މަޑަގަސްކަރައިގައި ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖޭގެ ޕެރަ އެތުލެޓިކްސް ޓީމުގައި ހިމެނޭ އަބްދުލް ރައްޒާގު އަބްދުލް ސަމަދާއި ފާތިމަތު އިބްރާހީމް (ފާތުން) ލޯ މެޑަލް ހޯދައިފިއެވެ.
އައިއޯއައިޖީގެ ތާރީހުގައި ޕެރަ އެތުލެޓިކްސް އިން ފުރަތަމަ ފަހަރަށް ރާއްޖެއަށް މެޑަލްތައް ހޯދައިދިން ރައްޒާގު އަދި ފާތުން ވެސް އެ ކާމިޔާބީ ހޯދާފައިވަނީ 100 މީޓަރު ދުވުމުންނެވެ.
ފިރިހެނުންގެ 100 މީޓަރު ދުވުމުން ރައްޒާގު ލޯ މެޑަލް ހޯދީ އިއްޔެ ކުރިއަށްގެންދިޔަ ފައިނަލް ހީޓުގައި 13.74 ސިކުންތުން ރޭސް ނިންމައިގެންނެވެ. އެ އިވެންޓުން ރަން މެޑަލް މަޑަގަސްގަރަ އިން ހޯދި އިރު، ރިހި މެޑަލް ހޯދީ މޮރިޝަސް އިންނެވެ.
އަންހެނުންގެ 100 މީޓަރު ދުވުމުން ފާތުން ލޯ މެޑަލް ހޯދީ އިއްޔެ ކުރިއަށްގެންދިޔަ ފައިނަލް ހީޓުގައި 17.34 ސިކުންތުން ރޭސް ނިންމައިގެންނެވެ. އެ އިވެންޓުގެ ރަން މެޑަލް މޮރިޝަސް އިން ހޯދި އިރު، ރިހި މެޑަލް ހޯދީ މަޑަގަސްކަރަ އިންނެވެ.
ފާތުން ވަނީ އިއްޔެ ދެ ގައުމީ ރެކޯޑެއް ވެސް އާކޮށްފައެވެ. ފާތުން އިއްޔެ ދުވި ހީޓް އިވެންޓު 17.80 ސިކުންތުން ރޭސް ނިންމައިގެން ރެކޯޑު އާކުރި އިރު، އޭނާ ވަނީ ފައިނަލް ހީޓުގައި އެ ރެކޯޑު މުގުރާލައިފައެވެ. އައިއޯއައިޖީގެ ކުރިން ވެސް އެ ރެކޯޑު އޮތީ ފާތުން އަތުގައެވެ. ޕެރަލިމްޕިކްސް 2021 ގައި އޭނާ އެ ރެކޯޑު ހަދާފައިވަނީ 18.06 ސިކުންތުން ރޭސް ނިންމައިގެންނެވެ.