ބެއިޖިން (5 ސެޕްޓެމްބަރު 2023): އަންނަ ހޮނިހިރު ދުވަހާއި އާދިއްތަ ދުވަހު އިންޑިއާގެ ވެރިރަށް ނިއުދިއްލީގައި ބޭއްވުމަށް ހަމަޖެހިފައިވާ ޖީ20ގެ ގައުމުތަކުގެ އިސްވެރިންގެ ސަމިޓްގައި ޗައިނާގެ ރައީސް ޝީޖިންޕިން ބައިވެރިވެ ވަޑައިނުގަންނަވާނެކަން ޗައިނާ ކަށަވަރުކޮށްދީފިއެވެ.
މިކަން ކަށަވަރުކޮށްދެމުން ޗައިނާގެ ޚާރިޖީ ވުޒާރާގެ ތަރުޖަމާން މައޯ ނިންގް ވިދާޅުވީ އިންޑިއާގައި ބާއްވާ ޖީ 20 ސަމިޓްގައި ޗައިނާ ތަމްސީލުކުރާ ވަފުދުގެ އިސްވެރިއަކީ ޗައިނާގެ ބޮޑުވަޒީރު ލީ ޗިއަންގް ކަމުގައެވެ.
މިސަމިޓްގައި ޝީ ބައިވެރިވެވަޑައިގަންނަވާނެކަމަށް ތަންކޮޅެއް ކުރިން އޭނާ ވިދާޅުވިއެވެ. ނަމަވެސް މިދިޔަ ހަފުތާގައި ޗައިނާ އިން އާންމުކުރި އެ ގައުމުގެ ސަރަހައްދީ ރޮނގުގެ ޗާޓުގައި ޗައިނާއާއި އިންޑިއާގެ މެދުގައި މިލްކުވެރިކަމުގެ އަރާރުންތައް އުފެދިފައިވާ ސަރަހައްދުތައް ޗައިނާގެ ތަންތަނުގެ ގޮތުގައި ހަމަޖައްސާފައި ވުމުގެ ސަބަބުން އިންޑިއާގެ ރުޅިވެރިކަންވަނީ ވަރަށް މައްޗަށް ގޮސްފައެވެ.
މިއާއެކު ދެގައުމުގެ ގުޅުންތައް މިހާރުވަނީ އާދަޔާ ޚިލާފަށް ގޯސްވެފައެވެ. މުހައްލިލުން ދެކޭގޮތުގައި ޝީ އިންޑިއާއަށް ވަޑައިނުގަންނަން ނިންމެވި މައިގަނޑު ސަބަބަކީ ޗައިނާއާމެދު އިންޑިއާގެ ނުރުހުން އިތުރުވުންކަމަށްވުން ވަރަށް ގާތެވެ.
އިންޑިއާއާއި ޗައިނާގެ ސަރަހައްދީ ރޮނގުގެ މައްސަލައަކީ ޒަމާންވީ މައްސަލައެކެވެ. އެ މައްސަލާގައި 1962 ވަނަ އަހަރު ދެގައުމުން ހަނގުރާމަވެސް ކޮށްފައިވެއެވެ. ދެގައުމުގެ ދެމެދުގައި މިލްކުވެރިކަމުގެ އަރާރުން އުފެދިފައިވާ ބިންތައް ގިނައީ ހިމާލިޔާ ސަރަހައްދުގައެވެ.
އެސަރަހައްދުގެ ބައެއް ބިންތައްކަމަށްވާ އަރުޗަނަލް ޕްރަދޭޝް އާއި އަކްސާއި ޗިން ޕްލެޓޫ އަކީ ޗައިނާގެ އިތުރުން އިންޑިއާވެސް އެގައުމުގެ ބިންތައްކަމަށް ދައުވާކުރާ ބިންތަކެކެވެ. ޗައިނާ ނެރުނު އެގައުމުގެ އައުޗާޓުގައި މިބިންތައް ޗައިނާގެ ބިންތަކުގެ ގޮތުގައ ހިމަނާފައިވާތީ އިންޑިއާގެ ރުޅިވެރިކަންވަނީ އިންތިހާއަށް މައްޗަށް ގޮސްފައެވެ. ޗައިނާއާ ހަނގުރާމަކޮށްގެން މި ބިންތައް އަތުލުމަކީ އިންޑިއާއަށް ކުރަން ފަސޭހަ ކަމަކަށް ނުވާނެއެވެ. 1962 ގެ ހަނގުރާމައިގާވެސް ބޮޑަށް ގެއްލުން ލިބުނީ އިންޑިއާ އަށެވެ.
ޖީ20 ޖަމާއަތަކީ ދުނިޔޭގައި އިގްތިސާދީ ގޮތުން އެންމެ ބޮޑަށް ކުރިއަރާފައިވާ ގައުމުތައް ހިމެނޭ ޖަމާއަތެވެ. މިޖަމާއަތުގައި 20 ގައުމު ހިމެނޭއިރު އެމެރިކާއަކީ އިގްތިސާދީ އެއްވަނަ ބާރެވެ. ޗައިނާއަކީ އިގްތިސާދީ ގޮތުން ދުނިޔޭގެ ދެވަނަ ބާރެވެ. އިންޑިއާއަކީ އިގްތިސާދީ ގޮތުން ދުނިޔޭގެ ހަވަނަ ބާރެވެ.
އިންޑިއާ ޖީ20 ގެ ރިޔާސަތާ ހަވާލުވީ މިދިޔަ އަހަރުގެ ޑިސެމްބަރު މަހުގައެވެ. އެމެރިކާގެ ރައީސް ޖޯ ބައިޑެންވަނީ ނިއުދިއްލީގައި ބާއްވާ ޖީ 20 ގެ ސަމިޓުގެ އަރިމަތީގައި ޗައިނާގެ ރައީސް ޝީޖިންޕިން އާ ބައްދަލުނުވެދާނެތީ އެކަމާމެދު ދެރަވާކަމަށް ވިދާޅުވެ ތަންކޮޅެއް ކުރިން ވާހަކަ ދައްކަވާފައެވެ. އޭރު މިސަމިޓަށް ޝީ ވަޑައިނުގަންނަވާނެކަން ކަށަވަރު ވެފައެއް ނުވެއެވެ.
މީގެ ދެހަފުތާކުރިން ދެކުނު އެފްރިކާގައި ބޭއްވި ބްރިކްސް ޖަމާއަތުގެ ސަމިޓްގެ އަރިމަތީގައި ޗައިނާގެ ރައީސް އާއި އިންޑިއާގެ ބޮޑުވަޒީރުވަނީ ވަކިން ބައްދަލުކުރައްވާފައެވެ.