ކާމިޔާބީތައް ހޯދުމަށް ބާސެލޯނާއަށް އިތުރު ކުޅުންތެރިން ބޭނުންވާ ކަމަށް އެ ކްލަބުގެ ކޯޗު ޒަވީ ބުނެފިއެވެ.
މިދިޔަ ސީޒަނަށްފަހު ބާސާ އިން ބައެއް ތަރިންތައް އެ ކްލަބު ދޫކޮށް ގޮސްފައިވާ އިރު، އޭގެ ތެރޭގައި ސާޖިއޯ ބުސްކެޓްސް އާއި ޖޯޑީ އަލްބާ އަދި ސެމުއެލް އުމްޓިޓީ ހިމެނެއެވެ. އެ ކުޅުންތެރިންގެ ބަދަލުގައި ބާސާއަށް ހޯދިފައިވަނީ ޖަރުމަން މިޑްފީލްޑަރު އިލްކާއީ ގުންޑޮގަން އަދި ސްޕެއިން ޑިފެންޑަރު އިނީގޯ މާޓިނޭޒެވެ.
ޒަވީ ބުނެފައިވާ ގޮތުގައި ސަޕޯޓަރުން އެދޭ ފަދަ ބޮޑެތި ކާމިޔާބީތައް ހޯދުމަށް ސްކޮޑު ވަރުގަދަކުރުމަށް ބާސާއަށް އިތުރު ކުޅުންތެރިން ބޭނުންވެއެވެ. އަދި އެކަމަށް ޓެކްނިކަލް މުވައްޒަފުންނާއި ކްލަބުގެ ރައީސް ކުރާ މަސައްކަތް ފާހަގަކުރާ ކަމަށް ވެސް ޒަވީ ބުންޏެވެ.
"އަހަރެމެންނަށް އަދިވެސް މަދުވާ ބައެއް އެބައޮތް. އިތުރަށް ސްކޮޑު ވަރުގަދަކުރަން ޖެހޭ. އެކަމަށް ޓެކްނިކަލް މުވައްޒަފުންނާއި ކްލަބުގެ ރައީސް ބުރަ މަސައްކަތެއް ކުރޭ. ޓްރާންސްފާ މާކެޓް ބަންދުވާން އަދިވެސް ދުވަސް އެބައޮތް. އެހެންކަމުން އަހަރެމެން ޖެހޭނީ ވީހާވެސް ބޮޑަކަށް އެކަމަށް މަސައްކަތްކުރަން،" ނޫސްވެރިންނާ ވާހަކަދައްކަމުން ޒަވީ ބުންޏެވެ.
ކުޅުންތެރިން ހޯދުމަށް ބާސާއަށް ކުރިމަތިވެފައިވާ އެންމެ ބޮޑު ހުރަހަކަށް ވެފައިވަނީ އެ ކްލަބުގެ މާލީ ހާލަތެވެ. އެކަމާ ގުޅިގެން ބާސާއަށް ވަނީ އަލުން އާޖެންޓީނާ ތަރި ލިއޮނެލް މެސީގެ ސޮއި ހޯދުމަށް ވެސް އުނދަގޫތަކަކާ ކުރިމަތިވެފައެވެ. ބާސާ އިން މަސައްކަތްތަކެއް ކުރަމުންދަނިކޮށް، މެސީ ނިންމާފައިވަނީ އެމެރިކާ ކްލަބު، އިންޓަ މަޔާމީއާ ގުޅުމަށެވެ.