ރާއްޖޭގެ 58 ވަނަ މިނިވަން ދުވަހާ ގުޅިގެން ހޯމް މިނިސްޓްރީއާއި އާބަންކޯ ގުޅިގެން ބާއްވާ "މިނިވަން އުފާ ކާނިވަލް 2023" މާދަމާ ބާއްވަން ތައްޔާރުވެއްޖެއެވެ.
ހަތް ދުވަހަށް ކުރިއަށް ގެންދާ މި ކާނިވާ އޮންނާނީ އަންނަ މަހުގެ ތިންވަނަ ދުވަހާ ހަމައަށް ހުޅުމާލެ ސެންޓްރަލް ޕާކުގައެވެ.
އާބަންކޯއިން ބުނީ ކުލަގަދަ ކާނިވަލެއް ބޭއްވުމަށް ވާންޖެހޭ އެންމެ ފަހުގެ ތައްޔާރީތައް މިހާރު ވަމުންދާ ކަމަށެވެ. އަދި މި ކާނިވަލުގައި އާންމުންނަށް ބައިވެރިވެވޭނެ ގިނަ ހަރަކާތްތަކެއް ކުރިއަށް ގެންދިއުމަށް ރާވާފައިވާކަމަށް އާބަންކޯއިން ބުންޏެވެ.
"މިނިވަން އުފާ ކާނިވަލް 2023" ގެ އެންމެ ފަހުގެ ތައްޔާރީތައް-- ފޮޓޯ/ އާބަންކޯ
އޭގެތެރޭގައި ގޭމް ސްޓޯލްތަކާއި، ބިރުވެރި ހޮހޮޅައާއި، ކާބޯތަކެތި ވިއްކުމަށް ޚާއްޞަ ފުޑް ސްޓްރީޓްއާއި، ފްލޯޓްތައް ދައްކާލުމުގެ އިތުރުން ބޭރުގެ ހުނަރުވެރިންނާއެކު ސާކަސް ޝޯއަކާއި ލައިވް މިއުޒިކް އަދި ކަރޯކޭ ބޮކްސް އާއި ހަވާ އެރުވުން ހިމެނެއެވެ. އަދި ދިރާގުގެ ފަރާތުން ޑްރޯން ޝޯ އާއި ލޭޒާ ޓެގްގެ ހަރަކާތްތައް ބާއްވާނެއެވެ.
އާބަންކޯއިން ބުނީ މިނިވަން އުފާ ކާނިވަލްގެ ހަރަކާތްތައް އިންތިޒާމް ކުރެވިފައި ވަނީ ހުރިހާ އުމުރުފުރާއަކަށް ވެސް ބައިވެރިވެވޭނެ ފަދަ ގިނަ ހަރަކާތްތަކެއް ހިމަނައިގެންކަމަށާއި މުޅި ޕާކު ވެސް، ކާނިވަލެއް ރަމްޒުކޮށްދޭ ގޮތަށް ޒީނަތްތެރި ކޮށްފައިވާނެ ކަމަށެވެ. އަދި ހިތްފަސޭހަ މާހައުލެއްގައި އާއިލާ އާއި ރަހުމަތްތެރިންނާއެކު ވަގުތު ހޭދަކޮށްލުމަށް ޚާއްޞަ ޒޯންއެއް ވެސް ޕާކުގައި ހުންނާނެ ކަމަށް އެ ކޯޕަރޭޝަނުން ވަނީ ބުނެފައެވެ.
"މިނިވަން އުފާ ކާނިވަލް 2023" ގެ އެންމެ ފަހުގެ ތައްޔާރީތައް-- ފޮޓޯ/ އާބަންކޯ
"ވަނުން މުޅިން ހިލޭ މި ކާނިވަލްގައި، ޒިޔާރަތް ކުރާ ފަރާތްތަކުގެ މެދުގައި ވަރަށް ޚާއްޞަ ގުރުއަތެއް ނެގުމަށް ވެސް ވަނީ ހަމަޖެހިފަ. އެގޮތުން ކިއުއާރް ކޯޑެއް މެދުވެރިކޮށް ރަޖިސްޓާ ކޮށްލުމުން މި ގުރުއަތުގައި ބަައިވެރިވެވޭނެ. އުރީދޫގެ ހެޔޮ އެދުންތަކާއެކު އިންޑޮނީސިއާގެ ބާލީއަށް ހަތް ރޭ، އެކޮމޮޑޭޝަން އަދި ޓްރާންސްޕޯޓާއެކު ދިއުމުގެ ފުރުސަތު ލިބިގެންދާނެ." އާބަންކޯއިން ބުންޏެވެ.
ރާއްޖެ މިނިވަން ވިތާ 58 އަހަރު ފުރުމުގެ ގޮތުން މިއަހަރު ގިނަ ހަރަކާތްތަކެއް ރޭވިގެން ކުރިއަށް ދާއިރު، މިނިވަން އުފާ ކާނިވަލް ވެގެން ދާނީ މުޅިން ތަފާތު، މަޖާ އަދި ހިތްފަސޭހަ މާހައުލެއްގައި އާއިލާ އާއި ރަހުމަތްތެރިންނާއެކު ވަގުތު ހޭދަކޮށްލަން ކޮންމެހެން ވެސް ޒިޔާރަތް ކުރަން ޖެހޭ ތަނަކަށް ކަމަށް އާބަންކޯއިން ބުންޏެވެ.