އެމްޑީޕީން ނިޒާމީ ވޯޓެއް ނަގަން އެއްބަސްވި ކަމަށް މިއަދު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވި ނަމަވެސް އެފަދަ އެއްވެސް އެއްބަސްވުމެއް ޑިމޮކްރެޓްސްއާ އެކު ހަދާފައިނުވާނެ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެއެވެ.
މަޖިލީހުގެ ޖަލްސާގެ ރިޔާސަތުގައި އިންނަވައި ނަޝީދު މިއަދު ވިދާޅުވީ، އެމްޑީޕީން ނިޒާމީ ވޯޓަށް ފުރިހަމައަށް އެއްބާރުލުން ދޭނެ ކަމަށް ޑިމޮކްރެޓްސްއަށް އަންގާފައިވާ ކަމަށެވެ.
"އަޅުގަނޑަށް އެނގިފައި އޮތް ގޮތުގައި ޑިމޮކްރެޓްސް ކައިރިން އެދިފައި އޮތީ އެ ޕާޓީން ވަކި ބަޔަކަށް ތާއީދު ނުކޮށް ތިބެއްޖެ ނަމަ، އެމްޑީޕީން ފެންނަ ނުފެންނަ ވޯޓަށް ފުރިހަމައަށް ތާއީދު ކުރައްވާނެ ކަމަށް،" އެ މަނިކުފާނު ވިދާޅުވިއެވެ.
ނަޝީދުގެ ވާހަކަފުޅާ ގުޅިގެން "ސަން"އާ ވާހަކަ ދައްކަވަމުން އިކޮނަމިކް މިނިސްޓަރުކަން ވެސް ކުރައްވާ ފައްޔާޒް ވިދާޅުވީ އެމްޑީޕީން ޑިމޮކްރެޓްސްއާ އެކު އެއްވެސް އެއްބަސްވުމެއް ހަދާފައި ނޯންނާނެ ކަމަށެވެ. އަދި، ނަޝީދު ހެއްދެވީ އިތުރުފުޅެއް ކަމަށާއި އެ މަނިކުފާނު އެފަދައިން ވިދާޅުވާންވި ސަބަބެއް އެނގިވަޑައިނުގަންނަވާ ކަމަށް ވެސް ފައްޔާޒް ވިދާޅުވިއެވެ.
"އެއީ ރަނގަޅު ވާހަކައެއް ނޫން. ނަޝީދު އެހެން ވިދާޅުވީ ސަބަބެއް އަޅުގަނޑަކަށް ނޭނގޭ،" ފައްޔާޒް ވިދާޅުވިއެވެ.
ގިނަ ދުވަސްތަކެއް ވަންދެން އެމްޑީޕީގެ ރައީސްކަން ކުރައްވާފައި، ރައީސް އިބްރާހިމް މުހައްމަދު ޞާލިޙާ ދެ ބޭފުޅުންގެ ދެމެދުގައި އުފެދުނު ހިޔާލު ތަފާތުވުންތައް ބޮޑުވެ، އެމްޑީޕީން ވަކިވި ނަޝީދު މިއަދު ވަނީ މިހާރު އެމްޑީޕީއަށް އިތުބާރު ނުކުރެއްވޭ ކަމަށް ވެސް ވިދާޅުވެފައެވެ.
ޖެނުއަރީ މަހު ބޭއްވި އެމްޑީޕީގެ ޕްރައިމަރީއަށް ފަހު ނަޝީދު ވަނީ ރައީސް ޞާލިޙަށް ތާއީދު ކުރައްވަން ދެކޮޅު ހައްދަވައިފައެވެ. އެއަށް ފަހު، ދެ ބޭފުޅުންގެ ގުޅުން އިތުރަށް ގޯސްވެ، އެންމެ ފަހުން ނަޝީދުގެ ގާތް ބޭފުޅުން ވަނީ ޕާޓީން ވަކިވެފައެވެ. އަދި، ދަ ޑިމޮކްރެޓްސްގެ ނަމުގައި އާ ސިޔާސީ ޕާޓީއެއް އުފައްދައިފައެވެ.
އިލެކްޝަންސް ކޮމިޝަނުން އެ ޕާޓީ ރަޖިސްޓްރީ ކޮށްދިނުމުން، ނަޝީދު ވެސް ވަނީ އެމްޑީޕީން ވަކިވެ، ޑިމޮކްރެޓްސްއަށް ސޮއިކޮށްފައެވެ.
ނިމިދިޔަ ރިޔާސީ އިންތިޚާބުގެ ފުރަތަމަ ބުރުގައި ހަތް އިންސައްތަ ލިބުނު ޑިމޮކްރެޓްސްގެ ވަގުތީ ކައުންސިލުން ވަނީ މައި ދެ ޕާޓީއަށް ވެސް ބޮޑެތި ޝަރުތުތަކެއް މަތިކޮށްފައެވެ. އެކަމަކު، ފަހުން އެއްވެސް ޕާޓީއަކަށް ތާއީދު ނުކުރާން ނިންމީ އެއްވެސް ޕާޓީއަކުން ޑިމޮކްރެޓްސްގެ ޝަރުތުތަކަށް އެއްބަސްނުވުމުން ކަމަށް އެ ޕާޓީގެ ވަގުތީ ޗެއާޕާސަން ހަސަން ލަތީފު ވެސް އޭރު ވިދާޅުވިއެވެ.