މީގެ 20 އަހަރު ކުރިން އެރި ސުނާމީ ކާރިސާއާ ގުޅުވައި "ވިލުންތެރި 20" ގެ ނަމުގައި މައުރަޒެއް މިއަދު ހުޅުވައިފިއެވެ.
އާޓް ގެލެރީގައި މި މައުރަޒު ހުޅުވައިދެއްވީ ނައިބު ރައީސް ހުސެއިން މުހައްމަދު ލަތީފެވެ.
މި މައުރަޒަކީ ޑިސެމްބަރު 26، 2004 ވަނަ އަހަރު ރާއްޖެއަށް ކުރިމަތިވި ނުރައްކާތެރި ސުނާމީގެ ކާރިސާއާ ގުޅުވައި، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ކުރިއަށް ގެންދާ މައުރަޒެކެވެ.
ސުނާމީ ކާރިސާއާ ގުޅިގެން ''ވިލުންތެރި 20'' ގެ ނަމުގައި ފެށި ޚާއްސަ މައުރަޒު ނައިބު ރައީސް ބައްލަވާލަނީ -- ފޮޓޯ/ ރައީސް އޮފީސް
މައުރަޒުގެ ތީމަކީ "2004 ސުނާމީ ކާރިސާއަށް ފަހު ރާއްޖެ"އެވެ.
މައުރަޒު ކުރިއަށް ދާނީ އަންނަ އާދިއްތަ ދުވަހުގެ ނިޔަލަށް ނެޝަނަލް އާޓް ގެލަރީގައެވެ.
އެގޮތުން މިއަދާއި މާދަމާ ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށް މައުރަޒު ކުރިއަށް ދާނެއެވެ. އަދި ހޮނިހިރު ދުވަހާއި އާދިއްތަ ދުވަހުގެ ހެނދުނު 10:00 އިން 18:00 އަށް އަދި ރޭގަނޑު 20:00 އިން 22:00 އަށް މައުރަޒު ކުރިއަށް ދާނެއެވެ.
މި މައުރަޒުގައި ސުނާމީ ކާރިސާގެ މަންޒަރުތައް ދައްކުވައިދޭ ކުރެހުންތައް ބަހައްޓާފައި ހުންނާނެއެވެ. އޭރު އާންމުންގެ ހާލަތު ދައްކުވައިދޭ ކުރެހުންތައް ބަލާލެވޭނެއެވެ.
އެންޑީއެމްއޭއިން ބުނި ގޮތުގައި މިއީ ހަމައެކަނި މައުރަޒެއް ނޫނެވެ. އެތަނަށް ޒިޔާރާތްކުރާ މީހުންނަށް ސުނާމީއާ ގުޅޭ ވަރަށް ގިނަ މައުލޫމާތު ލިބޭނެއެވެ. ވަކިން ޚާއްސަކޮށް ސުނާމީއާ ގުޅޭ އެއްވެސް މައުލޫމާތެއް ނޭނގޭ ނުވަތަ ސްކޫލް ކުދިންނަށް ވަރަށް ގިނަ މައުލޫމާތުތަކެއް ލިބޭނެ ކަމަށް އެ އޮތޯރިޓީން ބުންޏެވެ.
މައުރަޒު ހުޅުވުމުގެ ރަސްމިއްޔާތުގައި އެންޑީއެމްއޭއިން ވަނީ ކުރިއަށް އޮތް ހަތް އަހަރަށް ކާރިސީ ހިރާސްތައް ކުޑަކުރުމުގެ ޚާއްސަ އިސްތިރާޖެއް އެކުލަވާލައި އިފްތިތާހުކޮށްފައެވެ. މި އިސްތިރާޖު އިފްތިތާހު ކޮށްދެއްވީ ނައިބު ރައީސެވެ.
ސުނާމީ ކާރިސާއާ ގުޅިގެން ''ވިލުންތެރި 20'' ގެ ނަމުގައި ފެށި ޚާއްސަ މައުރަޒު ނައިބު ރައީސް ބައްލަވާލަނީ -- ފޮޓޯ/ ރައީސް އޮފީސް
މައުރަޒު ހުޅުވުމުގެ ރަސްމިއްޔާތުގައި ވާހަކަދައްކަވަމުން ނައިބު ރައީސް ވަނީ މިއަދު އިފްތިތާހުކުރި ރާއްޖޭގެ ފުރަތަމަ ކާރިސީ ހިރާސް ކުޑަކުރުމުގެ އިސްތިރާޖު ހަގީގަތަކަށް ހެދުމަށްޓަކައި ރައީސް ޑރ. މުހައްމަދު މުއިއްޒު ދެއްވި އިރުޝާދާއި އެކަމުގައި އެމަނިކުފާނު ދެއްވި އެހީތެރިކަމަށް ޝުކުރުއަދާކުރައްވާފައެވެ.
"ވެރިކަމަށް ވަޑައިގެންނެވިތާ ކުޑަ ދުވަސްކޮޅެއްގެ ތެރޭގައި މިފަދަ އިސްތިރާޖެއް އެކުލަވާލެވުމުން ދައްކުވައިދެނީ އެމަނިކުފާނުގެ ސިޔާސަތުތައް ބައްޓަންކުރެއްވުމުގައި މިކަންކަމަށް ދެއްވާ އަހައްމިއްޔަތުކަން ޔަގީން،" ނައިބު ރައީސް ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ ސުނާމީ ކާރިސާއިން ވަރަށް ގިނަ ފިލާވަޅުތަކެއް ލިބުނު ކަމަށެވެ. އެ ފިލާވަޅުގެ އަލީގައި ކާރިސާތަކުން ރައްކާތެރިވުމަށް ވަރަށް ބައިވަރު މަސައްކަތްތަކެއް ފާއިތުވި އަހަރުތަކުގައި ކޮށްފައިވާނެ ކަމަށް ހިސާން ވިދާޅުވިއެވެ.
"...20 އަހަރުކުރިން ރާއްޖެއަށް އެރި ސުނާމީއިން ލިބުނު ގެއްލުންތަކުން އަރައިގަނެވުނީ އެދުވަހު ދިވެހިން އެއްބައިވަންތަވެ، ކުރި އަޚުވަންތަވުމުގެ ނަމޫނާ މަސައްކަތްތަކުގެ ސަބަބުން،" ހިސާން ވިދާޅުވިއެވެ.
ސުނާމީ ކާރިސާއާ ގުޅިގެން ''ވިލުންތެރި 20'' ގެ ނަމުގައި ފެށި ޚާއްސަ މައުރަޒު ނައިބު ރައީސް ބައްލަވާލަނީ -- ފޮޓޯ/ ރައީސް އޮފީސް
ހިސާން ވިދާޅުވީ ސުނާމީއަށް ފަހު މޫސުމީ ބަދަލުތަކަށް ތައްޔާރުވުމަށް ވަރަށް ގިނަ މަސައްކަތްތަކެއް ކުރަމުންދާކަމަށެވެ. އެގޮތުން ރަށު ފެންވަރުގައި ކޮމިޓީތައް އެކުލަވާލައި، ކޮމިއުނިޓީ އެމަޖެންސީ ރެސްޕޮންސް ޓީމުތައް ގާއިމްކުރަމުންދާ ކަމަށް ހިސާން ވިދާޅުވިއެވެ.
މީގެ 20 އަހަރު ކުރިން އެރި ސުނާމީގައި ރާއްޖޭގައި މީހުން ދިރިއުޅޭ ނުވަ ރަށެއް ފިޔަވައި އެހެން ހުރިހާ ރަށަކަށް އަސަރު ކޮށްފައިވެއެވެ. އަދި 82 ދިވެހިން ނިޔާވެ، 26 ދިވެހިން ވީނުވީއެއް ނޭނގި ގެއްލި، 15000 މީހުންގެ ގެދޮރު ވަނީ ގެއްލިފައެވެ.
އެ ދުވަހު ހާލުގައިޖެހުނު ފަރާތްތަކަށް އެހީވުމުުގެ ގޮތުން ދިވެހިން ދައްކުވައިދިން ހިތްވަރާއި ވިލުންތެރިކަން ފާހަގަ ކުރުމުގެ ގޮތުން ކޮންމެ އަހަރެއްގެ ޑިސެންބަރުމަހުގެ 26 ވަނަ ދުވަސް، ދިވެހިންގެ އެއްބައިވަންތަކަމުގެ ދުވަހުގެ ގޮތުގައި އަންނަނީ ފާހަގަކުރަމުންނެވެ.