ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ތާއީދު ލިބިވަޑައިގަތް ކަމަށް ވިދާޅުވެ އިދިކޮޅު މައި ޕާޓީ ޕީޕީއެމްގެ ނަމުގައި ރިޔާސީ އިންތިޚާބުގައި ވާދަކުރުމަށް އިލެކްޝަން ކޮމިޝަން (އީސީ) އަށް ފޯމް ހުށަހެޅުމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު މަސައްކަތް ކުރެއްވި ކަމަށް ޕީއެންސީގެ ރައީސް އަބްދުއްރަހީމް އަބްދުالله ތުހުމަތު ކުރައްވައިފިއެވެ.
ޕީޕީއެމްގެ ރިޔާސީ ޓިކެޓު ލިބިވަޑައިގަތް ޔާމީނަށް އިންތިޚާބުގައި ވާދަ ނުކުރެއްވޭނެކަން ކަށަވަރު ވުމުން ޕީޕީއެމް، ޕީއެންސީ ކޯލިޝަނުން ވަނީ އެއް ދުވަސް ތެރޭގައި ޕްރައިމަރީއަކަށް ގޮވާލައި ޑރ. މުހައްމަދު މުއިއްޒަށް ރިޔާސީ ޓިކެޓް ދިނުމަށް ނިންމާފައެވެ. އެކަމާ ހިތްހަމަ ނުޖެހުން ފާޅުކޮށް ވަހީދު ވަނީ ޕީޕީއެމުން ވަކިވެވަޑައިގެން ވާދަވެރި ޖުމްހޫރީ ޕާޓީއާ ގުޅިވަޑައިގަންނަވާފައެވެ. އަދި ވަހީދު ގެންދަވަނީ ޕީޕީއެމަށް ވަރަށް ބޮޑަށް ފާޑުވިދާޅުވަމުންނެވެ.
މުއިއްޒުއަށް ތާއީދު ހޯއްދެވުމަށް މިއަދު އައްޑޫ ސިޓީ ހުޅުދޫގައި ބޭއްވި ބައްދަލުވުމެއްގައި ޕްރޮގްރެސިވް ކޮންގްރެސް ކޯލިޝަން ހިންގެވުމާ ހަވާލުވެ ހުންނެވި އަބްދުއްރަހީމް ވަނީ ޑރ. ވަހީދަށް ވަރަށް ބޮޑަށް ފާޑުވިދާޅުވެ، ރައްދު ދެއްވައިފައެވެ.
މުއިއްޒުއަށް ތާއީދު ހޯއްދެވުމަށް މިއަދު އައްޑޫ ސިޓީ ހުޅުދޫގައި ބޭއްވި ބައްދަލުވުމުގައި ޕްރޮގްރެސިވް ކޯލިޝަން ހިންގެވުމާ ހަވާލުވެ ހުންނެވި އަބްދުއްރަހީމް ވާހަކަ ދައްކަވަނީ ---- ފޮޓޯ: އެލީޒް
ޕީޕީއެމްގެ ނަމުގައި އިތުރު ކެންޑިޑޭޓަކު ނެރުމަށް ވަގުތާއި ފުރުސަތު ލިބުނު ކަމަށް ވަހީދު ވިދާޅުވެފައިވާތީ އަބްދުއްރަހީމް ވަނީ އެ ކަމަށް ވެސް ރައްދު ދެއްވާފައެވެ. އޭނާ ވިދާޅުވީ ޕްލޭން ސީއަށް ދިޔައީ ޕްލޭން އޭ އަދި ޕްލޭން ބީ ވެސް ފެއިލްވުމުން ކަމަށެވެ.
"އެ ރޭ އިރު އޮއްސުނީއްސުރެ އަނެއް ދުވަހު އިރުއޮއްސެންދެން ނުނިދާ ވިއްޔާ އުޅުނީ. ފޯމްލާ ހިތުން. ފޯމުލާ ހިތުން ފޯމް ފުރައިގެން ހުރީ. ރައީސް ޔާމީންގެ ބަސްފުޅެއް ލިބޭތޯ. އެ ވަރުން ނުވެގެން ގުޅާފައި ބައެއް ބޭފުޅުންނަށް ދެންނެވި ރައީސް ޔާމީން ވިދާޅުވިއޭ ކުރިމަތިލައްވާށޭ," ވަހީދަށް ތުހުމަތުތަކެއް ކުރައްވައި އަބްދުއްރަހީމް ވިދާޅުވިއެވެ.
ވަހީދަށް ފާޑުކިޔުއްވަމުން އަބްދުއްރަހީމް ވިދާޅުވީ, އެ މަނިކުފާނަށް އިދިކޮޅުގެ ރިޔާސީ ޓިކެޓް ދޭން ޖެހޭ އެއްވެސް ސަބަބެއް ނެތް ކަމަށާއި މުއިއްޒު ޓިކެޓު ހޯއްދެވީ އޭނާގެ ކުޅަދާނަ ކަމުން ކަމަށެވެ. އަދި، ރިޔާސީ ޓިކެޓަށް ވަހީދު އުންމީދު ކުރެއްވުމުން އަބްދުއްރަހީމް ވަނީ ސުވާލު އުފައްދަވާފައެވެ.
"ވޭތުވެދިޔަ ފަސް އަހަރު ޕީޕީއެމަށް [ވަހީދު] ކޮށްދިނީ ކޮންކަމެއް ތޯ؟ ކޮން ހިދުމަތެއް ތޯ ކޮށްދިނީ؟ ކޮންތާކުތޯ އުޅުއްވީ؟ ދެން ހަމަ ރައީސް ޔާމީނަށް ކުރިމަތިނުލެވޭނެހެން ހީވީމަ ފިޔަދަމާލާފައި އޮތް ބާޒެއްހެން އައިސް ޕީޕީއެމް ޕީއެންސީ ތެރެއަށް ޖެހިގަނެފައި ޓިކެޓު ދޭށޭ ބުނީމަ އަޅުގަނޑުމެން ދޭނެތޯ," އަބްދުއްރަހީމް ވިދާޅުވިއެވެ.
ވަހީދު ޕީޕީއެމާ ގުޅިވަޑައިގަތީ އެ ޕާޓީ ޖަހައިގަތުމަށް ކަމަށް އަބްދުއްރަހީމް ތުހުމަތު ކުރެއްވިއެވެ. ނަމަވެސް ވަހީދަށް ވުރެ ކުޅަދާނަ ލީޑަރުންތަކެއް ޕީޕީއެމް/ޕީއެންސީގެ ތެރޭގައި ތިބުމުން ވަހީދުގެ ޕްލޭން ފެއިލްވި ކަމަށް އަބްދުއްރަހީމް ވިދާޅުވިއެވެ.
އިލެކްޝަންސް ކޮމިޝަނަށް މުއިއްޒުގެ ފޯމް ހުށަހެޅީ ރައީސް ޔާމީންގެ ފުރިހަމަ އެއްބާރުލުމާއި ތާއީދު ލިބިގެން ކަމަށް އަބްދުއްރަހީމް ވިދާޅުވިއެވެ. އެގޮތުން ފޯމް ހުށަހެޅުމަށް ދަރުބާރުގެއަށް ވަޑައިގަތްފަހުން ރައީސް ޔާމީންގެ އަނބިކަނބަލުން ގުޅުއްވައި ތާއީދު އޮތްކަން ހާމަކުރިކަމަށް އަބްދުއްރަހީމް ވިދާޅުވިއެވެ.
"ރައީސް ޔާމީން ވިދާޅުވިއޭ ޑރ. މުއިއްޒާ އެކު ކުރިއަށް ދާށޭ. އެހެން ވިދާޅުވި ފަހުން އަޅުގަނޑުމެން ފޯމް ހަވާލުކުރީ," އަބްދުއްރަހީމް ވިދާޅުވިއެވެ.