ބާސެލޯނާގެ ސްޕެއިން ފޯވަޑް އަންސޫ ފަޓީއަށް ޕްރިމިއާ ލީގު ކްލަބަކުން ބިޑެއް ހުށަހަޅާފައިވާ ކަމަށް ރިޕޯޓުކޮށްފިއެވެ.
ރިޕޯޓުތައް ބުނާގޮތުގައި މާލީ ހާލަތު ދަށްވެފައިވާ ބާސާ ދޫކޮށްލުމަށް ފަޓީ ދަނީ ކްލަބުތަކަކާއެކު މަޝްވަރާތައް ކުރަމުންނެވެ. އެގޮތުން އޭނާ ހޯދުމަށް ޕްރިމިއާ ލީގުގެ ކްލަބަކުން ބާސާއަށް 50 މިލިއަން ޔޫރޯ (54.8 މިލިއަން ޑޮލަރު)ގެ ބިޑެއް ހުށަހަޅާފައިވާ ކަމަށް ރިޕޯޓުތައް ބުނެއެވެ. ނަމަވެސް އެ ކްލަބެއްގެ ނަމެއް ނޫސްތަކުން ރިޕޯޓުކޮށްފައެއް ނުވެއެވެ.
އާ ސީޒަނަށް ކުޅުންތެރިން ރަޖިސްޓަރީކުރުމަށް ބާސާއަށް އަދިވެސް އިތުރަށް ފައިސާ ބޭނުންވެއެވެ. އެކަމަށް ފަޓީ ވިއްކާލަނީތޯ ސުވާލުކުރުމުން، ބާސާގެ ކޯޗު ޒަވީ ވެސް އެކަން ދޮގުކޮށްފައެއް ނުވެއެވެ.
"ޓްރާންސްފާ މުއްދަތު ނިމުމުގެ ކުރިން ހަމަ ކޮންމެ ކަމެއް ވެސް ވެދާނެ. އަހަރެން ފަޓީއާ މެދު ހިތްހަމަޖެހޭ، އެއީ މި ކްލަބުގެ އުފެއްދުމެއް. ވިއްކާލުމާ މެދު ބުނާނެ އެއްޗެއް އަހަރެންނަކަށް ނޭނގޭ،" އެކަމާ ގުޅޭގޮތުން ނޫސްވެރިން ސުވާލުކުރުމުން ޒަވީ ބުންޏެވެ.
ބާސާގެ އެކަޑަމީން ތަމްރީނުވި އުމުރުން 20 އަހަރުގެ ފަޓީ، އެ ކްލަބާއެކު ހަދާފައިވާ ކޮންޓްރެކްޓް ނިމުމަކަށް އަންނާނީ 2027 ވަނަ އަހަރުއެވެ. ދާދިފަހުން ފްރާންސް ފޯވަޑް އޮސްމާން ޑެމްބެލޭ ބާސާ ދޫކޮށް ޕީއެސްޖީއާ ގުޅިފައިވާ އިރު، ބްރެޒިލް ފޯވަޑް ރަފީނިއާ ވެސް ދަނީ އެހެން ކްލަބެއް ހޯދުމަށް މަސައްކަތްކުރަމުންނެވެ.