މި މަހު 30ގެ ކުރިން ނަގަން ނިންމާފައި އިލެކްޝަންސް ކޮމިޝަނަށް އަންގާފައި އޮތް ނިޒާމީ ވޯޓު، އެ ތާރީޚުގައި ނުނެގޭނެ ކަމަށް، އެ ވޯޓު ނަގަން އެންމެ ބޮޑަށް ވަކާލާތު ކުރައްވައި ދަ ޑިމޮކްރެޓްސްގެ މެންބަރުން ގޮވާލަން ފަށައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް އޮތީ، ނިޒާމާ ގުޅޭ ވޯޓާ ގުޅިގެން އިލެކްޝަންސް ކޮމިޝަން (އީސީ)ން މަޖިލީހަށް ފޮނުވާފައި އޮތް ސިޓީގެ މައްސަލަ އެޖެންޑާ ކޮށްފައެވެ. އެ ކޮމިޝަންގެ ސިޓީގައި ވަނީ ނިޒާމާ ބެހޭ ވޯޓުގައި އޮންނަން ވާނެ ސުވާލު ސާފުކޮށްދޭން އެދިފައެވެ. އަދި، އިންތިޒާމުތައް ހަމަޖައްސައި، ވޯޓު ނެގޭނެ ސީދާ ތާރީޚެއް ފަހުން މަޖިލީހުގެ އިދާރާއަށް އަންގާނެ ކަމަށް އެ ސިޓީގައި ވަނީ ބުނެފައެވެ.
އެ ސިޓީއާ ގުޅިގެން ބަހުސް ކުރައްވަމުން މިއަދުގެ ޖަލްސާގައި ޑިމޮކްރެޓްސްގެ ވަގުތީ ޗެއާޕާސަން އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ، ނިޒާމާ ބެހޭ ވޯޓެއް ނަގާއިރު ރައްޔިތުން ހޭލުންތެރި ކުރުވުމުގެ ވަރަށް ގިނަ މަސައްކަތްތައް ކުރަން ޖެހިފައި އޮތް ކަމަށެވެ.
އެކަމަކު، ނިޒާމީ ވޯޓެއް ނަގަން މަޖިލީހުން ފާސްކުރިތާ އެތައް ދުވަހެއް ވެފައިވާއިރު، މަޖިލީހުން އެ ކަމާ ގުޅިގެން އެންމެ އެކަށޭނެ މަސައްކަތެއް ނުކުރެވޭކަން އޭނާ ވަނީ ފާހަގަ ކުރައްވައިފައެވެ.
"އެހެންވީމާ މިހާރު ބާކީ މިއޮތީ ވަރަށް ކުރު މުއްދަތެއް. މި ވޯޓުގެ މަސައްކަތް ކޮށްގެން ވޯޓެއް ނަގަން އޮކްޓޫބަރު 28 ވިޔަސް އަދި 31 ވިޔަސް ވެސް. އެހެންވީމާ މި ދެންނެވި ހުރިހާ ކަމަކަށް ރިއާޔަތް ކުރާއިރު، ވިސްނާއިރު އަޅުގަނޑު ހިތުން އަޅުގަނޑުމެން ފުންކޮށް ވިސްނަން ޖެހޭ ކަމެއް އެއީ ރައްޔިތުންނަށް އެންމެ އެކަށިގެންވާ ގޮތަށް މި ނިޒާމުތަކުގެ މައުލޫމާތު ނިޒާމުގައި ހުރި މުހިއްމު ކަންކަމުގެ މައުލޫމާތު ފޯރުކޮށްދެވިދާނެތޯ،" އޭނާ ވިދާޅުވިއެވެ.
ހަސަން ވިދާޅުވީ، އެހެންވެ ނިޒާމީ ވޯޓާ މެދު ގޮތެއް ނިންމާއިރު އެ ކަންކަމަށް ރިއާޔަތްކޮށްފައި ގޮތެއް ނިންމުމަކީ ވަރަށް މުހިއްމު ކަމެއް ކަމަށް ގަބޫލުކުރައްވައި ކަމަށެވެ.
"އެ ހުރިހާ ކަމަކަށް ރިއާޔަތް ކުރުމަށް ފަހު އަޅުގަނޑުމެން ފަހުން ތާރީޚެއް ކަނޑައެޅުމަކީ އަޅުގަނޑު ހިތުން މުހިއްމު ކަމެއް،" އޭނާ ވިދާޅުވިއެވެ.
ހަސަންގެ ވާހަކަފުޅަށް އިޝާރާތް ކުރައްވައި ރިޔާސަތުގައި އިންނެވި ނަޝީދު ވިދާޅުވީ، މަޖިލީހުން ވަކި ތާރީޚެއްގައި ނިޒާމީ ވޯޓެއް ނަގަން ފާސްކުރި ނަމަވެސް ވޯޓެއް ނެގޭނެ ސީދާ ތާރީޚެއް ކަނޑައެޅޭނީ މަޖިލީހުން ކުރަން ޖެހޭ މަސައްކަތްތައް ކޮށް ނިމުމުން ކަމަށް އީސީން ވިދާޅުވެފައިވާ ކަމަށެވެ. އެހެންވެ، ނިޒާމީ ވޯޓެއް ނަގާ ތާރީޚަށް ބަދަލު ގެނެވިދާނެ ކަމަށް އެ މަނިކުފާނު ވިދާޅުވިއެވެ.
"އަޅުގަނޑަށް ފެންނަ ތަނުގައި ވަގުތު، ތާރީޚް އެއީ ތި ބޭފުޅުންނާއި އިއްޒަތްތެރި މެންބަރުން ނިންމާ ގޮތަކާއި އިލެކްޝަންސް ކޮމިޝަނާ ދެމެދު ވެވޭ އެއްބަސްވުމަކަށް ވެގެންދާނީ،" އެ މަނިކުފާނު ވިދާޅުވިއެވެ.
އެއަށް ފަހުގައި ވާހަކަފުޅު ދައްކަވަމުން ނަޝީދުގެ ދެބެއިންގެ ދެ ދަރި ކޮއްކޯފުޅު އަދި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ، ނިޒާމީ ވޯޓަކަށް ދިއުމުގެ ކުރިީގައި ރައްޔިތުން އެ ކަމަށް ހޭލުންތެރިކުރުމުގެ އިތުރުން އެ ކަމާ ބެހޭ މަޝްވަރާތައް ސިޔާސީ ޕާޓީތަކާ އެކުގައި ވެސް ކުރަން ޖެހޭ ކަމަށެވެ.
އެކަމަކު، ރިޔާސީ އިންތިޚާބުގައި މައި ދެ ޕާޓީން މަސްއޫލުވުމާ ގުޅިގެން މިހާތަނަށް އެކަން ނުކުރެވިވާކަން ފާހަގަކޮށް، އީވާ ވެސް ވަނީ ނިޒާމީ ވޯޓު ފަސްކޮށްލަން ފެނިވަޑައިގަންނަވާ ކަމަށް ވިދާޅުވެފައެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ -- ފޮޓޯ/ މަޖިލިސް
"އަޅުގަނޑުމެން އެބަ ވިސްނާލަން ޖެހޭ ނިޒާމީ ވޯޓަކަށް ދެން އޮތީ ދެ ހަފުތާ. އަޅުގަނޑުމެން ވަގުތު ކަނޑައަޅާފައި މިއޮތް ގޮތުން. އެ ވަގުތު ތެރޭގައި އެކަން ކުރެވޭނެތޯ؟"
"މިކަން ކުރުމުގައި ވިސްނަން ހަމައެކަނި ޖެހެނީކީއެއް ރައްޔިތުންގެ މަޖިލީސް މެންބަރުންނަށް މި ކަމުގައި ކުރަން ހުރި މަސައްކަތްތައް ކުރެވޭނެތޯއާއި ނުވަތަ އިލެކްޝަންސް ކޮމިޝަނުން ފުރިހަމަ ކުރަން ހުންނަ ލޮޖިސްޓިކްސްގެ ކަންކަން ފުރިހަމަ ކުރެވޭނެތޯއެއް ނޫން. ހަގީގީ ސުވާލަކީ ރައްޔިތުންނާ ހަމައަށް މި މައުލޫމާތު އަޅުގަނޑުމެންނަށް ފޯރުކޮށްދޭން ޖެހޭ މިންވަރަށް ފޯރު ކޮށްދެވިއްޖެތޯ؟"
އެހެންވެ، އީވާ ވެސް ވަނީ ހަސަން ވިދާޅުވި ފަދައިން ނިޒާމީ ވޯޓު މިހާރު ކަނޑައަޅާފައި އޮތް ގޮތަށް މި މަހު ނަގަން ނުފެންނަ ކަމަށް ވިދާޅުވެފައެވެ.
ރައްޔިތުންގެ މަޖިލީހުގެ ރިޔާސަތުގައި ރައީސް މުހައްމަދު ނަޝީދު -- ފޮޓޯ/ މަޖިލިސް
އީވާގެ ވާހަކަފުޅަށް ފަހު ރިޔާސަތުގައި އިންނެވި ނަޝީދު ވިދާޅުވީ، އީސީއަށް މިކަން ވަރަށް ސާފު ކަމަށެވެ. އެހެންވެ، މަޖިލީހުން އެ ވޯޓާ ގުޅިގެން ނިންމަން ޖެހޭ ނިންމުންތައް ނިންމުމުން އެ ކޮމިޝަނަށް ފެންނަ ތާރީޚެއް ދެއްވާނެ ކަމަށް ގަބޫލުކުރައްވައި ކަމަށް އެ މަނިކުފާނު ވިދާޅުވިއެވެ.
"އަޅުގަނޑު ދެކޭ ގޮތުގައި މި ތާރީޚުގެ މައްސަލަ މިއީ ނިމިފައި އޮތް މައްސަލައެއް. އަޅުގަނޑުމެންނަށް އޮނަތިރީހުގައި މިކަން ކުރެވެން ނެތް ކަމަށް އިލެކްޝަންސް ކޮމިޝަނުން ވަރަށް ސާފުކޮށް އެބައޮތް. އެހެންވީމާ ތާރީޚެއް އަދި ކުރިއަށް އޮތް ތަނުގައި ކަނޑައެޅިގެން ދާނެ ކަމަށް،" ނަޝީދު ވިދާޅުވިއެވެ.
ނިޒާމީ ވޯޓެއް ނަގަން މަޖިލީހަށް ގަރާރެއް ހުށަހެޅުއްވީ ހުޅުދޫ ދާއިރާގެ މެންބަރު އިލްޔާސް ލަބީބެވެ. އަދި، އިސްލާހަކާ އެކު 30 އޮކްޓޫބަރުގެ ކުރިން އެ ވޯޓު ނަގަން އެމްޑީޕީ މެންބަރުންގެ ތާއީދާ ވެސް އެކު ވަނީ ފާސްކޮށްފައެވެ. އެ ގަރާރަށް ކޮމިޓީގައި ވޯޓަށް އެހިއިރު ހާޒިރުވެތިބި 34 މެންބަރުންގެ ތެރެއިން 31 މެންބަރުން ވަނީ އިލްޔާސްގެ އިސްލާހާއެކު ގަރާރު ފާސްކުރަން ތާއިދުކޮށްފައެވެ.
ނިޒާމީ ވޯޓެއް ނަގަން އެމްޑީޕީން އޭރު ވޯޓު ދިން ނަމަވެސް، އެ ޕާޓީގެ އެންމެ އިސް ލީޑަރު، ރައީސް އިބްރާހިމް މުހައްމަދު ޞާލިޙް އިއްޔެ ވިދާޅުވީ، އެ ޕާޓީގެ 99 އިންސައްތަ ބޭފުޅުން ބަރުލަމާނީ ނިޒާމާ ދެކޮޅު ކަމަށެވެ. އަދި، އިދިކޮޅު ޕީޕީއެމް/ޕީއެންސީން ވެސް ވަނީ އެ ޕާޓީން ބަރުލަމާނީ ނިޒާމަކަށް ތާއީދު ނުކުރާނެ ކަމަށް ވިދާޅުވެފައެވެ.
ބަރުލަމާނީ ނިޒާމަކަށް މިހާރު ތާއީދު ކުރައްވައި، މަސައްކަތް ކުރައްވަނީ ނަޝީދެވެ.