ސާފް ޗެމްޕިއަންޝިޕް 2023 ގައި ނޭޕާލް ބަލިކޮށް، ކުވައިތާއެކު އިންޑިއާ އިން ސެމީ ފައިނަލުގެ ޖާގައެއް ހޯދައިފިއެވެ.
އިންޑިއާގެ ބެންގަލޫރުގެ ސްރީ ކަންތީރަވާ ސްޓޭޑިއަމްގައި މިރޭ ކުޅުނު މެޗުގައި ނޭޕާލް އަތުން އިންޑިއާ މޮޅުވީ 2-0 ގެ ނަތީޖާއަކުންނެވެ. އެއާއެކު "ގްރޫޕު އޭ"ގެ ސެމީގެ ޖާގަތައް ކަށަވަރުވެފައިވަނީ ކުޅުނު ދެ މެޗު ވެސް ކާމިޔާބުކޮށްފައިވާ އިންޑިއާ އާއި ކުވައިތެވެ. ފުރަތަމަ ދެ މެޗުން ބަލިވި ޕާކިސްތާނާއި ނޭޕާލްގެ ސެމީގެ އުންމީދުތަކަށް ނިމުމެއް އައިސްފައެވެ.
މެޗުގެ ފުރަތަަމަ ހާފުގައި އިންޑިއާ އަދި ނޭޕާލްގެ ފަރާތުން ވެސް ފެނިގެންދިޔައީ ދާދި ހަމަހަމަ ކުޅުމެކެވެ. ދެ ޓީމުން ވެސް ކުރިއަށް ޖެހި، އެޓޭކުކުރުމަށް މަސައްކަތްކުރި އިރު، ފުރުސަތުތަކެއް ލިބިގެންދިޔައެވެ.
މެޗުގެ 16 ވަނަ މިނެޓުގައި އިންޑިއާއަށް ރަނގަޅު ފުރުސަތެއް ލިބިގެންދިޔައެވެ. އާކާޝް މިޝްރާ ދިން ބޯޅައަކުން ޕެނަލްޓީ އޭރިއާ ތެރޭ ހުރެ، ސަހަލް އަބްދުލް ސަމަދު ފޮނުވާލި ހަމަލާ ދިޔައީ ނޭޕާލްގެ ގޯލުގެ އަރިމަތީ ދަނޑިކައިރިން ބޭރަށެވެ.
އޭގެ މިނެޓެއް ފަހުން ނޭޕާލަށް ރަނގަޅު ފުރުސަތެއް ލިބިގެންދިޔައެވެ. ޕެނަލްޓީ އޭރިއާ ބޭރުން ލިބުނު ބޯޅައަކުން ނޭޕާލްގެ އަރިކް ބިސްޓާ ފޮނުވާލި ބާރު ހަމަލާ، އިންޑިއާގެ ކީޕަރު ގުޕްރީތު ސިންހް ވަނީ މަތަކޮށްފައެވެ.
ސާފް ޗެމްޕިއަންޝިޕް 2023 ގައި އިންޑިއާ އާއި ނޭޕާލް ބައްދަލުކުރި މެޗުގެ ތެރެއިން -- ސަން ފޮޓޯ/ އަބްދުﷲ އަބީދު
ފުރަތަމަ ހާފުގެ ފަހު ދިހަ މިނެޓުގެ ތެރޭގައި ވެސް ނޭޕާލަށް ދެ ފުރުސަތެއް ލިބިގެންދިޔައެވެ. ކައުންޓާ އެޓޭކެއްގެ ފުރުސަތު ނޭޕާލުން ނަގާލި އިރު، ބިމާލް ގަރްތީއަށް ލިބުނު ފުރުސަތުގެ ބޭނުން ވެސް ހިފިފައެއް ނުވެއެވެ. މެޗުގެ ފުރަތަމަ ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެންނެވެ.
މެޗުގެ ދެވަނަ ހާފުގެ ކުރީކޮޅުގައި ހަމަހަމަ ކުޅުމެއް ފެނިގެންދިއުމަށްފަހު، މެޗުގެ 61 ވަނަ މިނެޓުގައި އިންޑިއާ އިން ވަނީ ގޯލެއް ޖަހައި ލީޑު ހޯދައިފައެވެ. މަހޭޝް ސިންހް ނައޮރޭހް ދިން ބޯޅައަކުން އިންޑިއާއަށް އެ ގޯލު ކާމިޔާބުކޮށްދިނީ އެޓީމުގެ ކެޕްޓަން ސުނިލް ޗެތުރީއެވެ. އެއީ މިފަހަރުގެ ސާފް ޗެމްޕިއަންޝިޕްގައި ޗެތުރީ ޖެހި ހަތަރުވަނަ ގޯލެވެ. އަދި އެއީ ސާފް ޗެމްޕިއަންޝިޕްގެ ތާރީހުގައި ޗެތުރީ ޖެހި 22 ވަނަ ގޯލެވެ. އެއާއެކު ޗެތުރީ ވަނީ އެންމެ ގިނަ ގޯލު ޖަހައިގެން ރާއްޖޭގެ އަލީ އަޝްފާގު (ދަގަނޑޭ) ހަދާފައިވާ ރެކޯޑާ އިތުރަށް ގާތްކޮށްފައެވެ. ދަގަނޑޭ ވަނީ 23 ގޯލު ޖަހައިފައެވެ.
މެޗުގެ 70 ވަނަ މިނެޓުގައި އިންޑިއާ އިން ވަނީ އިތުރު ގޯލެއް ޖަހައި ލީޑު ފުޅާކޮށްފައެވެ. އިންޑިއާއަށް އެ ގޯލު ކާމިޔާބުކޮށްދިނީ މަހޭޝް ސިންގް ނައޮރޭމްއެވެ. އޭނާ އެ ގޯލު ޖެހީ ޕެނަލްޓީ އޭރިއާ ތެރެއިން ޗެތުރީ ފޮނުވާލި ހަމަލާއެއް ނޭޕާލްގެ ކީޕަރު ކިރަން ކުމާރް ލިމްބޫ އަތުގައި ޖެހި ގޯލުގެ ހުރަސް ދަނޑިއަށް އަމާޒުވުމާއެކު ލިބުނު ބޯޅައިން ފޮނުވާލި ހަމަލާއަކުންނެވެ.
އޭގެ ފަސް މިނެޓު ފަހުން އިންޑިއާއަށް ގޯލު ޖަހާނެ އިތުރު ފުރުސަތެއް ލިބިގެންދިޔައެވެ. ސަހަލް އަބްދުލް ސަމަދު ދިން ބޯޅައަކުން ޕެނަލްޓީ އޭރިއާ ތެރެއިން އިންޑިއާގެ ލާލިއަންޒުއާލާ ޗާންގްޓޭ ފޮނުވާލި އެ ހަމަލާ، ނޭޕާލްގެ ކީޕަރު ކިރަން ކުމާރު ލިމްބޫ ވަނީ މަތަކޮށްފައެވެ.
ސާފް ޗެމްޕިއަންޝިޕް 2023 ގައި މާދަމާ ކުޅުމަށް ހަމަޖެހިފައިވަނީ "ގްރޫޕު ބީ"ގެ ދެ މެޗެވެ. މާދަމާ ހަވީރު 3:00 ގައި ކުޅޭ މެޗުގައި ރާއްޖެ އާއި ބަންގުލަދޭޝް ބައްދަލުކުރާ އިރު، މާދަމާ ރޭ 7:00 ގައި ކުޅޭ މެޗުގައި ބައްދަލުކުރާނީ ލުބުނާނާއި ބޫޓާނެވެ.
ސާފް ޗެމްޕިއަންޝިޕްގެ ހުރިހާ މެޗެއް އެސްއެސްނެޓްގެ ޗެނަލް ނަމްބަރު 10 އިން ފެންނާނެއެވެ.