އިޒްރޭލުން، ފަލަސްތީނަށް ދެމުންދާ ހަމަލާތައް ކުށްވެރިކޮށް އެ މައްސަލާގައި ފިޔަވަޅު އެޅުމަށް ރައްޔިތުންގެ މަޖިލީހަށް ގަރާރަކާއި ކުއްލި މައްސަލައެއް ހުށަހަޅާފައި ވަނިކޮށް، ކުއްލި މައްސަލަ ނުބަލައި ގަރާރު އެޖެންޑާ ކޮށްފިއެވެ.
ފަލަސްތީނު މައްސަލާގައި މަޖިލީހަށް ގަރާރު ހުށަހެޅުއްވީ ވިލިނގިލި ދާއިރާގެ އެމްޑީޕީ މެންބަރު ސައުދު ހުސެއިނެވެ. އަދި އެ މައްސަލާގައި ކުއްލި މައްސަލަ ހުށަހެޅުއްވީ ހޯރަފުށީ ދާއިރާގެ މެންބަރު އަހްމަދު ސަލީމެވެ.
މިއަދުގެ މަޖިލީހުގެ ޖަލްސާގެ ރިޔާސަތުގައި އިންނަވައި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ މި މައްސަލައިގައި ކުއްލި މައްސަލައެއް މަޖިލީހުގެ އިދާރާއަށް ލިބިފައިވީ ނަމަވެސް، ކުއްލި މައްސަލަ އެޖެންޑާ ނުކުރީ، އެއް މައްސަލައެއްގައި ގަރާރަކާއި ކުއްލި މައްސަލައެއް، އެއް ފަހަރާ ހުށަހަޅައިފި ނަމަ ކުރިއަށް ގެންދެވޭނީ ގަރާރު ކަމަށް މަޖިލީހުގެ ގަވާއިދުގައި ބުނާތީ ކަމަށެވެ.
"ކުއްލި މައްސަލައަކަށް ބަހުސް ކުރެވެނީ އެޖެންޑާގައި އެ މައްސަަލަ ނުހިމެނޭ ނަމަ. އެހެން ނަމަވެސް އަޅުގަނޑުމެންނަށް މިވަނީ ހަމަ މި މައްސަލައިގައި ރައްޔިތުންގެ މަޖިލީހަށް ކުރިއާލައި ގަރާރެއް ލިބި އަދި މިއަދު އެޖެންޑާކޮށްފައި،" އީވާ ވިދާޅުވިއެވެ.
އެއާ އެކު މެންބަރުންގެ ކަންބޮޑުވުމަކަށްވީ ގަރާރު މިއަދަށް އެޖެންޑާކުރުމުން މިއަދު ކުރެވޭނެ ހަމައެކަނި ކަމަކީ ގަރާރުގެ ފުރަތަމަ ކިއުން އިއްވުން ކަމަށްވުމެވެ. އެއަށް ބަހުސް ކުރުމަށް ހުޅުވައެއް ނުލެވޭނެއެވެ. ނަމަވެސް ކުއްލި މައްސަލަ އެޖެންޑާކުރި ނަމަ މިއަދު ވެސް ބަހުސް ކުރެވުނީހެވެ.
ކާށިދޫ ދާއިރާގެ މެންބަރު އަބްދުﷲ ޖާބިރު މަޖިލީހުގެ މިއަދުގެ ޖަލްސާގައި ވާހަކަދައްކަވަނީ --- ފޮޓޯ/ މަޖިލިސް
ކާށިދޫ ދާއިރާގެ އެމްޑީޕީ މެންބަރު އަބްދުﷲ ޖާބިރު ވަނީ ހުރިހާ ދިވެހި ރައްޔިތުންގެ ކަންބޮޑުވުން އޮތް ފަލަސްތީނުގެ ރައްޔިތުންގެ ހައްގުގައި ބަހުސްކުރުމުގެ ފުރުސަތު މިއަދު ލިބިވަޑައިނުގަތުމުން ހިތާމަ ކުރައްވާ ކަމަށް ވިދާޅުވެ، ކަންބޮޑުވުން ފާޅުކުރައްވައިފައެވެ.
"ގަވައިދުގައި ހުންނަ އަކުރު، އަކުރުގައި ހިފައިގެން މިފަދަ މުހިއްމު މައްސަލަތައް އެޖެންޑާ ނުކުރުން އެއީ އިއްޒަތްތެރި ރައީސް އަޅުގަނޑު ދެކޭގޮތުގައި ރަނގަޅު ކަމެއް ނޫން،" ޖާބިރު ވިދާޅުވިއެވެ.
އެ ކަމަށް ރައްދު ދެއްވަމުން އީވާ ވިދާޅުވީ އިޒްރޭލާ ދެކޮޅު ގަރާރު މިއަދަށް އެޖެންޑާނުކޮށް ކުއްލި މައްސަލަ އެޖެންޑާކުރަން ގަރާރު ހުށަަހެޅުއްވި މެންބަރަށާއި ކުއްލި މައްސަލަ ހުށަހެޅުއްވި މެންބަަރަށް ރިޔާސަތުން ފުރުސަތު ދިން ކަމަށެވެ. އެހެން ނަމަވެސް ގަރާރު ހުށަހެޅުއްވި މެންބަރު އެދިވަޑައިގެންނެވީ ގަރާރު މިއަދަށް އެޖެންޑާ ކުރަން ކަމަށް ވެސް އީވާ ވިދާޅުވިއެވެ.
މި މަހުގެ ހަތްވަނަ ދުވަހު ހަމާސް ޖަމާއަތުން އިޒްރޭލަށް ދިން ކުއްލި ހަމަލާއާ ގުޅިގެން އިޒްރޭލުން ވަނީ ފަލަސްތީނަށް ހަމަލާ ދިނުމަށް ރަސްމީގޮތުން ހަނގުރާމަ އިއުލާނުކޮށްފައެވެ. އިޒްރޭލުން ދެމުންދާ ހަމަލާތަކުގައި ފަލަސްތީނުގެ ގިނަ ބަޔަކު ޝަހީތުވެ، 10،000 އަށްވުރެ ގިނަ މީހުން ވަނީ ޒަޚަމްވެފައެވެ.