ކޮމިއުނިޓީ ޝީލްޑްގައި އާސެނަލް އަތުން ބަލިވި މެޗަށްފަހު، އިތުރު ވަގުތުގެ މައްސަލައިގައި ޕެޕް ގާޑިއޯލާ ނުރުހުން ފާޅުކޮށްފިއެވެ.
ވެމްބްލީގައި ރޭ ކުޅުނު މެޗު ޕެނަލްޓީ ޖަހައިގެން 4-1ގެ ނަތީޖާއަކުން އިނގިރޭސި އަދި ޔޫރަޕްގެ ޗެމްޕިއަން މެންޗެސްޓާ ސިޓީ ބަލިކުރުމަށްފަހު، އާސެނަލުން ވަނީ ކޮމިއުނިޓީ ޝީލްޑް އުފުލާލައިފައެވެ.
އެ މެޗުގައި ސިޓީން 1-0ގެ ނަތީޖާއަކުން ކުރީގައި އޮއްވައި، އާސެނަލުން ނަތީޖާ ހަމަހަމަކޮށްފައިވަނީ ދެވަނަ ހާފުގެ އިތުރު ވަގުތުގެ ތެރޭގައި ލިއާންޑްރޯ ޓްރޮސާޑް ޖެހި ގޯލުންނެވެ. އެ މެޗުގެ ދެވަނަ ހާފުގެ އިތުރު ވަގުތުގެ ގޮތުގައި ރެފްރީ ސްޓުއާޓް އެޓްވެލް، އަށް މިނެޓުގެ ކުޅުން ދެއްކި ނަމަވެސް، ސިޓީގެ ކައިލް ވޯކާ އަދި އާސެނަލްގެ ތޯމަސް ޕާޓޭއަށް ލިބުނު ބޮލުގެ އަނިޔާއަކާ ގުޅިގެން ވަނީ އިތުރު ވަގުތު 14 މިނެޓަށް ދިގުދެމިގެންދިޔައެވެ. ޓްރޮސާޑްގެ ގޯލު ފެނިގެންދިޔައީ އިތުރު ވަގުތުގެ 11 ވަނަ މިނެޓުގައެވެ.
"އިތުރު ވަގުތަށް އަހަރެމެން ޖެހޭނީ ހޭނެން. އަހަރެންގެ ޝަކުވާއަކީ 1-0ގެ ނަތީޖާއަކުން މޮޅުވާން ދަނިކޮށް، ވީ ގޮތަކުން ނޫން. އެކަމަކު އިތުރު ވަގުތު އަށް މިނެޓަށް ހަދަން، އެވަރުގެ ކަމެއް ނުހިނގާ. އިންޓަނޭޝަނަލް ބޯޑުން އާ ގަވާއިދު ހަދާފައިވަނީ ކޯޗުން އަދި ކުޅުންތެރިންނާ ވެސް މަޝްވަރާކުރުމެއް ނެތި،" މެޗަށްފަހު ވާހަކަދައްކަމުން ގާޑިއޯލާ ބުންޏެވެ.
ގާޑިއޯލާ ބުނީ ކުޅުންތެރިން ވަގުތު ނަގާލުމުގެ މަައްސަލައަށް ހައްލެއް ހޯދުމަށް ގެނައި އާ ގަވާއިދުގެ ސަބަބުން މިހާރު މެޗުތައް 100 މިނެޓަށް ދިގުދެމިގެންދާނެ ކަމަށާއި އެންމެ ގޯލެއް ފެނިގެންދިޔަ މެޗެއްގައި އަށް މިނެޓު ދައްކާ ނަމަ، ގިނަ ގޯލުތަކެއް ފެންނަ މެޗުތަކުގައި އުފާފާޅުކުރުންތަކަށް ހޭދަވާ ވަގުތަށް، އިތުރު ވަގުތުގެ ގޮތުގައި އެތައް ވަގުތެއް ދޭން ޖެހޭނެ ކަމަށެވެ.
ގާޑިއޯލާގެ އެ ޝަކުވާތައް ހުރި ނަމަވެސް، މެޗަށްފަހު އާސެނަލްގެ ކޯޗު އާޓެޓާ ބުނީ އެ ވަގުތު ދިނުމަކީ ރަނގަޅު ކަމެއް ކަމަށާއި މެޗުތަކުގައި 100 މިނެޓު ކުޅެން ޖެހިދާނެ ކަމަށް ބަަލައިގެން ޓީމުތައް ޖެހޭނީ ތައްޔާރުވާން ކަމަށެވެ.