މި އަހަރުގެ ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ވާދަ ނުކުރެއްވިދާނެ ހާލަތެއްގައި އެ މަނިކުފާނު ވެސް ހުންނެވީ ކެންޑިޑެސީގެ އުންމީދުގައި ކަމަށާއި އެ ޕާޓީން ވަކިވީ ކެންޑިޑޭޓަކު ނުނެރެ، ޕީއެންސީގެ ކެންޑިޑޭޓަށް ތާއީދުކުރަން ނިންމުމުން ކަމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު މިރޭ ވިދާޅުވެއްޖެއެވެ.
ޕީޕީއެމުން ވަކިވެވަޑައިގަތުމަށް ފަހު، މި ފަހުން ޖުމްހޫރީ ޕާޓީއާ ގުޅިވަޑައިގަތުމަށް ފަހު އެ ޕާޓީގެ ރިޔާސީ ކެންޑިޑޭޓު އަދި ލީޑަރު ގާސިމް އިބްރާޙިމްގެ ކެމްޕޭނަށް މިހާރު ބޮޑުތިލަދުއްމައްޗަށް ކުރައްވަމުން ގެންދަވާ ދަތުރުފުޅުގައި މިރޭ ހދ. ކުޅުދުއްފުށީގައި ބޭއްވި ޖަގަހަ ޖަލްސާއެއްގައި ވަހީދު ވިދާޅުވީ ޕީޕިއެމުން ވަކިވީ އެ ޕާޓީން ކެންޑިޑޭޓަކު ނުނެރުމުން ކަމަށާއި އަދި، ގާސިމަށް ތާއީދު ކުރަން ނިންމީ، މިހާރު ވާދަ ކޮށްގެން ތިއްބެވި ބޭފުޅުންގެ ތެރެއިން އެންމެ ރަނގަޅު ޗޮއިސްއަކީ ގާސިމަށް ވީތީ ކަމަށެވެ.
"އަޅުގަނޑު އުންމީދުކޮށްގެން ހުރީ އަޅުގަނޑަށް އެ ފުރުސަތު ލިބިދާނެ ކަމަށް ރައީސް ޔާމީނަށް ކުރިމަތިނުލެއްވޭ ހިނދެއްގައި،" ވަހީދު ވިދާޅުވިއެވެ.
އެ މަނިކުފާނު ވިދާޅުވީ، ޕީޕީއެމްގައި އޮތީ ތިން އޮޕްޝަނެއް ކަނޑައަޅާފައި ކަމަށެވެ. އެއީ، ޔާމީން ވާދަ ކުރެއްވުމާއި އަދި އެ މަނިކުފާނަށް ވާދަ ނުކުރެއްވިއްޖެ ހާލަތެއްގައި ޕީޕީއެމުން އެހެން ބޭފުޅަކު ވާދަކުރެއްވުމާއި އަދި އެންމެ ފަހު ހާލަތެއްގައި ޕީއެންސީގެ ކެންޑިޑޭޓަކު އިންތިޚާބަށް ނެރުން ކަމަށެވެ. ޕީޕީއެމްގެ ލީޑާޝިޕްގައި ހިމެނިވަޑައިގަންނަވާ ބައެއް ބޭފުޅުން ވެސް މީގެ ކުރިން އެފަދައިން ވިދާޅުވިއެވެ.
"އަޅުގަނޑަށް ގަބޫލު ކުރެވުނީ އަޅުގަނޑު 10 އަހަރު ވަންދެން އެތާ ހުރެފައި، އެހެންނަމަވެސް އެއްވެސް އިހްތިރާމެއް ނެތި އެއްވެސް ބަލާލުމެއް ނެތި ކަންކަން އެގޮތަށް ދިޔައިމާ އަޅުގަނޑަކަށް ނުޖެހޭ އެ ތާގައި ހުންނާކަށް،" އެ މަނިކުފާނު ވިދާޅުވިއެވެ.
"ދެން އަޅުގަނޑު ވިސްނީ، ދިވެހިރާއްޖެއަށް ދެން އެންމެ ރަނގަޅުވާނީ އަޅުގަނޑު ދެން ކިހިނެއް ހެދިއްޔާތޯ؟ އެހެންވެގެން އަޅުގަނޑު ވިސްނީއިރުގައި ރާއްޖެއަށް މިހާރު ދިމާވެފައި ހުރި ބޮޑެތި ގޮންޖެހުންތަކުން ސަލާމަތް ކުރުމަށްޓަކައި ދެން އަޅުގަނޑަށް އެންމެ ފަސޭހައިން ސަޕޯޓު ކުރެވޭނީ ކޮން ބޭފުޅަކަށްތޯ ބެލީއިރު އަޅުގަނޑަށް ފެނުނީ އަޅުގަނޑުގެ ޒަމާންވީ ރަހުމަތްތެރިޔާ،"
އެ މަނިކުފާނު ވިދާޅުވީ، ސިޔާސީ މަސައްކަތް ގާސިމާ އެކުގައި ކުރައްވާތާ ލައްކަ ޒަމާން ވެއްޖެ ކަމަށެވެ. އެގޮތުން، އެންމެ ފުރަތަމަ ރާއްޖޭގެ ސިޔާސީ ޕާޓީއެއް އުފެއްދުމުގެ މަސައްކަތް ވެސް ކުރެއްވީ އެ ދެ ބޭފުޅުން ކަމަށް ވިދާޅުވިއެވެ.
ވަހީދު ވިދާޅުވީ، ދެގޮތެއް ނުވެ 40 އަހަރު މެދުނުކެނޑި ގާސިމް ގައުމަށް ޚިދުމަތް ކުރައްވާފައިވާ ކަމަށެވެ. އެހެންވެ، ގައުމުގައި ހުރި ބޮޑެތި މައްސަލަތައް ހައްލު ކުރެއްވޭނީ ގާސިމަށް ކަމަށް ގަބޫލުކުރައްވާ ކަމަށެވެ.