ނިމިދިޔަ ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސްއިން އެއްވެސް ޕާޓީއަކަށް ތާއީދު ނުކޮށްފި ނަމަ، ނިޒާމީ ވޯޓަށް ފުރިހަމައަށް އެއްބާރުލުން ދޭން އެމްޑީޕީން އެއްބަސްވެފައިވާ ކަމަށް ރައްޔިތުންގެ މަޖިލީހުގެ ރައީސް އަދި ޑިމޮކްރެޓްސްގެ ބާނީ މުހައްމަދު ނަޝީދު މިއަދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ވަނީ ނިޒާމީ ވޯޓާ ގުޅޭ ގޮތުން އިލެކްޝަންސް ކޮމިޝަނުން ސާފު ކުރަން އެދިފައިވާ ކަންކަން ތަޅުމަށް ހުށަހަޅައި، އެއަށް ބަހުސްކޮށްފައެވެ.
ސައިގެ ވަގުތަށް މަޖިލީސް މެދުކަނޑައިލަމުން ރިޔާސަތުގައި އިންނަވައި ނަޝީދު ވިދާޅުވީ، އިންތިޚާބުގެ ދެވަނަ ބުރުގައި ޑިމޮކްރެޓްސްއިން ވަކި ބަޔަކަށް ތާއީދު ނުކޮށް ތިބެއްޖެ ނަމަ، ނިޒާމީ ވޯޓަށް ފުރިހަމައަށް އެއްބާރުލުން ދެއްވާނެ ކަމަށް އެމްޑީޕީން، ޑިމޮކްރެޓްސްގެ މެންބަރުން ގާތުގައި ބުނެފައިވާ ކަމަށެވެ.
"އަޅުގަނޑަށް އެނގިފައި އޮތް ގޮތުގައި ޑިމޮކްރެޓްސް ކައިރިން އެދިފައި އޮތީ އެ ޕާޓީން ވަކި ބަޔަކަށް ތާއީދު ނުކޮށް ތިބެއްޖެ ނަމަ، އެމްޑީޕީން ފެންނަ ނުފެންނަ ވޯޓަށް ފުރިހަމައަށް ތާއީދު ކުރައްވާނެ ކަމަށް،" އެ މަނިކުފާނު ވިދާޅުވިއެވެ.
ރައްޔިތުންގެ މަޖިލީހުގެ ޖަލްސާއެއްގައި މަޖިލީހުގެ ރައީސް މުހައްމަދު ނަޝީދު -- ފޮޓޯ/ މަޖިލިސް
ނަޝީދު ވިދާޅުވީ، އެ މަގުން އަމަލު ކުރާނެ ކަމުގެ ސިޓީއެއް ވެސް އެމްޑީޕީން، ޑިމޮކްރެޓްސް އަތުން ހޯދާފައިވާ ކަމަށެވެ. އެކަމަކު، ޑިމޮކްރެޓްސްގެ ސިޓީއަށް އެމްޑީޕީން ފޮނުވަން ޖެހޭ ޖަވާބު ނުފޮނުވާކަން ފާހަގަކުރައްވައި، އެ މަނިކުފާނު ވިދާޅުވީ އެމްޑީޕީއަކީ ބަހުގެ އިތުބާރު ހިފޭ ބާވަތުގެ ޕާޓީއެއް ކަމަށް ގަބޫލުފުޅު ނުކުރައްވައި ކަމަށެވެ.
"އަޅުގަނޑު ނުދަންނަވަން އެމްޑީޕީއަކީ ބަހުގެ އިތުބާރު މި ވަގުތު ހިފޭ ބާވަތުގެ ޕާޓީއެއް ކަމަކަށް. އެހެންނަމަވެސް ކަންކަން ހިނގާފައި އޮތްގޮތް ހަމަ ދަންނަވާލީ،" ހިނިފުޅުވަޑުވަމުން ނަޝީދު ވިދާޅުވިއެވެ.
ރިޔާސީ އިންތިޚާބުގެ ފުރަތަމަ ބުރުގައި ހަތް އިންސައްތަ ވޯޓު ލިބިވަޑައިގެން ޑިމޮކްރެޓްސްގެ ވަގުތީ ކައުންސިލުން ނިންމީ ދެވަނަ ބުރުގައި އެއްވެސް ޕާޓީއަކަށް ތާއީދު ނުކުރާށެވެ. އަދި، އެއަށް ފަހު އެ ޕާޓީން ވަނީ ނިޒާމީ ވޯޓެއް ނަގަން މަޖިލީހަށް ހުށަހަޅައި، ނިޒާމު ފޮރުޅައިލުމާ ގުޅޭ ގޮތުން ޕާޓީތަކާ އެކު މަޝްވަރާ ކުރެވޭތޯ މަސައްކަތް ކޮށްފައެވެ.
ޑިމޮކްރެޓްސްއިން އެދުނު ގޮތަށް މި ހިނގާ އޮކްޓޫބަރު 30ގެ ކުރިން ނިޒާމީ ވޯޓެއް ނަގަން އޭރު ފާސްކުރީ މަޖިލީހުގައި ތިއްބެވި އެމްޑީޕީ މެންބަރުންގެ ތާއީދާ ވެސް އެކުގައެވެ.
އެކަމަކު، މިހާރު އެމްޑީޕީގެ އިސް ލީޑަރު އަދި ރައީސް އިބްރާހިމް މުހައްމަދު ޞާލިޙް ވަނީ ނިޒާމީ ވޯޓެއް ނެގުމާއި އަދި ބަރުލަމާނީ ނިޒާމާ ވެސް ޕާޓީގެ 99 އިންސައްތަ ބޭފުޅުން ދެކޮޅު ކަމަށް ވިދާޅުވެފައެވެ. އެއާ އެކު ނަޝީދަށް ތާއީދު ކުރައްވައި މެންބަރުން މިއަދު ވަނީ ނިޒާމީ ވޯޓު ނަގައި ތާރީޚު ފަސްކޮށްލަން ތާއީދުކޮށް، ވާހަކަފުޅު ދައްކަވައިފައެވެ.