ފަލަސްތީނުގެ ހައްގު ހޯދުމަށް ކުރާ މަސައްކަތުގައި ރާއްޖޭން ދޭ އެއްބާރުލުން ފާހަގަކޮށް އެކަމަށް ޓަކައި، ފަލަސްތީނުން ދިވެހި ސަރުކާރަށް ޝުކުރު އަދާކޮށްފިއެވެ.
ފަލަސްތީންގެ ފަރާތުން އެކަމަށް ޝުކުރު އަދާކުރެއްވީ ރާއްޖެއަށް ކަނޑައަޅުއްވާފައިވާ ސަފީރު ވަލީދް އަބޫ އަލީ، އިސްލާމިކް މިނިސްޓަރު ޑރ. އަޙްމަދު ޒާހިރު އަލީއާ މިއަދު ބޭއްވި ބައްދަލުކުރެއްވުގައެވެ.
މި ބައްދަލުވުމުގައި ސަފީރު ދެއްކެވި ވާހަކަފުޅުގައި ރާއްޖެއާއި ފަލަސްތީނާ ދެމެދުގައި އޮތް ގާތް ރަޙްމަތްތެރި ގުޅުމާއި، ރާއްޖެއިން އަބަދު ވެސް ފަލަސްތީނާއެކު އޮންނަ އޮތުން ފާހަގަކުރެއްވިއެވެ. އަދި ފަލަސްތީނުގެ ހައްގު ހޯދުމަށް ކުރާ މަސައްކަތުގައި ރާއްޖޭން އެ ގައުމަށްދޭ އެއްބާރުލުން ފާހަގަކުރައްވައި އެކަމަށް ޝުކުރުއަދާކުރެއްވިއެވެ.
ރާއްޖެއަކީ އަަބަދުވެސް ފަލަސްޠީނުދެކެ ލޯބިވާ ރައްޔިތެއް އުޅޭ ގައުމެއްކަން ފާހަގަކުރައްވައި، ޚާއްޞަކޮށް ރާއްޖޭގެ ޒުވާނުން ފަލަސްތީނަށް ކުރާ ތާއިދަކީ ވަރަށް ބޮޑު ހިތްހަމަޖެހުމެއްކަމަށް ސަފީރު ވިދާޅުވިއެވެ.
މި ބައްދަލުވުމުގައި މިނިސްޓަރު ޒާހިރު ދެއްކެވި ވާހަކަފުޅުގައި ވިދާޅުވީ، ރާއްޖެއިން އަބަދުވެސް ދެކެނީ ފަލަސްތީނަކީ ވަރަށް ގާތް ގައުމެއްގެ ގޮތުގައި ކަމަށާއި އަބަދުވެސް އެގޮތުގައި ރާއްޖެ ދެމި އޮންނާނެކަމަށެވެ. އަދި ފަލަސްތީނުގެ މައްސަލަައިގައި އަބަދުވެސް ރާއްޖޭގެ ސަރުކާރުން ތާއިދުކުރާނީ ފަލަސްތީނަށްކަމަށް މިނިސްޓަރު ވިދާޅުވިއެވެ.
މިނިސްޓަރުގެ ވާހަކަފުޅުގައި ރާއްޖެއަށް ދީނީ އިލްމުވެރިންގެ އެހީތެރިކަން ބޭނުންވާކަން ފާހަގަކުރައްވައި އެކަމުގައި އެހީތެރިކަން ދެވިދާނެ ދާއިރާތަކާގުޅޭގޮތުން ވަނީ މަޝްވަރާކުރައްވާފައެވެ.