ކުޑަ އިންޖީނު ދޯންޏެއްގައި އެކަނި މަހަށް ނިކުމެ އުޅެނިކޮށް ގެއްލުނު، އދ. ދަނގެތި، ޔޫސުފް އިބްރާހީމް (ޔޫސުފްބެ) ހޯދަން ކުރަމުން ގެންދިޔަ މަސައްކަތްތައް އެމްއެންޑީއެފްއިން މިއަދު ހުއްޓާލައިފިއެވެ.
ޔޫސުފްބެ ހޯދުން ސިފައިން ހުއްޓާލާފައި މިވަނީ އޭނާ ހޯދަން ކަނޑުމަގުންނާއި ވައިގެ މަގުން ގިނަ މަސައްކަތްތަކެއް ކުރާތާ ހަފުތާއެއް ފަހުންނެވެ.
އެގޮތުން، ޔޫސުފްބެ ހޯދަން ކަނޑު މަގުން 664 ސްކެއާ ނޯޓިކަލް މައިލްސް ބަލާފައިވާއިރު ވައިގެ މަގުން 907 ސްކެއާ ނޯޓިކަލް މައިލްސް އަދި ޑައިވްކޮށްގެން 376،850 ސްކެއާ މީޓާސް ބަލާފައިވާ ކަމަށް އެމްއެންޑީއެފްއިން ބުނެއެވެ.
އެހެން ނަމަވެސް، ހަފުތާ ފާއިތުވެގެން ދިޔަ އިރުވެސް ޔޫސުފްބެގެ އެއްވެސް ނިޝާނެއް ނުފެނުނެވެ.
އުމުރުން 65 އަހަރަށް ވުރެ މަތިވެފައިވާ ޔޫސުފްބެ ގެއްލުނުކަން ކައުންސިލާއި އާއިލާ އަދި އެ ރަށު މީހުންގެ ސަމާލުކަމަށް އައީ އޭނާ މަަހަށް ދިޔަ ދޯނި ހުސްކޮށް ރަށު ކައިރިން މިދިޔަ ހޮނިހިރު ދުވަހު ފެނުމުންނެވެ.
އޭނާ ގެއްލުނުކަން ސިފައިންނަށް ރިޕޯޓުކޮށްފައި ވަނީ ހޮނިހިރު ދުވަހުގެ މެންދުރު 11:42 ހާއިރެވެ.