ދުވާފަރު ކައުންސިލް ޚިޔާނާތުގެ މައްސަލައިގައި، އެކަމުގައި ބައިވެރިވި މީހުންނަށް ދައުވާ ނުކޮށް ނަސޭހަތުގެ އެއްބަސްވުން ހެދުމަކުން ގާނޫނީ ނުރަނގަޅު ނަތީޖާއެއް ނުނިކުންނާނެ ކަމަށް ޕްރޮސިކިއުޓާ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ދުވާފަރު ކައުންސިލުގެ ހިޔާނާތުގެ މައްސަލައާ ގުޅިގެން 12 ހެއްގެ މައްސަލަ ތަހުގީގުކޮށް ނިމުމަށް ފަހު އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އޮފީހަށް ފޮނުވުމުން އެ އޮފީހުން ވަނީ އެ މައްސަލައިގައި ކައުންސިލް މެންބަރުންނަށް ދައުވާ ކުރުމުގެ ބަދަލުގައި އެ އޮފީހުން ޖިނާއީ އިޖުރާއަތުގެ ގާނޫނުގެ 97 ވަނަ މާއްދާގެ ދަށުން ނަސޭހަތުގެ އެއްބަސްވުމެއް ހަދާފައެވެ.
އެ މީހުންނަށް ދައުވާ ނުކޮށް ނަސޭހަތުގެ އެއްބަސްވުމެއް ހަދާފައިވާތީ ޕީޖީ އޮފީހަށް ވަނީ ބައެއް މީހުންގެ ފާޑުކިޔުން އަމާޒުވެފައެވެ.
އެކަމާ ގުޅިގެން ޕީޖީ ޝަމީމްގެ ބްލޮގްގައި ޝާއިރު ކުރެއްވި ލިޔުމެއްގައި އޭނާ ވިދާޅުވީ ނަސޭހަތުގެ އެއްބަސްވުން ހެދުމާ ގުޅޭ ގޮތުން، ދައުވާކުރުމުގެ ބަދަލުގައި އާންމު މަސްލަހަތަށް އެންމެ ފައިދާހުރި ގޮތަކީ ކޮބައިކަން ދެނެގަތުމުގައި ބަލާނެ މިންގަނޑުތައް ކިޔައިދޭ ދެ ލިސްޓެއް ގާނުގައި ބަޔާންކޮށްފައިވާ ކަމަށެވެ.
އެއީ އާންމު މަސްލަހަތަށް އެންމެ ފައިދާ ހުރި ގޮތަކީ ނަސޭހަތް ދިނުން ކަމުގައި ނިންމުމަށް ބާރުއަޅާ ކަންތައްތައް އޮތް ލިސްޓާއި، އާންމު މަސްލަހަތަށް އެންމެ ފައިދާހުރި ގޮތަކީ ދައުވާކުރުން ކަމުގައި ނިންމުމަށް ބާރުއަޅާ ކަންތައްތައް އޮތް ލިސްޓެވެ.
ނަސޭހަތުގެ އެއްބަސްވުމެއް ހެދުމަކީ ޖިނާއީ އިޖުރާއަތުގެ ގާނޫނުގެ 97 ވަނަ މާއްދާގެ ދަށުން ޕީޖީއަށް އޮތް އިހްތިޔާރެކެވެ. އެފަދަ އެއްބަސްވުމެއް ހެދޭނީ، އެމީހަކު ކުރިކަމަށް އިއުތިރާފުވާ ކުށަކީ އެއް އަހަރު ދުވަހަށްވުރެ ދިގު މުއްދަތަކަށް ޖަލުގައި ބަންދުކުރުމުގެ އަދަބު ހިމެނޭ ކުށަކަށް ނުވާ ނަމައެވެ.
ނަސޭހަތުގެ އެއްބަސްވުމުގެ ބޭނުމަށް، އަދަބުގެ މިންވަރަކީ އެއް އަހަރު ކަމަށް ބެލުމުގައި އަދަބުގެ ރޭންޖުން ދަށަށް ގޮސް، އެންމެ ދަށްވެގެން އެއް އަހަރަށް ވުރެ ކުޑަ އަދަބެއް ހިމެނޭ ކުށްތައް ނަސޭހަތް ދެވޭ ބާވަތުގެ ކުށުގެ ގޮތުގައި ހިމެނުމަށް ގާނޫނުން ހުއްދަ ކުރާ ކަމަށް ޕީޖީ ވިދާޅުވިއެވެ.
ޝަމީމް ވިދާޅުވީ ދުވާފަރު ކައުންސިލްގެ މައްސަލައިގައި ދައުވާކުރަން ބާރުއަޅާ ލިސްޓުން ފުރިހަމަވީ، ލިސްޓުގައި އޮތް 13 ކަންތަކުގެ ތެރެއިން އެންމެ ތިން ކަންތައް ކަމަށެވެ. ނަމަވެސް ނަސޭހަތް ދިނުމަށް ބާރު އަޅާ ލިސްޓުގައި ހުރި ހުރިހާ ކަމެއް ފުރިހަމަވާ ކަން ފާހަގަކޮށް ޕީޖީ ވިދާޅުވީ، އެ މައްސަލައަކީ ނަސޭހަތުގެ އެއްބަސްވުމެއް ހެދުމަށް ހުއްދަ ލިބޭ، އެކަމަށް ގާނޫނު ތަސަްވުރު ކޮށްފައި އޮތް، ޝަރުތު ހަމަވާ މައްސަލައެއް ކަމަށެވެ.
ކުށުގެ ސަބަބުން ލިބުނު ގެއްލުމެއް ހަގީގަތުގައި ނެތެވެ. ކުށްކުރި މީހުންގެ ކުށުގެ ރެކޯޑެއް ނެތެވެ. އެމީހުންގެ މައްޗަށް އެހެން ޖިނާއީ ދައުވާއެއް ހުށަހެޅި ހިނގަމަކުން ނުދެއެވެ. ކުށްކުރި މީހުންގެ އުމުރަށް ބަލާއިރު، މާ ހަގެއް ނޫނެވެ. ކުށްކުރި ހަމަ ކޮންމެ މީހަކު، ޒިންމާދާރުކަމާއެކު ޢާއިލާއެއް ބަލަހައްޓަމުންދެއެވެ. ތެދެކެވެ. ފައިސާ ގެންގުޅުނީ ގަވާއިދާ ޚިލާފަށެވެ. ނަމަވެސް، ގެއްލުނު ހުރިހާ ފައިސާއެއް ވަނީ އަނބުރާ ދައްކާފައިވެއެވެ. ދައުލަތަށް މަދުވި ފައިސާއެއް އޮތް ކަމަކަށް ތަހުގީގަކުން ނުދައްކައެވެ. ޕީޖީ ހުސެއިން ޝަމީމް
ދުވާފަރު ކައުންސިލުގެ ހިޔާނާތުގެ މައްސަލަ ފެންމަތިވީ ލޯކަލް ގަވަމަންޓް އޮތޯރިޓީ (އެލްޖީއޭ)އިން އެކުލަވާލި ދުވާފަރު ކައުންސިލްގެ ޚާއްސަ މޮނިޓަރިން ރިޕޯޓަކުންނެވެ.
އުސޫލުތަކާ ޚިލާފަށް ގިނަ އަދަދެއްގެ ފައިސާގެ މުއާމަލާތްތަކެއް، ހިންގާފައިވާކަން ފާހަގަކުރެވުނު މި މައްސަލަ މިދިޔަ އަހަރުގެ ޖުލައި މަހުގެ ތެރޭގައި އެންޓި ކޮރަޕްޝަން ކޮމިޝަނަށް ހުށަހެޅުމާ އެކު، ޚާއްސަ ޓީމަކުން ދުވާފަރަށް ގޮސް ތަހުގީގަށް ބޭނުންވާ މައުލޫމާތު އެއްކޮށް، ދެ މަސް ދުވަސް ތެރޭގައި މައްސަލައިގެ ތަހުގީގު ނިންމައި ޑިއުޓީ ޕްރޮސިކިއުޝަނަށް ވަނީ ފޮނުވާފައެވެ.