ރާއްޖެއަށް ޑިމޮކްރަސީ ގެނައީ ހަމައެކަނި ކުރީގެ ރައީސް މުހައްމަދު ނަޝީދުގެ މަސައްކަތުން ނޫން ކަމަށާއި، އެ ކަމުގެ ފަހަތުގައި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ބުރަ މަސައްކަތް ވެސް ހިމެނޭކަމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެއެވެ.
ށ. ފޭދޫގައި މިއަދު ބޭއްވި ގާސިމްގެ ކެމްޕޭން ޖަލްސާގައި ވާހަކަފުޅުދައްކަވަމުން ޑރ. ވަހީދު ވިދާޅުވީ ރާއްޖެއަށް ޑިކޮމްރަސީ ގެނައީ ފާއިތުވި 40 އަހަރު ގާސިމް ހިމެނޭހެން ގިނަބަޔަކު ކުރި ބުރަ މަސައްކަތުން ކަމަށެވެ.
އެމަނިކުފާނު ވިދާޅުވީ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން ހަމައެކަނި ޑިމޮކްރެޓިކް އުސޫލުން ކަންކަން ކުރައްވާ ބޭފުޅަކީ ގާސިމް ކަމަށެވެ.
''ޑިމޮކްރަސީ ރާއްޖެއަށް ގެނައީ ވަރަށް ބުރަ މަސައްކަތުން. ގާސިމް އިބްރާހީމް އޭގެ ފަހަތުގައި ހުންނެވި އެއް ލީޑަރު އެއީ. މިއީ މުހައްމަދު ނަޝީދު އެކަނި މިތަނަށް ގެނައި އެއްޗެއް ނޫން. އަޅުގަނޑުމެން އެންމެން މަސައްކަތް ކޮށްގެން ގެނައި އެއްޗެއް،'' ޑރ. ވަހީދު ވިދާޅުވިއެވެ.
ސަރުކާރަށް ފާޑުވިދާޅުވަމުން ޑރ. ވަހީދު ވިދާޅުވީ މި ސަރުކާރުން އުފެއްދީ ކޮރަޕްޓް މީހުންނާއި ޚިޔާނާތްތެރިން ކަމަށެވެ. އަދި ޑިމޮކްރެސީ ހިންގުމަށްޓަކައި މިއަދު ޖެހެނީ ވޯޓު ވެސް ގަންނަން ކަމަށް ވިދާޅުވެ މިއީ ރާއްޖެއަށް ގެނައި ޑިމޮކްރެސީތޯ އެމަނިކުފާނު ސުވާލު އުފެއްދެވިއެވެ.
އެމަނިކުފާނު ވިދާޅުވީ ގާސިމް ފިޔަވައި އިޚްލާސްތެރިކަމާއެކު ރައްޔިތުންނަށް ޚިދުމަތްކުރެއްވި ބޭފުޅަކު ނެތް ކަމަށެވެ.
''ދެންވެސް ހެޔޮކަންތައް ކޮއްދެއްވާނެ ބޭފުޅަކު އަޅުގަނޑަކަށް ނުފެނޭ. މި ބޭފުޅާގެ އަމިއްލަ ޚަރަދުގައި ލޯނު ދެއްވައިގެން ކިޔަވާ 8000 ކުދިން ރާއްޖޭގައި އެބަތިބި. ކުއްލި އަކަށް އެ ވިދާޅުވީ އެ ހުރިހާ ލޯނު ތަކަށް ތިމަންނާ މައާފު ކޮށްފީމޭ. ތިމަންނާއަށް ލާރި ދައްކާނެ ކަމެށް ނެތޭ،'' ގާސިމަށް ތައުރީފްކުރައްވައި ޑރ. ވަހީދު ވިދާޅުވިއެވެ.
ގާސިމް ފިޔަވައި އެތައް ހާސް ބަޔަކަށް އެންމެ ގިނައިން ކިޔަވައިދެއްވި ދެވަނަ ބޭފުޅަކު ރާއްޖޭގައި ނުހުންނާނެ ކަމަށް ވެސް އެމަނިކުފާނު ވިދާޅުވިއެވެ.