އެމްޑީޕީއަކީ ކުރީގެ ރައީސް މުހައްމަދު ނަޝީދުގެ އުމުރު ދުވަހުގެ މަސައްކަތެވެ. ހަމައެކަނި އެ ބޭފުޅާއެއް ނޫނެވެ. އެތައް ބޭފުޅުންނެކެވެ.
ކުރިން އެ މަނިކުފާނަކީ ހިތްތަކުގެ ރައީސެވެ. އެ މަނިކުފާނަށްޓަކައި ޖަލަށް ވަޑައިގެން ބޭފުޅުން މަދެއް ނުވާނެއެވެ. އެ މަނިކުފާނުގެ ހައްގުގައި މަގުމަތީ އެތައް ރެޔެއް ހޭދަނުކުރައްވައި ބޭފުޅެއް އެ ޕާޓީގައި ނުހުންނާނެއޭ ދެންނެވިޔަސް ދޮގަކަށް ނުވާނެއެވެ. އެކަމަކު، މިރޭ ފެނުނީ ސިޔާސީ މަންޒަރު ބަދަލުވީ މިންވަރެވެ. މުޅި އެމްޑީޕީ ނުކުމެ އެއް އަޑަކުން ގޮވަނީ "ނަޝީދު ނޫން ގޮތެއް، ބަރުލަމާނީ ނޫން ގޮތެއް،" ކަމަށެވެ.
ދެން އެގޮތް ބޭނުން ނޫން ކަމަށް ވިދާޅުވެ، މިރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި އެ މަޖިލީހުގެ ހުރިހާ މެންބަރުން ވެސް ބަރުލަމާނީ ނިޒާމަށް ފާޑު ވިދާޅުވެ ވާހަކަފުޅު ދައްކަވައިފިއެވެ.
އެމްޑީޕީގެ ކުރީގެ ރައީސް މުހައްމަދު ނަޝީދު އިސްވެ ހުންނަވައިގެން އުފެއްދި ދަ ޑިމޮކްރެޓްސްއިން އަންނަނީ ވެރިކަން ކުރާ ނިޒާމު ބަރުލަމާނީ ނިޒާމަކަށް ފޮރުޅައިލަން ނިޒާމީ ވޯޓެއް ނެގުމުގެ މަސައްކަތް ކުރަމުންނެވެ. އެކަމަކު، މިހާތަނަށް އެ މަނިކުފާނު ފިޔަވާ އެއްވެސް ސިޔާސީ ލީޑަރަކު ބަރުލަމާނީ ނިޒާމަށް ތާއީދު ކޮށްފައެއް ނުވެއެވެ.
ނިޒާމީ ވޯޓާ ގުޅޭ ގޮތުން އެމްޑީޕީން ރަސްމީ ނިންމުމެއް ނިންމަން މިރޭ އިމާދުއްދީން ސްކޫލުގައި ބޭއްވި އެ ޕާޓީގެ ގައުމީ މަޖިލިސް ޖަލްސާގައި ވާހަކަފުޅުދައްކަވަމުން ރައީސް އިބްރާހިމް މުހައްމަދު ޞާލިޙް ވަނީ ރިޔާސީ ނިޒާމަކަށް ތާއީދު ކުރައްވާކަން ތަކުރާރުކުރައްވައިފައެވެ. އެކަމަކު، އެހެންޏާ މަޑުން ހުންނަވައި ރައީސް މިރޭ ވިދާޅުވީ ރިޔާސީ ނިޒާމު ދަމަހައްޓަން އެ މަނިކުފާނު އަމަލީ ގޮތުން ނުކުންނަވާނެ ކަމަށެވެ.
"އަޅުގަނޑު ގަބޫލު ކުރާގޮތުގައި މި ދެ ނިޒާމުގައި ވެސް ރަނގަޅު ކަންތަކާއި ގޯސްކަންތަކެއް ހުއްޓަސް މި ރާއްޖެއަށް އެންމެ ރަނގަޅު ނިޒާމެއް ކަމަށް އަޅުގަނޑަށް ގަބޫލު ކުރެވެނީ ރިޔާސީ ނިޒާމު. އަޅުގަނޑުގެ ތާއީދުވެސް އޮތީ ރިޔާސީ ނިޒާމާއެކީގައި،" ރައީސް ވިދާޅުވިއެވެ.
މިރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ރައީސް އިބްރާހިމް މުހައްމަދު ޞާލިޙް -- ސަން ފޮޓޯ/ އިބްރާހިމް ޝަމްވީލް
އެ ޕާޓީގެ ޗެއާޕާސަންގެ ނައިބު އިބްރާހިމް ވަހީދު (އިބުރޭ) ވިދާޅުވީ، ދެން އިތުރަށް ނިޒާމީ ވޯޓުގެ ވާހަކަ ދައްކަން ވެސް ބޭނުންނުވާ ކަމަށެވެ. ނިމިދިޔަ ރިޔާސީ އިންތިޚާބުގައި ޑިމޮކްރެޓްސްއިން ވެސް ބުނީ "ރައީސް ޞާލިޙް ނޫން ގޮތެ"ކޭ ކަމަށާއި އެހެންވެ، މި ފަހަރު އެމްޑީޕީން ވެސް ބުނާނީ "ބަރުލަމާނީ ނޫން ގޮތެ"ކޭ ކަމަށް އޭނާ ވިދާޅުވިއެވެ.
"އަޅުގަނޑުމެން ވެސް ވަރަށް ދެރަވި އިނގޭތޯ. އެ ބޭފުޅުން ވެސް ވިދާޅުވީ ރައީސް ޞާލިޙް ނޫން ގޮތެކޭ. ކޮންމެހެން މުއިއްޒު [ޑރ. މުހައްމަދު މުއިއްޒު] ހޮވާކަށް އެހެން މީހަކު ހޮވާކަށް ނޫން ވާހަކަދެއްކީ. ރައީސް ޞާލިޙް ނޫން ގޮތެއް ޑިމޮކްރެޓްސްއިން،" އިބުރޭ ވިދާޅުވިއެވެ.
އޭނާ ވިދާޅުވީ، އެމްޑީޕީއަކީ އަބަދު ވެސް ވަރަށް ރޭވިގެން ކަންތައްތައް ކުރާ ޕާޓީއެއް ކަމަށާއި އެހެންވެ، މި ފަހަރު ނިޒާމީ ވޯޓެއްގެ ވާހަކަ ދައްކަން ބޭނުންނުވާ ކަމަށެވެ. ޕާޓީން ފޯކަސް ކުރަންވީ އަންނަން އޮތް ރައްޔިތުންގެ މަޖިލީހުގެ އިންތިޚާބަށް ކަމަށް އޭނާ ގަބޫލުކުރައްވައެވެ.
މިރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގެ ތެރެއިން -- ސަން ފޮޓޯ/ އިބްރާހިމް ޝަމްވީލް
"އަޅުގަނޑު މި ވަގުތު އެހާ ބަލާކަށް ބޭނުމެއް ނޫން ރާއްޖެއަށް ރަނގަޅީ ކޮން ނިޒާމެއްތޯއެއް. އަޅުގަނޑު ވެސް މިހާރު ބޭނުންވަނީ ބަރުލަމާނީ ނިޒާމު ނޫން ގޮތެއް،" އޭނާ ވިދާޅުވިއެވެ.
"އެ ބޭފުޅުން އެ ދުވަހު ވިދާޅުވީ ރައީސް ޞާލިޙް ނޫން ގޮތެކޭ. މިއަދު އަޅުގަނޑުމެން ބުނާނީ ބަރުލަމާނީ ނޫން ގޮތެކޭ،"
އިބުރޭގެ އިތުރުން، އެ ޕާޓީގެ ޕާލިމަންޓްރީ ގްރޫޕުގެ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވެސް ވިދާޅުވީ މި ފަހަރު ބޭނުން ވަނީ "ބަރުލަމާނީ ނޫން ގޮތެއް" ކަމަށެވެ. އޭނާ ވިދާޅުވީ، ނިޒާމު ބަދަލު ކުރުމަކީ އާދައިގެ ކަމެއް ނޫން ކަމަށާއި އެއީ ވަރަށް ބޮޑު ކަމެއް ކަމަށެވެ.
އޭނާ ވިދާޅުވީ، އެމްޑީޕީން ނިޒާމީ ވޯޓެއް ނަގަން ހުށަހެޅި ގަރާރަށް ވޯޓު ދިނީ އެ ވަގުތު ޑިމޮކްރެޓްސްގެ ތާއީދު މުހިއްމުވީ މިންވަރުން ކަމަށާއި އެ ވަރުން ވެސް އެ ބޭފުޅުން މަސައްކަތް ކުރެއްވީ "އަތް އަނބުރާ" ގަދަކަން ދައްކަން ކަމަށް އޭނާ ސިފަ ކުރެއްވިއެވެ.
"އަޅުގަނޑަށް ވެސް މި ވަގުތު ބޭނުންވަނީ ބަރުލަމާނީ ނޫން ގޮތެއް،" އަސްލަމް ވިދާޅުވިއެވެ.
މިރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގެ ތެރެއިން ހިތަދޫ އުތުރު ދާއިރާގެ މެންބަރު މުހައްމަދު އަސްލަމް -- ސަން ފޮޓޯ/ އިބްރާހިމް ޝަމްވީލް
މިރޭގެ ޖަލްސާގައި ވާހަކަދެއްކެވި ހުރިހާ މެންބަރުން ވެސް ވިދާޅުވީ އެއް ވާހަކައެކެވެ. އެއީ، އެ ބޭފުޅުން ބޭނުންވަނީ "ބަރުލަމާނީ ނޫން ގޮތެއް" ކަމަށެވެ. އެ ހުރިހާ ބޭފުޅުން ވެސް ވަނީ ޑިމޮކްރެޓްސްއާއި ނަޝީދަށް ވަރަށް ބޮޑަށް ފާޑު ވިދާޅުވެފައެވެ.
އެގޮތުން، ޑިމޮކްރެޓްސްގައި ހުންނެވުމަށް ފަހު އެމްޑީޕީއާ މި ފަހުން ގުޅިވަޑައިގެން ތޮއްޑޫ ދާއިރާގެ މެންބަރު ހަސަން ޝީޔާން (ގިޓާ) ވިދާޅުވީ، ޑިމޮކްރެޓްސްއިން ބަރުލަމާނީ ނިޒާމެއް ގެންނަން އެ ޕާޓީން ބޭނުންވި ނަމަ އެ ބޭފުޅުން ރިޔާސީ އިންތިޚާބުގައި ރައީސް ޞާލިޙަށް ތާއީދު ކުރެއްވީސް ކަމަށެވެ. އެކަމަކު، ތާއީދު ނުކުރެއްވުމުގެ ނަތީޖާއަކަށް ވާނީ އެމްޑީޕީން ވެސް "ބަރުލަމާނީއަށް ނޫނެކޭ ބުނުން،" ކަމަށް އޭނާ ވިދާޅުވިއެވެ.
"ޑިމޮކްރެޓުން އެ ތިބީ ވަރަށް ބޮޑަށް ޒާތީވެފައި. ރައީސް އިބޫ ނޫން ގޮތެއް ހޯދި ގޮތަށް އަޅުގަނޑުމެން ބަރުލަމާނީ ނިޒާމު ނޫން ގޮތެއް އިރާދަކުރެއްވިއްޔާ ހޯދާނަން،" ޝިޔާން ވިދާޅުވިއެވެ.
ވަކި ހިސާބަކުން މުޅި ރޫހު ބަދަލުވީއެވެ. ގައުމީ މަޖިލީހުގެ މެންބަރުން ދެން ގޮވާލެއްވީ "ބަރުލަމާނީ ނޫން ގޮތެއް، ނަޝީދު ނޫން ގޮތެއް،" ކަމަށެވެ. އެ ބޭފުޅުން ވިދާޅުވީ ވަކި ބޭފުޅަކު ބޭނުންފުޅުވުމަކީ ނިޒާމު ބަދަލު ކުރަން ޖެހޭ ކަމެއް ނޫން ކަމަށާއި ރިޔާސީ އިންތިޚާބުގައި ހަތް އިންސައްތަ ވޯޓު ލިބުނު ޕާޓީއަކުން ބޭނުންވިޔަސް ނިޒާމު ބަދަލު ކުރުމުގެ ވާހަކަ ދައްކަން ނުޖެހޭ ކަމަށެވެ.
"އިރާދަކުރެއްވިއްޔާ އަޅުގަނޑުމެން އެންމެން ދާނީ ބަރުލަމާނީ ނޫން ގޮތެއް ހޯދަން ބާރަށް ކުރިއަށް،" އާރުޑީސީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) މިރޭ ވިދާޅުވިއެވެ.
މިރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގެ ތެރެއިން -- ސަން ފޮޓޯ/ އިބްރާހިމް ޝަމްވީލް
މޫސަ ވިދާޅުވީ، ހަމައެކަނި އެމްޑީޕީއާ ދެކޮޅަށް މަސައްކަތް ކުރެއްވީ ނޫން ކަމަށާއި ނަޝީދަށް ދިން ހަމަލާއަކީ ވެސް ސީދާ އެމްޑީޕީން ދިން ހަމަލާއެއް ކަމަށް ސިފަކޮށް، އެތައް ދޮގެއް އެ ޕާޓީއާ ދެކޮޅަށް ފެތުރިކަން އޭނާ ފާހަގަ ކުރެއްވިއެވެ. އެހެންވެ، އެނބުރި ނަޝީދާ ގުޅެވެން ނެތް ކަމަށް އޭނާ ވިދާޅުވިއެވެ.
އެމްޑީޕީގެ މެންބަރުން ވިދާޅުވީ، ނަޝީދު މަސައްކަތް ކުރައްވަނީ ނިޒާމީ ބަޣާވާތެއް ގެންނަން ކަމަށާއި އެ ކަން ކުރިއަ ނުދޭނެ ކަމަށެވެ. މި ވަގުތު މުހިއްމީ އިންތިޚާބީ ރައީސާއި ސަރުކާރަށް ފުރުސަތު ދިނުން ކަމަށް އެ ޕާޓީގެ މެންބަރުން ގަބޫލުކުރައްވައެވެ.
އެއަށް ފަހުގައި ވާހަކަދައްކަވަމުން ދާންދޫ ދާއިރާގެ މެންބަރު ޔައުގޫބް އަބްދުﷲ ވިދާޅުވީ، އޭނާއާއި އެ ދާއިރާއަށް ނިސްބަތްވާ އެމްޑީޕީގެ އެންމެހައި މެންބަރުން ވެސް ބޭނުން ވަނީ "ރައީސް ނަޝީދު ނޫން ގޮތެއް،" ކަމަށެވެ.
"އަޅުގަނޑުގެ ދާއިރާގެ އެމްޑީޕީ ރައްޔިތުން ވަރަށް ސާފުކޮށް ބުނެފި، ތިމަންނަމެން ބޭނުންވަނީ ރައީސް ނަޝީދު ނޫން ގޮތެކޭ. އަޅުގަނޑު ވެސް ބޭނުން ވަނީ ރައީސް ނަޝީދު ނޫން ގޮތެއް. އަޅުގަނޑު ވެސް ބޭނުން ވަނީ ބަރުލަމާނީ ނޫން ގޮތެއް،" ޔައުގޫބް ވިދާޅުވިއެވެ.
ބަރުލަމާނީ ނިޒާމެއް ގެންނަން ކުރެއްވި މަސައްކަތްޕުޅުގެ ތެރެއިން އެމްޑީޕީގައި އުފެދުނު ހިޔާލުތަފާތުވުންތަކަށް ފަހު އެ ޕާޓީގެ ރައީސްކަމުން އިސްތިއުފާ ދެއްވައި ނަޝީދު ގެންދަވަނީ މަޖިލީސް މެދުވެރިކޮށް ނިޒާމީ ވޯޓެއް ނަގަން މަސައްކަތް ކުރަމުންނެވެ. އެ މަނިކުފާނުގެ ޑިމޮކްރެޓްސްއިން ވަނީ މި މަހު ނިޒާމީ ވޯޓެއް ނަގަން ހުށަހަޅައިފައެވެ. އެކަމަކު، އިތުރު ޕާޓީއެއްގެ ތާއީދެއް ނުލިބި އޮއްވައި މިއަދު ޑިމޮކްރެޓްސްގެ މެންބަރުން ވެސް ވަނީ ނިޒާމީ ވޯޓު ނެގުން ފަސް ކުރަން ގޮވާލައިފައެވެ.
އެމްޑީޕީ އުފެއްދުމުގައި ވެސް އިސް ދައުރެއް އަދާ ކުރެއްވި ނަޝީދަކީ ކުރީގައި އެމްޑީޕީގައި އެންމެ ތާއީދު ބޮޑު ބޭފުޅާއެވެ. އެކަމަކު، ރައީސް ޞާލިޙް ވެރިކަމަށް ވަޑައިގެން ފަހުން ނަޝީދުގެ ތާއީދު ފަނޑުވެ، ރައީސް ޞާލިޙްގެ ތާއީދު އިތުރުވީއެވެ.
ކުރިން އެއީ ހިތްތަކުގެ ރައީސެވެ. އެމްޑީޕީގެ ރޫހެވެ. އެކަމަކު، މިއަދު ނަޝީދު ވެސް ހުންނަވައި ބިނާކުރި އެމްޑީޕީން ހަރުއަޑުން ގޮވަނީ "ނަޝީދު ނޫން ގޮތެއް،" އެ ޕާޓީން ބޭނުންވާ ކަމަށެވެ.