ގިނަ ދިވެހި އާޓިސްޓުންގެ ހުނަރުތައް ދައްކާލުމަށް ބާއްވަމުން އަންނަ "އަންވެއިލިން ވިޝަންސް" އާޓް މައުރަޒު އަންނަ މަހުގެ ތެރޭގައި ކުރިއަށް ގެންދިޔުމަށް އިއުލާނުކޮށްފިއެވެ.
މޯލްޑިވިއަން އާޓިސްޓް ކޮމިއުނިޓީ (މެކް) އިން އިންތިޒާމުކޮށްގެން ކުރިއަށްގެންދާ މި އާޓް މައުރަޒަކީ ތަފާތު މީޑިއަމްގެ އާޓްތައް ދައްކާލުމަށް އާޓިސްޓުންނަށް ލިބޭ ބޮޑު ޕްލެޓްފޯމެކެވެ.
މެކްއިން ބުނިގޮތުގައި މިއަހަރުގެ އަންވެއިލިން ވިޝަންސް އިވެންޓް އޮންނާނީ އަންނަ މަހުގެ 10 އިން 20ގެ ނިޔަލަށް ނޭޝަނަލް އާޓް ގެލެރީގައެވެ.
މިއަހަރުގެ މައުރަޒަށް އާޓުތައް ހުށަހެޅުމަށްޓަކައި މިދިޔަ މަހުގެ ތެރޭގައި ވަނީ ހުޅުވާލާފައެވެ. އަދި 15 އަހަރުން މަތީގެ ކޮންމެ އާޓިސްޓަކަށް ވެސް އެ މީހެއްގެ ހުނަރުތައް ދައްކާލުމުގެ ފުރުސަތު ލިބޭނެ ކަމަށް މެކުން ވަނީ ބުނެފައެވެ. މި އަހަރުގެ އަންވެއިލިން ވިޝަންސްއަށް ހުށަހަޅާފައިވަނީ ކިހާ އެއްޗެއްސެއް ކަމެއް ހާމަކޮށްފައެއް ނުވެއެވެ. ނަމަވެސް އަހަރަކަށް ފަހު އަހަރަކު މި މައުރަޒުގެ މަގުބޫލުކަން އިތުރު ވަމުން އަންނަ އިރު މިފަހަރުވެސް ގިނަ އަދަދަކަށް އާޓިސްޓުންގެ ކޮންޓެންޓު ހުށަހަޅާނެ ކަމަށް ލަފާކުރެވެއެވެ.
އެންމެ ފަހުން ބޭއްވި މައުރަޒުގައި އެކި އުމުރުފުރައިގެ 67 އަށް ވުރެ ގިނަ އާޓިސްޓުންގެ އެކި މީޑިއަމްތަކުގެ އާޓްތައް ވަނީ ހުށަހަޅާފައެވެ.
އަންވެއިލިން ވިޝަންގެ ތެރޭގައިވެސް އެންމެ ފާހަގަކޮށްލެވޭ އާޓުތަކަށް އެކި ވަނަތައް ދެއެވެ.
އެންމެ ފަހުން އަންވެއިލިން ވިޝަންސް މައުރަޒު ބާއްވާފައިވަނީ 2021 ވަނަ އަހަރުގެ ޑިސެމްބަރުގެ ކުރީކޮޅުގައެވެ. މިދިޔަ އަހަރުވެސް މައުރަޒު ބޭއްވުމަށްޓަކައި އާޓު ހުށަހެޅުމަށް ހުޅުވާލިއެވެ. ނަމަވެސް އެއަށްފަހު އާޓް މައުރަޒު ކުރިއަށް ގެންދެވޭ ގޮތް ވެފައެއް ނުވެއެވެ. މިދިޔަ އަހަރުގެ އާޓް މައުރަޒު ކުރިއަށް ގެންދެވިފައި ނުވާ ސަބަބެއް ހާމަކޮށްފައެއް ނުވެއެވެ.