ބަޔާން މިއުނިކް ދޫކޮށްލަން ޖެހުމުން ހިތާމަކުރާ ކަމަށް އެ ކްލަބު ދޫކޮށް، ސައުދީ އަރަބިއާގެ އަލް ނަސްރާ ގުޅެން އެއްބަސްވެފައިވާ ސެނަގާލް ފޯވަޑް ސާޑިއޯ މާނޭ ބުނެފިއެވެ.
ލިވަޕޫލުން 27.5 މިލިއަން ޕައުންޑް (35.28 މިލިއަން ޑޮލަރު)އަށް ބަޔާނާ ގުޅުމަށްފަހު، މާނޭ އެ ކްލަބުގައި ހޭދަކޮށްފައިވަނީ އެންމެ ސީޒަނެކެވެ. ބަޔާންގައި މާނޭއަށް ރަނގަޅު ކުޅުމެއް ދެއްކިފައި ނުވާ އިރު، އޭނާއަށް މިދިޔަ ސީޒަނުގައި 38 މެޗުން ކާމިޔާބުކުރެވިފައިވަނީ 12 ގޯލެވެ.
ބަޔާން ދޫކޮށްލުމަށްފަހު، ޕޯޗުގަލް ތަރި ކްރިސްޓިއާނޯ ރޮނާލްޑޯ ކުޅެމުންދާ އަލް ނަސްރާ މާނޭ ގުޅިފައިވަނީ 35 މިލިއަން ޕައުންޑް (45 މިލިއަން ޑޮލަރު)ގެ ޓްރާންސްފާ ފީއެއްގެ ދަށުންނެވެ. ބަޔާންގެ ނިމުން އެހެން ގޮތަކަށް ދިޔަ ނަމަ، ހިތްހަމަޖެހުނީސް ކަމަށް މާނޭ ދެކެއެވެ.
"ބަޔާން ދޫކޮށްލަން ޖެހުމުން ހިތާމަކުރަން. އަހަރެން އުންމީދުކުރީ މިއަށްވުރެ އެހެން ގޮތަކަށް ކަންތައް ނިމޭނެ ކަމަށް. އަހަރެންނަށް އެނގޭ މިސީޒަނުގައި އަހަރެންނަށް ޓީމަށް ކޮންމެވެސް ކަމެއް ކޮށްދޭން ޖެހޭކަން. އަހަރެން ބޭނުންވީ މިސީޒަނުގައި އެކަން ސާބިތުކޮށްދޭން. ނަމަވެސް އަހަރެން އެދެނީ ކްލަބަށް އުފާވެރި ކުރިމަގެއް،" 'ސްކައި ޖާމަނީ'އަށް ދިން އިންޓަވިއުއެއްގައި މާނޭ ބުންޏެވެ.
މިދިޔަ ސީޒަނުގައި ބަޔާންގެ ލެރޯއީ ސާނޭއާ ދެމެދު ހިނގި ހަމަނުޖެހުމެއްގެ ސަބަބުން މާނޭއަށް ވަނީ ކްލަބުން ސަސްޕެންޝަނަކާ ވެސް ކުރިމަތިލާން ޖެހިފައެވެ. މާނޭގެ އެ އަމަލާއި ރަނގަޅު ކުޅުމެއް ދެއްކިފައިނުވުމުން ބަޔާނުން ވަނީ އަލް ނަސްރުން ބިޑުކުރުމާއެކު އޭނާ ވިއްކާލުމަށް ނިންމައިފައެވެ. މާނޭއަށް މުސާރައިގެ ގޮތުގައި އަލް ނަސްރުން އަހަރެއްގެ މައްޗަށް 34 މިލިއަން ޕައުންޑް (43 މިލިއަން ޑޮލަރު) ލިބޭނެއެވެ.
މިހާރު މާނޭ ވަނީ ދުބާއީގައި އަލް ނަސްރުގެ މެޑިކަލް ވެސް ފުރިހަމަކޮށްފައެވެ. އޭނާ މިއަދުގެ ވަގުތެއްގައި ލިޔެކިޔުންތަކުގައި ސޮއިކުރާނެ ކަމަށް ރިޕޯޓުތައް ބުނެއެވެ.