ރާއްޖޭގެ ވެރިކަމުގެ ނިޒާމު ބަދަލުކުރަން ފެންނަ ނުފެންނަ ވޯޓެއް ނެގުމަށް ފަހު, އެކަމާ ގުޅުން ހުރި ގާނޫނީ އިސްލާހެއް ގެންނަ ނަމަ އިތުރަށް ރައްޔިތުންގެ ހިޔާލު ހޯދަން ނުޖެހޭ ގޮތަށް ގާނޫނުއަސާސީއަށް އިސްލާހު ގެންނަން ދަ ޑިމޮކްރެޓްސްއިން ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.
ވެރިކަމުގެ ނިޒާމު ރިޔާސީ ނިޒާމަކުން ބަރުލަމާނީ ނިޒާމަކަށް ބަދަލުކުރުމަށް މަސައްކަތް ކުރަމުން ދަނީ ޑިމޮކްރެޓްސްއިންނެވެ.
މިދިޔަ މަހުގެ 12 ވަނަ ދުވަހު ޑިމޮކްރެޓްސްއަށް ނިސްބަތްވާ ހުޅުދޫ ދާއިރާގެ މެންބަރު އިލްޔާސް ލަބީބު ހުށަހެޅުއްވި ގަރާރުގައި ވަނީ މިމަހުގެ 30ގެ ކުރިން ނިޒާމީ ވޯޓެއް ނެގުމަށެވެ. އެ ގަރާރު ފާސްކުރުމަށް ފަހު އިލެކްޝަންސް ކޮމިޝަނަށް ހުށަހެޅުމުން އީސީން ވަނީ އެ ކޮމިޝަނުން ސާފުކުރަން ބޭނުންވާ ކަންކަން ސާފުވެއްޖެ ނަމަ އަންނަ މަހުގެ 29ގައި އެ ވޯޓު ނެގުމަށް މަސައްކަތް ކުރަމުންދާ ކަމަށް ބުނެފައެވެ.
އެއާއެކު ޑިމޮކްރެޓްސްއަށް ނިސްބަތްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ މިދިޔަ ހޯމަ ދުވަހު ވަނީ ގާނޫނު އަސާސީއަށް އިސްލާހެއް ގެނައުމަށް ބިލެއް ހުށަހަޅުއްވާފައެވެ. އަދި ނިޒާމާ ގުޅޭ މައްސަލާގައި މާދަމާ ޖަލްސާއެއް ބާއްވަން މަޖިލީހުން މިއަދު ވަނީ ނިންމާފައެވެ.
އިމްތިޔާޒް ހުށަހެއްޅުއްވި ބިލުގައި ވަނީ، ގާނޫނު އަސާސީގެ 262 ވަނަ މާއްދާއަށް އިސްލާހު ގެނައުމަށެވެ.
އެ މާއްދާގައި މިހާރު އޮންނަ ގޮތުން، ގާނޫނު އަސާސީއަށް އިސްލާހު ގެނައުމަށް މަޖިލީހުން ފާސްކުރާ ބިލެއް ގާނޫނަކަށް ވާނީ ރައީސުލްޖުމްހޫރިއްޔާ އެ ބިލެއް ތަސްދީގު ކުރުމުންނެވެ. އަދި ގާނޫނު އަސާސީގައި ބަޔާންކޮށްފައިވާ ތިން ކަމަކަށް އިސްލާހު ގެނައުމަށް ރައްޔިތުންގެ މަޖިލީހުން ފާސްކުރާ ބިލެއް ރައީސުލްޖުމްހޫރިއްޔާއަށް ތަސްދީގު ކުރެވޭނީ ރައްޔިތުން ރުހޭތޯ ބެލުމަށް ނަގާ އާންމު ވޯޓެއްގައި، އެ އިސްލާހެއް ގެނައުމަށް އަގުލަބިއްޔަތު ލިބިއްޖެ ނަމައެވެ.
އެ ތިން ކަމަކީ ގާނޫނު އަސާސީގައި, އަސާސީ ހައްގުތަކާއި މިނިވަންކަން ބަޔާންކުރާ ދެވަނަ ބާބުގައި ހިމެނޭ އެއްވެސް މާއްދާއެއް, ރައްޔިތުންގެ މަޖިލީހުގެ އުމުރު އަދި ރައީސުލްޖުމްހޫރިއްޔާ އިންތިހާބު ކުރާ ގޮތެވެ.
އިމްތިޔާޒް ހުށަހަޅުއްވާފައި ވަނީ ގާނޫނު އަސާސީގެ 262 ވަނަ މާއްދާގެ ފަހަތަށް އަކުރެއް އިތުރު ކުރުމަށެވެ.
އޭގައި ވަނީ، "މި މާއްދާގެ (ށ) ގައި އެހެން އޮތްކަމުގައި ވިޔަސް، ގާނޫނު އަސާސީއަށް އިސްލާހެއް ގެނައުމަށް ރައްޔިތުންގެ މަޖިލީހުން ފާސްކުރާ ބިލެއްގައި، މި ގާނޫނު އަސާސީގެ 70 ވަނަ މާއްދާގެ (ށ)ގެ ދަށުން ރައްޔިތުންގެ މަޖިލީހަށް ލިބިގެންވާ ގާނޫނު ހެދުމުގެ އާންމު ބާރުތަކުގެ ތެރެއިން، ރައްޔިތުންނާ ގުޅޭ މުހިންމު ކަމެއްގައި ރައްޔިތުންގެ ހިޔާލު ހޯދުމުގެ އާންމު ވޯޓެއް ނަގާފައިވާ ކަމެއް ހިމެނޭ ނަމަ، ނުވަތަ އެ ކަމަކާ ގުޅިގެން އިތުރު އިސްލާހެއް ގެނެސްފައިވާ ނަމަ، އެ ބިލަކަށް ރައްޔިތުންގެ ރުހުން އޮތްތޯ ބެލުމަށް ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމެއް ނޯންނާނެއެވެ،" މިގޮތަށެވެ.
އެގޮތުން މާދަމާ ބާއްވާ ރައްޔިތުންގެ މަޖިލީހުގެ އެޖެންޑާގައި މި އިސްލާހު ހުށަހެޅުން ވަނީ ހިމަނާފައެވެ.
ނިޒާމީ ވޯޓާ ގުޅޭ ގަރާރުގެ ބަހުސްގައި މަޖިލީހުގެ ރައީސް އަދި ދަ ޑިމޮކްރެޓްސްގެ ބާނީ މުޙައްމަދު ނަޝީދު ވަނީ ވެރިކަމުގެ ނިޒާމު ކަނޑައެޅުމަށް ޓަކައި ރައްޔިތުންގެ ފެންނަ ނުފެންނަ ވޯޓެއް ނަގައި އެކަން އަވަސްކުރުމަށް ޓަކައި ގާނޫނު އަސާސީގެ 262ވަނަ މާއްދާއަށް އިސްލާހު ގެނެވޭނެ ކަމަށް ވިދާޅުވެފައެވެ.
ނަޝީދު ވިދާޅުވީ ގާނޫނުއަސާސީގެ 262ވަނަ މާއްދާގެ (ށ)އަށް ގެނެވޭ އިސްލާހާއެކު 70 ވަަނަ މާއްދާގެ ދަށުން ނަގާ ވޯޓަކުން، އެ ވޯޓު ނަގައިފައި އޮއްވައި ދެން އަލުން ރައީސުލްޖުމްހޫރިއްޔާއަށް އެ ފަދަ ގާނޫނެއް ތަސްދީގުކުރުމުގެ ކުރިން ފެންނަ ނުފެންނަ ވޯޓެއް ނަގަން ނުޖެހޭނެ ކަމަށެވެ.
ގާނޫނު އަސާސީ އިސްލާހުކުރުމުގެ ބާބުގެ 262ވަނަ މާއްދާގެ (ށ)ގައިވަނީ ރައީސުލްޖުމްހޫރިއްޔާ ބިލެއް ގާނޫނަކަށް ތަސްދީގުކުރަންވާނީ އެ އިސްލާހެއް ގެނައުމަށް ރައްޔިތުން ރުހޭތޯ ބެލުމަށް ނަގާ ޚިޔާލު ހޯދުމުގެ އާންމު ވޯޓަކުން އަޣުލަބިއްޔަތު ލިބިއްޖެނަމަ ކަމަށެވެ. ނުލިބޭނަމަ އެ ބިލެއް ބާތިލްވާނެއެވެ.
ހަތްދިހަ ވަނަ މާއްދާގެ ހަވަނަ ނަމްބަރުން މަޖިލީހަށް ވަނީ ރައްޔިތުންނާ ގުޅޭ މުހިންމު ކަމެއްކަމަށް މަޖިލީހަށް ފެންނަ ކަންކަމުގައި އާންމުންގެ ޚިޔާލު ހޯދުމުގެ ވޯޓަކަަށް ދިއުމުގެ ބާރު ދީފައެވެ.
އެހެންކަމުން މި ދެ މާއްދާގައި އެއްކަމެއް ތަކުރާރުވާތީ މަޖިލީހުން ނަގާ ވޯޓަށްފަހު ރައީސުލްޖުމްހޫރިއްޔާއަށް އިތުރު ވޯޓެއް ނަގަން ނުޖެހޭ ގޮތަށް 262ވަނަ މާއްދާގެ (ށ) އިސްލާހުކުރެވިދާނެ ކަމަށް ނަޝީދު ވިދާޅުވެފައިވެއެވެ.