ރ. އަލިފުށީގައި ގާއިމްކުރާ ޓިވެޓް ސެންޓަރުގެ ޓެކްނިކަލް އިންސްޓިޓިއުޓުގެ ކޯސްތަކުގައި ބައިވެރިވުމުގެ ފުރުސަތު ހުޅުވާލައިފިއެވެ.
އެ އިންސްޓިޓިއުޓުގެ މަސައްކަތް ނިމުމަކާ ގާތަށް ގޮސްފައިވާއިރު، މިހާރުވަނީ އަންނަ މަހު ފަށާ ކޯސްތަކުގައި ބައިވެރިވުމަށް ފުރުސަތު ހުޅުވާލާފައެވެ.
ސެޕްޓެމްބަރު އިންޓޭކްގައި ފަށާ ކޯސްތަކުގެ ތެރޭގައި ފައިބާގްލާސް ބޯޓްބިލްޑިންއާއި އޮފީސް މެނޭޖްމަންޓް އެންޑް އެޑްމިނިސްޓްރޭޝަން ދާއިރާގެ އިތުރުން އިންފޮމޭޝަން ޓެކްނޮލޮޖީ ދާއިރާއިން ސެޓްފިކެޓް ލެވެލް 3، އެޑްވާންސް ސެޓްފިކެޓް އަދި ޑިޕްލޮމާ ލެވެލްގެ ކޯސްތައް ހިމެނެއެވެ.
މި އިންޓޭކަށް ކުރިމަތިލުމުގެ ފުރުސަތު މި މަހުގެ 20ވަނަ ދުވަހަށް ހަމަވާނެއެވެ. ކޯސްތަކުގައި ބައިވެރިވުމަށް އޮންލައިންކޮށް އެޕްލައި ކުރެވޭނެއެވެ. މި އިންސްޓިޓިއުޓްގެ ހުރިހާ ކޯހަކީވެސް ސަރުކާރުގެ ޚަރަދުގައި ހިލޭ ކިޔަވައިދޭ ކޯސްތަކެކެވެ.
އަންނަ މަހު ފެށޭ ކޯސްތަކުގެ އިތުރުން މިއަހަރުތެރޭގައި، އިލެކްޓްރިކަލް އެންޑް އިލެކްޓްރޯނިކްސް އެންޖިނިއަރިންގް، މެރިން މެކޭނިކްސް، އޮޓޯމޯޓިވް ރިޕެއާ، ވެލްޑިންގް، އެއަކޮންޑިޝަނިންގް އެންޑް ރެފްރިޖަރޭޝަން އަދި ފަތުރުވެރިކަމުގެ ދާއިރާއިން ވެސް އިތުރު ކޯސްތަކެއް ފަށާނެއެވެ.
މި މަހު ފަހުކޮޅު މިނިސްޓްރީ އޮފް ހަޔާ އެޑިޔުކޭޝަނުން ކެރިއާ ގައިޑެންސް އޯޕަންޑޭއެއް ކުރިޔަށް ގެންދިއުމަށް ވަނީ ހަމަޖެހިފައެވެ.
އެ އޯޕަންޑޭގައި ޓެކްނިކަލް އިންސްޓިޓިއުޓުގައި މި އިންޓޭކުގައި ފަށާ ކޯސްތަކާއި، މިއަހަރު އިތުރަށް ފެށުމަށް ހަމަޖެހިފައިވާ ޕްރޮގްރާމްތަކުގެ މައުލޫމާތު ދިނުމުގެ އިތުރުން، މިނިސްޓްރީ އޮފް ހަޔާ އެޑިޔުކޭޝަނުން ކުރިއަށްގެންދާ، ސްޓޫޑެންޓް ލޯން ސްކީމްތަކާއި، ސްކޯލާޝިޕްތަކުގެ މައުލޫމާތު ދިނުން ކުރިޔަށް ގެންދާނެއެވެ.
އަލިފުށީގައި ގާއިމްކުރާ ޓިވެޓް ސެންޓަރަކީ މިނިސްޓްރީ އޮފް ހަޔާ އެޑިޔުކޭޝަނުން ރާއްޖޭގެ އެކި ސަރަހައްދުތަކަށް އަމާޒުކޮށް މަތީ ތަޢުލީމާއި ތަމްރީނު ދޭ މަރުކަޒުތައް ބިނާކޮށް، ރައްޔިތުންނާ ގާތުން މިފަދަ ފުރުސަތުތައް ފަހިކޮށްދިނުމަށް ކުރިއަށްގެންދާ ޕްރޮޖެކްޓްތަކުގެ ތެރެއިން އެއް ޕްރޮޖެކްޓެވެ.