނޭޝަންސް ލީގުގައި އިޓަލީއާ ފްރާންސް ކުޅުނު މެޗުގެ ތެރެއިން-- ފްރާންސްގެ މައިކަލް އޮލީސޭ ފޮނުވާލި ހަމަލާއެއް ގޯލުގެ ހުރަސް ދަނޑީގައި ޖެހުނުއިރު، އިޓަލީގެ މޮއިސް ކީން ފޮނުވާލި ނުރައްކާތެރި ހަމަލާއެއް ފްރާންސްގެ ކީޕަރު މައިކް މިންޔޯން ވަނީ ދިފާއުކޮށްފައެވެ. މެޗުގެ ދެވަނަ ހާފު ފެށިގެން ފްރާންސުން ކުޅުން ވަރުގަދަކޮށް، ރަޔާން ޗާކީ ތަނަވަސްކޮށްދިން ފުރުސަތަކުން އޮލީސޭ ވަނީ ނުވަތާވަރުގެ ހިލޭ ޖެހުމަކުން ފްރާންސަށް ލީޑު ނަގައިދީފައެވެ.
ނަމަވެސް، މެޗުގެ 68 ވަނަ މިނެޓުގައި ފްރާންސްގެ ދިފާއީ ކުޅުންތެރިޔާ ލޫކަސް ޑަ ކޫންޔާއަށް ހެދުނު ގޯހެއްގެ ފައިދާ ނަގައި، އިޓަލީގެ އެލެސަންދްރޯ ބަސްޓޯނީ ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. މެޗު ނިމެން ފަސް މިނެޓަށްވެފައި ވަނިކޮށް ފްރާންސްގެ ޑަޔޮޓް އުޕަމެކާނޯއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުން ފްރާންސުން މެޗު ނިންމާލީ 10 ކުޅުންތެރިންނާއެކުގައެވެ.
ޔުއެފާ ނޭޝަންސް ލީގުގައި އިޓަލީއާ ފްރާންސް ކުޅުނު މެޗުގެ ތެރެއިން-- ފްރާންސްގެ ކޯޗުކަމާ ޒިދާން ހަވާލުވި ފަހުން ކުޅުނު ފުރަތަމަ ދެ މެޗުގައި ތުރުކީ އާއި ބެލްޖިއަމް އަތުން 1-0 އިން މޮޅުވެފައިވެއެވެ. މި މެޗަކީ އޭނާގެ އިރުޝާދުގެ ދަށުން ފްރާންސް މޮޅުނުވެ ނިންމާލަން ޖެހުނު ފުރަތަމަ މެޗުގެ އިތުރުން، އޭނާގެ ކޯޗުކަމުގައި ފްރާންސް ކޮޅަށް ލަނޑެއް ވަން ފުރަތަމަ މެޗުވެސް މެއެވެ.
މިއީ 2006 ވަނަ އަހަރުގެ ފީފާ ވޯލްޑް ކަޕް ފައިނަލަށްފަހު އިޓަލީއާ ދެކޮޅަށް ކުޅުންތެރިއެއްގެ ގޮތުގައި ނުވަތަ ކޯޗެއްގެ ގޮތުގައި ޒިދާން ކުރިމަތިލީ ފުރަތަމަ މެޗެވެ. 2006 ގެ އެ ތާރީޚީ ފައިނަލް މެޗުގައި އިޓަލީގެ މާކޯ މަޓެރާޒީ މޭގައި ބޮލުން ޖެހުމާ ގުޅިގެން ޒިދާނަށް ރަތް ކާޑު ދެއްކިއިރު، ޕެނަލްޓީ ޖަހައިގެން މެޗު ކާމިޔާބުކުރީ އިޓަލީއެވެ.