ލާޒިއޯގެ ސާބިއާ މިޑްފީލްޑަރު ސާގޭ މިލިންކޮވިޗް ސަވިޗް، 40 މިލިއަން ޔޫރޯ (44 މިލިއަން ޑޮލަރު)ގެ ޓްރާންސްފާ ފީއެއްގެ ދަށުން ސައުދީ އަރަބިއާގެ އަލް ހިލާލާ ގުޅުމަށް އެއްބަސްވެފައިވާ ކަމަށް ރިޕޯޓުކޮށްފިއެވެ.
ރިޕޯޓުތައް ބުނާގޮތުގައި މިލިންކޮވިޗް ސަވިޗް، އަލް ހިލާލާ ގުޅެން އެއްބަސްވެފައިވަނީ އަހަރެއްގެ މައްޗަށް 20 މިލިއަން ޔޫރޯ (22 މިލިއަން ޑޮލަރު) ލިބޭ ގޮތަށެވެ. އޭނާ އެ ކްލަބަށް ސޮއިކުރާނީ ތިން އަހަރު ދުވަހުގެ ކޮންޓްރެކްޓެއްގައި ކަމަށް ރިޕޯޓުތައް ބުނެއެވެ.
މިލިންކޮވިޗް ސަވިޗް ވަނީ އަށް އަހަރަށްފަހު ލާޒިއޯ ދޫކޮށްލުމަށް ނިންމައިފައެވެ. އޭނާ ހޯދުމަށް އަލް ހިލާލްގެ އިތުރުން ޔުވެންޓަސް އާއި އާސެނަލް އަދި ޗެލްސީން ވެސް ދަނީ މަސައްކަތްކުރަމުންނެވެ.
އަންނަ ސީޒަނުގައި ސައުދީ ލީގުން ގިނަ ތަރިންތަކެއް ފެނިގެންދާނެއެވެ. އެގޮތުން ސައުދީގެ އަލް ހިލާލުން ވަނީ ބޮޑު ހަރަދެއްކޮށް, އަންނަ ސީޒަނަށް ޗެލްސީގެ ކުރީގެ ޑިފެންޑަރު ކަލިދޫ ކުލިބާލީ އާއި ވުލްވްސްގެ ކުރީގެ ރުބެން ނެވޭސް ވެސް ހޯދައިފައެވެ.
ވަރުގަދަ ސްކޮޑަކާއެކު އަލް ހިލާލްގެ ޓާގެޓަކީ އަންނަ ސީޒަނުގެ ސައުދީ ޕްރޯ ލީގު ޗެމްޕިއަންކަން ހޯދުމެވެ. މީގެ ކުރިން އަލް ހިލާލުން ވަނީ އާޖެންޓީނާ ތަރި ލިއޮނެލް މެސީ ހޯދުމަށް ވެސް މަސައްކަތްތަކެއް ކޮށްފައެވެ.